Kombukombu la Tolati 12

Pandu pa kanjika pa kujojabhela

1“Hayeyi nde amuli na shelia ambayu impalika kuikamula na kuijengalela mu inchi ambaju Bambo Chapanga, Chapanga wa akahokolu bhinu, ampekihi kubha jinu, kwa chikahi chokapi pamwikubhaje mtama mu inchi jeniheji. 2Mpayonangaje nakanopi pandu pabhu pa kujojabhela mu itombi ilachu, tutombi na pahi ja kila nkongu ukolongwa ghoubhili na mahamba mabhei, ambamu bhandu bha inchi ayeyi bhanjenda kutola inchi jabhu bhaijojabhela ichapanga yabhu. 3Mbombulaje pandu pabhu pa kujojabhela, mbombulaje nguzu ya maganga yebhajojabhela, njochaje moto nguzu yabhu ya Ashela, na imong'umong'u ya ichapanga yabhu ya kubacha, na muhungulaje mahina ghabhu pandu panihapa.

4“Wala ngamwanjojabhela Bambo Chapanga, Chapanga winu, ngati mobhajojabhela bhombi ichapanga yabhu. 5Nambu mwijendaje pandu ambapu Bambo Chapanga, Chapanga winu, anaapahaghulaje, mu makabila ghinu ghokapi nahuli kulibheka lihina laki na matamu ghaki panihapa, konihoku nde kompalika mwehapa kujenda kunjojabhela. 6Mpelakaje nyambiku hinu ya kujochakeka, na nhupu hinu, na zaka hinu, na michangu jinu, yela yemwalaghile kubhoha, nhupu hinu ya kupala mabhete, na bhabhelakeka bha kutumbula bha mapogha ghinu gha ng'ombi na mambeleli. 7Konihoku anamkulaje palongi jaka Bambo Chapanga, Chapanga winu, mwehapa papamu na bhandu bha munyumba hinu, muhekalyaje kwa kila chindu chekipatakine kubhokana na lihengu la mabhoku ghinu, maghambu Bambo Chapanga, Chapanga winu, atehi kumpengalela.

8“Ngamwihenga ngati motuhengela sajenu pambane, kila mundu ngati moapalila kuhenga mweni pamihu jake, 9maghambu mwakali ngakuhika pandu pamwitamaje kwa lukwali, pandu ambapu Bambo Chapanga, Chapanga winu atenda kumpekeha. 10Nambu pamwilombukaje nkoka Yoludani na kutama mu inchi ambaju Bambo Chapanga, Chapanga winu, ampekeha kubha jinu, najombi anaantendiki kutama kwa lukwali, na kunkengalela kubhokana na adui bhinu nahuli mtamaje kwa lukwali, 11bhela konihoku pandu ambapu Bambo Chapanga, Chapanga winu, anaapahaghulaje nahuli lihina laki litamaje, panihapa nde pamwipelakaje kila chindu chenundaghalakila: Nyambiku hinu ya kujochakeka, na nhupu hinu, na zaka hinu, na michangu jinu, papamu na hindu hinu ya mbija yamaheli yemwalaghile kumbokeha Bambo Chapanga. 12Panihapa muhekalyaje palongi jaka Bambo Chapanga, Chapanga winu, mwehapa papamu na bhana bhinu bha chikambaku, akakamwali bhinu, bhatumika bhinu bha chikambaku na bha chimbomba, na Bhalawi bhabhatama mu michi jinu, maghambu bhombi ngachebhabhili na pandu pabhu bheni pabhapekiwi pachilanda jinu. 13Mlilingalyaje, ngamwibhoha nyambiku hinu ya kujochakeka kila pandu pamupabhona. 14Mwibhoha pela mu pandu pala ambapu Bambo Chapanga anaapahaghulaje mu pandu pamu pa makabila ghinu. Panihapa nde pamwibhohaje nyambiku hinu ya kujochakeka, na pamwihengaje kila lijambu lenundaghalakila.

