Kombukombu la Tolati 11

Ukolongwa waka Bambo Chapanga

1“Kwa ndandi jeniheji, umpalaje Bambo Chapanga, Chapanga waku, na kukamula machobha ghokapi ghala ghaaghapala Chapanga, amuli yaki, shelia yaki na malaghalakilu ghaki. 2Nanamu lalenu mmanyaje, kubha ngachenongela na akakombu bhinu ambabhu ngachebhakamanyi, wala ngachebhakaweni utemulu waka Bambo Chapanga, Chapanga winu, na chiwoku chaki chechibhi na makili, na uwezu waki ukolongwa, 3na nginyulila yaki, na mambu ghokapi ghaakahengiki ku Misili, kwaka Falao nkolongwa wa Misili na inchi jaki jokapi, 4na ntundu moakalihengile linjolinjoli lokapi la Misili, falasi yabhu, na magali ghabhu gha kuhutakika gha ngondo, ntundu moakabhajibhihe mu machi gha Bahali ja Shamu pabhakabhili bhunjengalela mwehapa, na ntundu Bambo Chapanga moakabhayonangile mbaka lalenu. 5Bhelabhela mmanyaje kubha nga bhana bhinu bhabhakaghaweni mambu ghala Bambo Chapanga ghaakuntendile mwehapa ku lipololu hoku, mangane ja kuhika pambane, 6na wala mambu ghala ghaakahengiki kwaka Datani na Abilamu, bhana bhaka Eliabu wa likabila laka Leubeni, chikahi ndema paukahowili ndomu waki pachilanda ja bhandu bhokapi bha Izilaeli, na kubhamila papamu na bhala bhabhakabhili munyumba yabhu, mu mahema ghabhu na kila chindu chechakabhili chomi ambachu chakabhili mali ghabhu. 7Nambu mihu ghinu mwehapa mabhete nde ghaghakaweni mambu ghanihagha makolongwa ghaakahengiki Bambo Chapanga.

Mbengalelu ya inchi ja chilanga

8“Bhela nkamulaje malaghalakilu ghokapi ghanumpekeha mwehapa lalenu, nahuli mpataje kubha na makili gha kujingila na kujitola kwa makili inchi ambaju ndomboka nkoka Yoludani kujenda kujitola kubha jinu, 9nahuli mpataje kutama machobha ghamaheli mu inchi jela ambaju Bambo Chapanga akalapiki kubhapekeha akahokolu bhinu, kubha anaabhapekya bhombi na chibheleku chabhu, inchi jejitwelile mahibha na buse. 10Inchi jenjingila kujenda kujitola ngachejilengana na inchi ja Misili komuhuma, ambaku mkabhili mpanda imbeju hinu na kuijitalila machi kwa magholu, ngati ngonda wa likolo. 11Nambu inchi jendomboka kujenda kujitola, nde inchi ja itombi na mabondi, jipata machi gha iyula kuhuma kunani kumahunde. 12Jeniheji nde inchi jejighohakeka na Bambo Chapanga, Chapanga winu, na mihu ghaka Bambo Chapanga, Chapanga winu, ghajilingalila chikahi chokapi kutumbula pachitumbula chaka mbaka ujomukelu wa chaka.

13“Bhela ngati anamkamula kwa chakaka malaghalakilu ghangu ghanundaghalakila lalenu, kwa kumpala Bambo Chapanga, Chapanga winu, na kuntumakila jombi kwa mitima jinu jokapi na roho hinu yokapi, 14panihapa anaajinelilaje iyula inchi jinu kwa chikahi chaki, ihula ja chihuku na ihula ja palumu, nahuli mpataje kuhuna mahunu ghinu, divai jahenu na mahuta gha zeituni. 15Nanatu ananumpekyaje manyonyoli kwa ndandi ja ng'ombi hinu, na mwehapa anamkulaje na kutupila. 16Nambu mlilingalyaje, ngamwahika kukoluweka na kung'anambuka na kujojabhela ichapanga nayengi na kuichikamila. 17Ngati anamtendiki bhenibhela, inyela jaka Bambo Chapanga anaimbelalyaje mwehapa, najombi anaakongaje mbengu nahuli iyula ngajitonya na inchi ngajipiha mahunu ghaki, nanamu anamuyonangikaje manyata mu inchi jinyahi jempekewa na Bambo Chapanga.

