Kombukombu la Tolati 13

1“Ngati anaapitalili mlota, au mundu joalota kwa indela ja ndoto pachilanda jinu, na kumpwaghila nginyulila au ngangachu, 2na nginyulila au ngangachu heji anajipitalile, najombi anaapwaghiki, ‘Tujengalyaje ichapanga nayengi, ichapanga ambayu ngachemwimanyi, na kuitumakila,’ 3ngamwijowanela malobhi ghaka mlota hoju au mundu jola joalota ndoto. Maghambu Bambo Chapanga, Chapanga winu, atenda kundenga nahuli abhonaje ngati anamumpala kwa mitima jinu jokapi na kwa roho hinu yokapi. 4Munjengalyaje na kuntopela Bambo Chapanga, Chapanga winu, kwa kukamula amuli yaki na kutii sauti jaki, muntumakya jombi na kukamulana naku jombi. 5Nambu mlota hoju au mundu jola joalota kwa ndoto apalika akomakikaje, maghambu atangizi uasi panani jaka Bambo Chapanga, Chapanga winu, joakumbohiki kuhuma mu inchi ja Misili na kunkombola mwehapa kuhuma mu inchi jemkabhi bhatumwa, nahuli mjilekaje indela ambaju Bambo Chapanga, Chapanga winu, akundaghalakili mjijengalyaje. Bhenibhela nde momwitendilaje nahuli kubhoha uhakau pachilanda jinu.

6“Ngati ndongu waku wa lutumbu lumu, au mwana waku wa chikambaku, au mwali waku, au nhwanu waku joumpala nakanopi, au nkochi waku wa pambipi nakanopi, anaakupwaghili kwa sili, ‘Tumbokaje tukajojabyaje ichapanga nayengi,’ ichapanga ambayu mwehapa wala akahokolu bhinu ngachemwimanyi, 7au ichapanga ya bhandu bhabhunyongolota mwehapa, bhabhatama kutali au pambipi, kutumbula ujomukelu ghumu wa ndema mbaka ujomukelu ghongi wa ndema, 8ngawijetakela kokuluheka wala kunjowanela. Wala lihu laku ngalambonela chiha, wala ngawandeka abhokaje, wala kunhiya. 9Chakaka ikupalika unkomaje! Ikupalika chiwoku chaku chikubhaje cha kutumbula kunkoma, na panihapa nde mabhoku gha bhandu bhangi bhokapi ghaweza kunkoma. 10Mundapulaje kwa maganga mbaka apotilaje! Maghambu akalengiki kukung'anambula ubhokaje kwaka Bambo Chapanga, Chapanga waku, joakakubhohiki kuhuma ku inchi ja Misili, mu inchi jeukabhi untumwa. 11Bhela Bhaizilaeli bhokapi anabhajowanaje na kujoghopa, wala njeta mundu jokapi pachilanda jinu joanahengaje uhakau kabhete.”

12“Ngati ananjowini ipwaghakika kubha ghumu wa michi ambaju Bambo Chapanga, Chapanga winu, ampekeha ntamaje mkati jaki, 13kupitalili akanalomi bhabhabhi na milomu pachilanda jinu, na kubhahoa bhandu bha muchi, bhakapwaghaje, ‘Tumbokanyaje tukajojabyaje ichapanga nayengi,’ ichapanga ambayu mwehapa ngachemwimanyi, 14panihapa anaimpalikaje kulalukila, kupema na kuchunguza kwa mkati nakanope. Ngati nde chakaka, kubha lijambu leniheli la kuhakaliha lihengakiki pachilanda jinu, 15chakaka impalika mubhakomaje bhenehi bha muchi ghonihoghu kwa lipanga. Muuyonangaje nakanopi muchi hoghu, papamu na hindu yokapi yeibhi monihomu, na hinyama yokapi ya kudimakika kwa lipanga. 16Mbonganaje hindu yokapi yentoliki kwa makili mu muchi na kuipeleka mbaka pa uwanda wa lubhanja lwa muchi na kuujocha nakanopi muchi hoghu kwa moto, papamu na hindu yokapi yentoliki kwa makili ngati nyambiku ja kujochakeka kwaka Bambo Chapanga, Chapanga winu. Muchi hoghu anauhighalya mahame mileli, na wala ngawichengakeki kabhete. 17Ngamwitola mu mabhoku ghinu chindu chokapi chechibhohakiki chiyonangikaje, nahuli Bambo Chapanga, Chapanga winu, ang'anambulaje inyela jaki ngolongwa. Anaambonilaje chihomu na chiha, na kuntenda ubhalangiku winu ujonjukikaje, ngati moakabhalaghile akahokolu bhinu, 18kwa kubha pela untii Bambo Chapanga, Chapanga waku, ngati anaukamwili amuli yaki yokapi yenukulaghalakila lalenu, na kuhenga lela lelibhi lamboni palongi jaka Bambo Chapanga, Chapanga waku.