15“Hata bhela muweza kuichinja hinyama hinu mu michi jinu jokapi jela na kula inyama jamaheli mompalila ngati ananchinjiki holoku au mbabhala, kulengana na mbengalelu yeanaampekyaje Bambo Chapanga, Chapanga winu. Mundu joajetakalewa palongi jaka Chapanga au mundu mhakau aweza kula inyama jeniheji. 16Nambu ngamwikula mwahi ng'o, ujitalaje mwahi hoghu panani ja luhombi ngati machi. 17Ngamwikula hindu ayeyi pandu pamtama: Zaka ya mahunu ghinu, wala divai hinu, wala mahuta ghinu gha zeituni, wala bhabhelakeka bha kutumbula bha mapogha gha ng'ombi, na mapogha gha mambeleli, wala chindu chokapi chendaghile kuchibhoha ngati nhupu, wala nhupu ya kupala mabheti, wala nhupu yengi yokapi. 18Nambu mwikulaje hindu yeniheyi palongi jaka Bambo Chapanga, Chapanga winu, pandu ambapu Bambo Chapanga, Chapanga winu, anaapahaghulaje. Mwikulaje mwehapa papamu na bhana bhinu bha chikambaku na bha chimbomba, bhatumika bhinu bha chikambaku na bha chimbomba, na Bhalawi bhabhatama mu michi jinu. Impalika kuhekalela palongi jaka Bambo Chapanga, Chapanga winu, mu mambu ghokapi ghamwihengaje kwa mabhoku ghinu. 19Bhelabhela impalika ngamubhajewa Bhalawi, chikahi chokapi pamwitamaje mu inchi jinu.

20“Bambo Chapanga, Chapanga winu, payikubhaje ajijonjukili inchi jinu ngati moakalaghile, nanamu pamwipwaghaje, ‘Mbala kula inyama,’ kwa kubha roho jaku jitokulela kula inyama, panihapa uweza kula inyama ngati roho jaku mojipalila. 21Ngati pandu ambapu Bambo Chapanga, Chapanga winu, anaapahaghulaje kubheka lihina laki nde patali nakanopi kuhuma kwinu, muweza kuchinja hinyama kuhuma mu mapogha ghinu gha ng'ombi au mambeleli ambaghu Bambo Chapanga ampengalili mwehapa, ngati monundaghalakile, na muweza kula inyama jamaheli ngati mompalila anambili mu michi jino. 22Mkulaje inyama jeniheji ngati momkulila inyama ja holoku au inyama ja mbabhala. Mundu jokapi aweza kula, jola joajetakalewa palongi jaka Chapanga au mhakau. 23Nambu ndingalyaje kubha impalika ngamwikula mwahi, maghambu mwahi nde womi, bhela ngamwikula womi papamu na inyama ng'o. 24Ngamwikula mwahi ng'o, njitalaje mwahi hoghu panani ja luhombi ngati machi. 25Ngamwikula mwahi ng'o, nahuli mpataje kuneng'anela mwehapa papamu na bhana bhinu baada jinu mwehapa, maghambu anamkubha mlihenga lijambu lelipalika palongi jaka Bambo Chapanga. 26Nambu mtolaje hindu hinu yemumbokili Bambo Chapanga, na nhupu hinu yendaghili kuibhoha, na kujenda nayu pandu pala paapahawili Bambo Chapanga. 27Ndetaje nyambiku hinu ya kujochakeka, inyama na mwahi, pandu pa kubhokeha nyambiku paka Bambo Chapanga, Chapanga winu. Mwahi wa nyambiku heji mmichaje munkeghi ja pandu pa kubhokeha nyambiku paka Bambo Chapanga, Chapanga winu, nambu inyama ja chinyama hechi muweza kula. 28Impalika kughakamula malaghalakilu aghagha ghokapi ghanumpekeha, nahuli machobha ghokapi mpataje kuneng'anela, mwehapa papamu na bhana bhinu baada jinu mwehapa, maghambu anamkubhaje mlihenga lijambu lamboni na lelipalika palongi ja mihu ghaka Bambo Chapanga, Chapanga winu.

Lilakalilu la kujojabhela imong'umong'u

29“Chikahi Bambo Chapanga, Chapanga winu, payikubhaje abhayoningi bhandu bha inchi yeibhi palongi jinu, ambabhu henu kateki anamubhalapulaje na kubhatopola, na mwehapa kutama mu inchi jabhu, 30na baada ja kuyonangeka palongi jinu, mlilingalyaje ngamwihika kujingila mu chimbenda kwa kulalukila malobhi gha ichapanga yabhu, mkapwaghaje, ‘Bho, bhandu bha inchi ayeyi bhajojabhe bholi ichapanga yabho? Natatu anatuhenga bhelabhela.’ 31Ngamwanjojabhela Bambo Chapanga, Chapanga winu, kwa indela yebhajojabhela ichapanga yabhu ng'o, maghamu pabhajojabhela ichapanga yabhu, bhahenga kila ntundu wa mahakalilu ghaaghahakalila Bambo Chapanga. Hata kubhajocha bhana bhabhu bha chikambaku na bha chimbomba pa moto, nahuli kubhoha nyambiku kwa ichapanga yabhu.

32“Ndingalyaje kubha impalika kuhenga kila chindu chenundaghalakila, ngamwijonjukela chindu, wala ngamwipunguza chindu.