18“Bhela mghabhekaje malobhi ghangu aghagha mu mitima jinu na mu roho hinu, mghakongaje ghakubhaje nginyulila ja kunkomboha panani ja mabhoku ghinu, na pa ibhongi ya pamihu jinu. 19Mubhabholaje bhana bhinu, mghalongilaje chikahi pamtama panyumba na chikahi panjenda mwindela, chikahi pangonela na chikahi panjumuka. 20Bhelabhela mghalembaje mu ngelakete ya milyangu ja nyumba hinu na mu milyangu jinu mikolongwa ja michi, 21nahuli machobha ghinu na machobha gha bhana bhinu ghapataje kubha ghamaheli mu inchi jela ambaju Bambo Chapanga akalapiki kubhapekeha akahokolu bhinu. Ananjendalyaje kutama mu inchi jeniheji ngati mbengu mojijendalela kutama panani ja ndema.

22“Bhela ngati anamkamwili kwa chakaka malaghalakilu aghagha ghokapi ghanumpekeha kughajengalela, gha kumpala Bambo Chapanga, Chapanga winu, na kujenda mu indela yaki yokapi na kukamulana naku kwa ulongwana, 23panihapa Bambo Chapanga anaabhatopulaje bhandu bha inchi ayeyi yokapi palongi jinu, nanamu anamubhatopulaje bhandu bha inchi ikolongwa na bhabhabhi na makili kupeta mwehapa. 24Kila pandu pamwikanyataje kwa magholu ghinu anapakubha pinu. Inchi jinu anajijaghanyaje kutumbula ku lipololu upambala wa kunkache, mbaka ku itombi ya Lebanoni upambala wa kungonde, na kuhuma ku nkoka Eufulati upambala wa kolipita lyobha, mbaka ku Bahali ja Meditelania, upambala wa kolijibhi lyobha. 25Ngapikubhi na mundu joanawezaje kunhibhalakila palongi jinu. Na pokapi pamwijendaje mu inchi jeniheji, Bambo Chapanga, Chapanga winu, anaabhatendaje bhandu bhunjoghupaje mwehapa, ngati moakundaghile.

26“Ndingalyaje, lalenu mekiki palongi jinu mbengalelu na masolu. 27Mbengalelu anamkubha nayu ngati anamkamula amuli yaka Bambo Chapanga, Chapanga winu, yenumpekeha lalenu. 28Nambu masolu anamkubha naghu ngati ngechemkamula amuli yaka Bambo Chapanga, Chapanga winu, na kujileka indela ambaju nundaghalakila lalenu, kwa kujengalela ichapanga nayengi, ambayu ngachemwimanye. 29Chikahi Bambo Chapanga payikubhaje andetiki mu inchi jendomboka kujenda kujitola kubha jinu, mkatangaza mbengalelu kuhuma ku chitombi cha Gelizimu, na mkatangaza masolu kuhuma pachitombi cha Ebali. 30Ngati mommanyila, itombi ayeyi ibhili kwihi ja nkoka Yoludani, upambala wa kolijibhi lyobha, kujenda ku upambala wa kolipita lyobha, pambipi na mikongu mikolongwa ja ku muchi wa Mole, mu inchi ja Bhakanaani bhabhatama ku Alaba, pambipi na ku Giligali. 31Mwehapa muheghalile kulomboka kwihi ja nkoka Yoludani na kujenda kujitama inchi jela jeampekeha Bambo Chapanga, Chapanga winu. Chikahi pamwikubhaje mjitoliki na kutama monihomu, 32impalika kuikamula amuli na shelia yokapi yenibheka palongi jinu mwehapa lalenu.