Kombukombu la Tolati 9

Bhandu bhalepalela kutii

Kubhoka 32:1-35

1“Njowanyaje, mwenga Bhaizilaeli! Sajenu mheghalili kulomboka nkoka Yoludani kujenda kuitola inchi ikolongwa na yeibhi na bhandu bhabhabhi na makili kupeta mwehapa. Michi jabhu nde mikolongwa, jejibhi na lumatu loluhika kunani. 2Bhandu bhabhatama konihoku nde bhalachu na bhabhi na makili, nde bhana bha Bhaanaki. Mmanyi malobhi ghabhu na njowini bhandu mobhapwaghila, ‘Bho, nde nane joaweza kujema palongi ja bhana bhaka Anaki?’ 3Nambu lalenu mmanyaje chakaka kubha Bambo Chapanga, Chapanga winu, nde joanaandongulyaje kulomboka palongi jinu ngati moto ghouyonanga. Najombi anaabhatopulaje na kubhayonanga manyata, ngati Bambo Chapanga moandaghile.

4“Bambo Chapanga, Chapanga winu, anaajomwili kubhatopola bhandu bhanihabha palongi jinu, ngamwipwagha mumitima jinu, ‘Bambo Chapanga atuletiki pambani kutama mu inchi jenjenu kwa ndandi ja wamboni witu.’ Ngabhela, nambu nde kwa ndandi ja uhakau wa bhandu bha inchi ayeyi nde ndandi Bambo Chapanga abhatopola palongi jinu. 5Muweza kujitama inchi jabhu nga kwa ndandi mwehapa nde mabhandu bhambone au mabhandu mwembili na mitima jambone, nambu Bambo Chapanga, Chapanga winu, abhatopola bhandu bha inchi ayeyi palongi jinu kwa ndandi ja uhakau wabhu, na kulitimiza lilobhi lela leakabhalapile akahokolu bhinu Ibulahimu, Isaka na Yakobo. 6Bhela, mmanyaje kubha Bambo Chapanga, Chapanga winu, ngacheampekeha inchi jenjenu jinyahi kujitama kwa ndandi ja wamboni winu, maghambu mwehapa nde mabhandu mwembi na hingu yeinonwipe.

7“Mkombukaje na ngamwijewa ng'o ntundu momwakuntendile Bambo Chapanga, Chapanga winu, kubha na inyela kulipololu kola. Kutumbula lichobha lela pamwabhokiki ku Misili mbaka lalenu pamuhikiki pambane, mbili mabhandu mwemumpenga Bambo Chapanga. 8Ku chitombi cha Holebu hoku, mwakuntendiki Bambo Chapanga kubha na inyela, bhela Bambo Chapanga akayomiki nakanopi, mbaka akapaliki kunjonanga mwehapa. 9Panakweliki pachitombi kujenda kuijopalela ibau ibheli ya maganga, nayombi nde ibau ya lulaghilu loakahengiki Bambo Chapanga na mwehapa, nakatami kuchitombi machobha alobaini ikilu na muhi, ngachenakuliki chilebhi wala kunywa machi. 10Bambo Chapanga akambekihi ibau ibheli ya maganga yeyalembakiki kwa lukonji lwaki mweni Chapanga. Panani ja ibau heyi pakalembakiki malobhi ghokapi ambaghu Bambo Chapanga akumpwaghili mwehapa pachitombi pala kuhuma mu moto mu lichobha la uhimanganu. 11Pakujomukela machobha alobaini hagha ikilu na muhi, Bambo Chapanga akambekihi ibau ibheli ya maganga, ambayu nde ibau ya lulaghilu.

12“Bhela Bambo Chapanga akambwaghile, ‘Uhelalaje pahi manyata, maghambu bhandu bhaku bhaubhabhohiki ku inchi ja Misili bhahobhike. Bhang'anambwiki manyata kuhuma mu indela jela jenabhalaghalakile, na kulilenganakela chimong'umong'u cha kuyeyusha.’

