Kombukombu la Tolati 10

Musa ajopalela kabhete Amuli Komi

Kubhoka 34:1-10

1“Bhela chikahi chela Bambo Chapanga akambwaghile, ‘Ubachaje ibau ibheli ya maganga ngati yela ya kutumbula, na uhika nayu kongoni panani ja chitombi. Bhelabhela ulenganakyaje na lisanduku la mbau. 2Nanatu ananembaje panani ja ibau yeniheyi malobhi ghaghakabhile panani ja ibau ya kutumbula, ambayu wehapa ukatehi kwiheketa. Panihapa waibhekaje mkati ja lisanduku la mbau heli.’

3“Bhela nakalenganakili lisanduku kwa mbau ya nkongu wa mshita, na nakalenganakili ibau ibheli ya maganga ngati yela ya kutumbula. Panihapa nakakweliki panani pachitombi koni nakabya ndotwile ibau ibheli mumabhoku ghangu. 4Bhela Bambo Chapanga akalembiki panani ja ibau yeniheyi malobhi ghala ghala ngati ghaakabhili aghalembiki pakutumbula. Amuli Komi ambayu Bambo Chapanga akabhili ampwaghile panani pachitombi, kuhuma mu moto mu lichobha lela la kuhimangana. Panihapa Bambo Chapanga akambekihi nepani. 5Panihapa nakahelili kuhuma pachitombi na kuibheka ibau heyi mkati ja lisanduku lenakalenganakile, na ibhili konihoku mbaka sajenu, ngati Bambo Chapanga moakanaghalakile.”

6Bhaizilaeli bhakabhokiki kuhuma ku ilibha ya Bene Yaakani mbaka ku Mosela. Konihoku Haluni akapotili na kutaghakika, najombi Eleazali mwana waka Haluni, akatoliki pandu paki pa lihengu ngati mpenganyambiku. 7Kuhuma panihapa, bhakajendalili na mwanja mbaka ku Gudigoda, na kuhuma ku Gudigoda mbaka ku Yotibata, inchi jejibhi na ikoka yamaheli ya machi. 8Chikahi chenihechi Bambo Chapanga akalihawili likabila la Lawi kulitotola lisanduku la lulaghilu laka Bambo Chapanga, nahuli bhajemaje palongi jaka Bambo Chapanga na kuntumakila ngati bhapenganyambiku, na kubhapengalela bhandu kwa lihina laki, ngati mobhahengela mbaka lalenu. 9Jeniheji nde ndandi Bhalawi ngachebhabhili na pandu pa inchi jebhakapekiwi kubha jabhu papamu na bhalongu bhabhu. Chebhakajopalili nde utopelu wa kubha bhapenganyambiku bhaka Bambo Chapanga, ngati Bambo Chapanga, Chapanga wabhu moakabhapwaghile.

10“Bhela nepani nakatami kuchitombi kwa machobha alobaini ikilu na muhi, ngati monahengile pakutumbula hapa. Bambo Chapanga akanyowanili kabhete chikahi chenihechi, na akajetakili kubha ngaanjonange. 11Bhela Bambo Chapanga akambwaghile: Ubhokaje, ujendalyaje na mwanja waku wa kubhalongoha bhandu mu indela jabhu nahuli bhawezaje kujingila na kujitola inchi jela jenakalapike kubhapekeha akahokolu bhabhu.

Cheapala Bambo Chapanga

12“Sajenu, wenga wa Izilaeli, Bambo Chapanga, Chapanga waku, apala kike kwaku wehapa nambu kunjojabhela Bambo Chapanga, Chapanga waku, na kujenda mu indela yaki, kumpala na kuntumakila Bambo Chapanga, Chapanga waku, kwa mtima waku wokapi na kwa roho jaku jokapi, 13na kukamula malaghalakilu ghaka Bambo Chapanga na amuli yaki yenukulaghalakila lalenu, kwa ndandi ja nyonjeka jaku wamwete? 14Lingalyaje, mbengu na hata mbengu ya kunani nakanope, ndema na yokapi yeibhili mkati jaki nde mali ghaka Bambo Chapanga, Chapanga waku. 15Hata bhela Bambo Chapanga akabhahekalili na kubhapala namaa akahokolu bhinu, akunhawili mwehapa bhabhelakeka bhabhu baada ja bhombi kubha bhandu bhaki, kupeta bhandu bha inchi ghokapi, ngati mokubhelile lalenu. 16Bhela mujigholulaje mitima jinu, na ngamwikubha na ing'omu kabhete. 17Maghambu Bambo Chapanga, Chapanga winu, nde Chapanga wa ichapanga, na Bambo wa mabambo. Jombi nde Chapanga nkolongwa na joabhi na makili, na wa kujoghoha, jwangakulingalila sula ya bhandu, wala ngacheajopa ngolukelu. 18Abhahengela bhana bhakebha, na akambomba bhabhaweliwi na bhalomi bhabhu utemulu ngati moaipalakila, ampala ngeni na kumpekeha chilebhi na ingobhu. 19Bhela, mumpalaje ngeni, maghambu mwehapa mabhete mkabhili bhagheni ku inchi ja Misili. 20Untopilaje Bambo Chapanga, Chapanga waku, na untumakyaje jombi pela. Ukamulana naku na kulapa kwa lihina lake. 21Jombi nde joupalika kundumbalika, najombi nde Chapanga waku, joakuhengile mambu aghagha makolongwa, gha kujoghoha ghaughaweni kwa mihu ghaku wamwete. 22Akahokolu bhinu bhakahelili kujenda ku inchi ja Misili na bhandu sabini, nambu sajenu Bambo Chapanga, Chapanga winu, antendiki mwehapa kubha bhamaheli ngati ndondwa ya kunani.