Kombukombu la Tolati 8

Inchi jinyahi jenjenda kujitola

1“Amuli yenjenu yenumpekeha lalenu, impalika kuikamula na kuijengalela wichu nahuli mpataje kutama na kujonjukeka, na muwezaje kujingila kujitamila inchi ambaju Bambo Chapanga akalaghili kwa kulapa kubhapekeha akahokolu bhino. 2Nkombukaje ntundu Bambo Chapanga, Chapanga winu, moakundongwihe mu indela jokapi mu lipololu kwa hyaka alobaini, nahuli kuntenda mulihelihaje na kundenga nahuli amanyaje ghamuholalela mu mitima jinu, na ngati anamkamulaje amuli yaki au ngabhela. 3Akuntendiki mulihelihaje, na kuntenda mbonaje injala, na akundehiki kwa mana, chilebhi ambachu mwehapa na akahokolu bhinu ngachemkachimanye. Akahengiki bhenibhela nahuli apataje kumbola kubha mundu ngacheaweza kubha mwomi kwa kula libumunda pela, nambu atama kwa kila lilobhi lelipita mundomu waka Bambo Chapanga. 4Mu chikahi hechi cha hyaka alobaini ingobhu hinu ngacheyalalike, wala magholu ghinu ngacheghahimbike. 5Bhela mmanyaje mkati ja mitima jinu kubha ngati mundu moandapulila mwana waki, bhenibhela nde Bambo Chapanga, Chapanga winu, moanaandapula mwehapa. 6Henu, mkamulaje amuli yaka Bambo Chapanga, Chapanga winu, nahuli mpataje kujenda mu indela yaki na kuntopela. 7Kwa kubha Bambo Chapanga, Chapanga winu, andeta mu inchi jinyahi, inchi jejibhili na ikoka, matanda gha machi, na chemuchemu yeinyila kumabondi na ku itombi, 8inchi jejibhili na inganu na shayili, mizabibu na mitini, mikomamanga, mizeituni na buse, 9inchi ambaju chilebhi ngachikepi na ngamwikosi chindu chokapi chela. Inchi ambaju matalaghu ghaki nde choma na muweza kukemba madini gha shaba kuhuma mu tutombi. 10Chikahi pamwikubhaje mkuliki na kutupila, mundumbalyaje Bambo Chapanga, Chapanga winu, kwa ndandi ja inchi jinyahi jeampekihe.

Lilakalilu la kunjewa Bambo Chapanga

11“Mlilingalyaje, ngamwihika kunjewa Bambo Chapanga, Chapanga winu, kwa kulepalela kukamula amuli yaki, malaghalakilu ghaki, na shelia yaki yenundaghalakila lalenu. 12Ndingalyaje, chikahi pamwikubha mkuliki na kutupila, na kulichengela nyumba hinyahi na kutama monihomu, 13na chikahi mapogha ghinu gha ng'ombi na mambeleli paghijonjukikaje, na madini gha feza na zahabu paghikubhaje ghajonjukike, na kila chindu cheubhi nachu pachikubhaje chijonjukike, 14bhela mitima jinu ngajikubha na ing'omu na kunjewa Bambo Chapanga, Chapanga winu, joakumbohiki mu inchi ja Misili, pandu pamukabhili bhatumwa. 15Jombi nde joakundongwihe mu lipololu lela likolongwa na la kujoghoha, lelibhili na majoka ghaghabhili na chikau, na ipeleli. Inchi jela jejibhili na inywita jangakubha na machi, jombi akumpikihi machi kuhuma mu litalaghu lelinonwipe. 16Akumpekihi mana ja kula kulipololu, chilebhi ambachu akahokolu bhinu ngachebhachimanye. Akahengiki bhenibhela nahuli kuntenda mwehapa mlihelihaje na kundenga mwehapa, nahuli pakujomukela apataje kuntendela mambu ghambone. 17Bhela, ulilingalyaje ngawalipwaghi muntima waku, ‘Uwezu wangu na makili gha mabhoku ghangu nde yeimbekihe wamaheli ghoni wa hindu.’ 18Nambu mkombukaje Bambo Chapanga, Chapanga winu, nde joampekeha mwehapa uwezu wa kupata hindu yamaheli. Ahenga bhenibhela nahuli kulujemakela lulaghilu lwaki loakabhapekihi akahokolu bhinu kwa kulapa, ngati mokubheli lalenu. 19Nambu ngati anamunjewiki Bambo Chapanga, Chapanga winu, na kuijengalela ichapanga nayengi, kwa kuitumakila na kuijojabhela, nundakalila mwehapa lalenu kubha chakaka anamyonangikaje. 20Ngati ngachenjowanela sauti jaka Bambo Chapanga, Chapanga winu, ananjonangikaje ngati bhandu bha inchi nayengi, bhala ambabhu Bambo Chapanga abhayonanga palongi jinu.