13“Bhelabhela, Bambo Chapanga akambwaghile, ‘Nabhaweni bhandu abhabha kubha nde bhandu bhabhabhi na ing'omu namaa! 14Unekaje, nahuli mbataje kubhayonanga, na kulihungula lihina labhu pani pundema. Nanatu ananukutendaje wehapa ukubhaje litaifa likolongwa na lelibhili na makili nakanopi kubhapeta bhombi.’

15“Bhela, nakang'anambwiki na kuhelela kuhuma pachitombi, koni nakabya ndotwili ibau ibheli ya lulaghilu yela mumabhoku ghangu ghabheli, na koni moto ukabhi ubhelela pachitombi pala. 16Panakalingalili, nakaweni kubha muntendiki mahoku Bambo Chapanga, Chapanga winu, mkabhili mlilenganakili chimong'umongu cha kuyeyusha kwa liumbu la litoli la ng'ombi. Mng'anambwiki manyata na kujileka indela jela jeakundaghalakile Bambo Chapanga. 17Bhela, nakaikamwi kwa makili ibau ibheli yela kuhuma mu mabhoku ghangu ghabheli, na kuikajula ipandi ipandi palongi ja mihu ghinu. 18Panihapa nakaghoni ukutama palongi jaka Bambo Chapanga kwa machobha alobaini ikilu na muhi. Ngachenakuliki libumunda wala kunywa machi, kwa ndandi ja mahoku ghinu ghokapi ghamwahengike, kwa kuhenga mahakau palongi jaka Bambo Chapanga, na kwa kuntenda kubha na inyela. 19Nakajowipi inyela na imbuka yaka Bambo Chapanga, kwa kubha akunhyomili namaa mwehapa na kupala kunjonanga. Nambu Bambo Chapanga akanyowanili kabhete. 20Bhelabhela Bambo Chapanga akamuyomili namaa Haluni, na akapaliki kunjonanga, nanatu nakundobhili Haluni chikahi chochochu. 21Bhela nakatoliki chindu chela chihakau, yani chimong'umong'u cha litoli chemwalenganakile na kuchijocha pamoto. Nakajipondiki na kujiyagha nakanopi na kubha uhembi laini ngati luhombi, na kulujitila luhombi holu mu chikoka chechinyilikaje kuhuma pachitombi.

22“Bhelabhela mwakuntendiki Bambo Chapanga kubha na inyela chikahi pamukabhi ku Tabela, ku Masa na ku Kibuloti Hataava. 23Na chikahi Bambo Chapanga paakabhatumiki kuhuma ku Kadeshi Balinea, akapwaghike, ‘Nkwelaje, mkajitolaje inchi jenumpekihe mwehapa.’ Nambu mwehapa mkapengiki lilaghalakilu laka Bambo Chapanga, Chapanga winu. Ngachemunhobhalili wala kunjowanela sauti jaki. 24Mwehapa mbili mumpenga Bambo Chapanga kutumbula lichobha panakummanyi mwehapa.

25“Bhela, nakaghonili ukutama palongi jaka Bambo Chapanga kwa machobha ghala alobaini, ikilu na muhi, maghambu Bambo Chapanga akabhili apwaghiki kubha anaanjonangaje. 26Nukundobhiki Bambo Chapanga, nakapwaghaje, ‘Wenga wa Bambo Chapanga, ngaubhayonanga bhandu bhaku, bhandu bhaku wamwete, bhaubhakombwile kwa uwezu waku ukolongwa, na kubhabhoha kuhuma mu inchi ja Misili kwa chiwoku chaku chechibhili na makile. 27Ubhakombukaje bhatumika bhaku Ibulahimu, Isaka na Yakobo. Ngawilingalila ing'omu ya bhandu abhabha, wala uhakau wabhu, wala mahoku ghabhu.’ 28Bhandu bha inchi jela jeutubhohike ngabhihika kupwagha, ‘Bambo Chapanga ngacheakaweziki kubhatola mbaka mu inchi jela jeakabhalaghile, maghambu akatei kubhahakalila, na akabhaletiki kunja nahuli ahikaje kubhakoma kulipololu. 29Nambu bhombi nde bhandu bhaku, bhandu bhaku wamwete, bhandu ambabhu ukabhabhohiki ku Misili kwa makili ghaku makolongwa na kwa chiwoku chaku chechihatambwike.’