Kombukombu la Tolati 14

Ntetu wa maombulezu ghoukanakiwe

1“Mwehapa nde bhana bhaka Bambo Chapanga, Chapanga winu. Ngamwaliheketa nembu hyegha hinu, wala ngamwimogha lupanja pamutu jinu kwa ndandi jaka mundu joapotile. 2Maghambu mwehapa nde mabhandu bhahuhu bhaka Bambo Chapanga, Chapanga winu. Bambo Chapanga anhawili mwehapa kubha bhandu bhaki mweni, kupeta bhandu bha inchi yokapi yeibhi pundema.

Hinyama yeijetakaliwi na yeikanakika palongi jaka Chapanga

Bhalawi 11:1-47

3“Ngamwikula chindu chokapi chela changakujetakalewa palongi jaka Bambo Chapanga. 4Hayeyi nde hinyama yemuweza kula inyama yabhu: Ng'ombi, limbeleli, imbuhi, 5mbabhala, holoku, kongoni, imbuhi ja muchitengu, holoku jihuhu, pofu na imbuhi ja muchitombi. 6Muweza kula kila chinyama chechikajwiki lingolokoto mala pabheli, na kubokola na kumemena kabhete. 7Nambu, pachilanda ja hinyama yela yeibokola na kukajuka lingolokoto ngamwikula ngamia, kipecha na chibhela. Kwa kubha itenda kubokola, nambu ngacheikajwiki ngolokoto yabhu mala pabheli, yeniheyi anayuntenda ngamwijetakalewa palongi jaka Chapanga. 8Bhelabhela ngamwikula ligholobhi, kwa kubha likajwiki lingolokoto mala pabheli, nambu ngachelibokola, jonihoju nde mhakau kwinu. Ngamwikula inyama yabhu, wala ngamwikamula mituhi jabhu.

9“Kwa ihumbi yokapi yeitama mumachi: Muweza kula kila chechibhili na mapezi na mang'amba. 10Nambu kila chekitama mumachi changakubha na mapezi na mang'amba ngamwikula, yeniheyi anayuntenda ngamwijetakalewa palongi jaka Chapanga.

11“Muweza kula chijuni chokapi chela chechijetakalewa palongi jaka Chapanga. 12Nambu ngamwikula hijuni hayeyi: Ngwahe, fulukombe, kapongu, 13kengewa, kozi, na limbanga kwa ntundu waki, 14na likongolu kwa ntundu waki, 15mbuni, kihombandela, litipitipi, na chununkwangula kwa ntundu waki, 16litungutu, mumbi, linhinhita, 17mwali, ndeli, mnandi, 18kolongo, koikoi kwa ntundu waki, hudihudi, na lilemalema.

19“Hidudu yokapi yeikwabha na kugholoka kwa mapapanilu ghaki ngacheijetakalewa palongi jaka Chapanga, ngamwikula. 20Nambu ihumbi yokapi yeibhi na mapapanilu yeijetakalewa palongi jaka Chapanga muweza kula.

21“Ngamwikula chindu chokapi chela chemwachihimanyaje chiwili cheni. Muweza kumpekeha ngeni jokapi jola joatama mu michi jinu, nahuli akulaje, au muweza kundombasela mundu wa inchi najengi. Maghambu mwehapa nde bhandu bhahuhu kwaka Bambo Chapanga, Chapanga winu.

“Ngamwitutuha mwanambuhi mu mahibha ghaka mabhu waki.

Shelia panani ja lifungu la komi

22“Ngawikotoka kubhoha lifungu la komi la mahunu ghaku ghokapi gha mighonda jaku mu kila chaka. 23Mwikulaje lifungu la komi la mahunu ghinu, divai jahenu, mahuta gha zeituni na bhabhelakeka bhinu bha kutumbula bha mapogha ghinu gha ng'ombi, mambeleli na imbuhi palongi jaka Bambo Chapanga, Chapanga winu, pandu pala paanahaghulaje kubha ngati matamu gha lihina laki, nahuli mpataje kulibhola kuntopela Bambo Chapanga, Chapanga winu, chikahi chokapi. 24Anangati mwanja nde ulachu, kwa kubha Bambo Chapanga, Chapanga winu, apahawili pandu pa kubheka matamu gha lihina laki pandu ambapu nde patali nakanopi na mwehapa, nanamu ngachemuweza kutotola mafungu gha komi gha mahunu ghinu ambaghu Bambo Chapanga, Chapanga winu, ampengalili mwehapa, bhela, mtendaje anana: 25Muhemalyaje mahunu ghanihagha kwa mbija, na kutotola mbija heyi mbaka pandu pala paapahawili Bambo Chapanga, Chapanga winu. 26Mtumilaje mbija jeniheji kuhemela chokapi chela chemchipala: Ng'ombi, limbeleli, divai au chakunywa chokapi chela chechibhi na ubhabha, au chokapi chela chemchipala. Panihapa mwehapa papamu na bhandu bha munyumba hinu, mwikulaje na kuhekalela palongi jaka Bambo Chapanga, Chapanga winu.

27“Ngamubhajewa Bhalawi bhabhatama mu michi jinu, maghambu bhanihabha ngachebhabhi na pandu pa inchi pachilanda jinu. 28Mu ujomukelu wa kila chaka cha katatu, ndetaje mafungu gha komi gha mahunu ghinu gha hyaka yeniyela na kughaghoha mu michi jinu, 29nahuli Bhalawi ambabhu ngachebhabhili na pandu pa inchi jabhu papamu na mwehapa, na bhagheni, bhakebha, na akambomba bhabhaweliwi na bhalomi bhabhu, ambabhu bhatama mu michi jinu, bhakulaje na kutupila. Mtendaje bhenibhela nahuli Bambo Chapanga, Chapanga winu, ampengalyaje mwehapa mu mahengu ghokapi ghamughahenga kwa mabhoku ghinu.