Kombukombu la Tolati 15

Chaka cha saba

Bhalawi 25:1-7

1“Kila ujomukelu wa chaka cha saba impalika kubhalekakela bhala bhamubhadai. 2Anana nde momwihengilaje: Kila mundu joanjahiki njaki, ahungulaje lideni leniheli, wala ngaandepesha njaki wala ndongu waki, maghambu Bambo Chapanga mweni nde joatemwile kubha lideni leniheli lihunguliwaje. 3Uweza kudai kuhuma kwaka ngeni, nambu ikupalika uhungulaje kila lideni leundai ndongu waku.

4“Hata bhela, ngakwikubhi na kahochu pachilanda jinu, maghambu mu inchi ambaju Bambo Chapanga, Chapanga winu, ampekeha kujenda kujitola kubha jinu, anaampengalyaje namaa, 5ngati pela anamjijowanili sauti jaka Bambo Chapanga, Chapanga winu, kwa kujengalela na kuitenda ngati moipalakila amuli ayeyi yokapi yenumpekeha lalenu. 6Bambo Chapanga, Chapanga winu, anaampengalyaje ngati moakalaghile. Nanamu anamubhajahikaje bhandu bha inchi yamaheli, nambu mwehapa ngamwijahiki kwaka jokapi jola. Anamughatawalaje bhandu bha inchi yamaheli, nambu mwehapa ngamwitawaliwi na bhandu bha inchi jokapi jela.

7“Ngati anakubhili na mundu kahochu pachilanda ja bhalongu bhaku, mu muchi wa inchi jokapi jela ambaju Bambo Chapanga, Chapanga waku, akupekihi kutama, ngawikubha undohu wala ngawikotoka kunjangatila ndongu waku kahochu hoju. 8Nambu unhoghulyaje mabhoku ghaku, na unjahikaje kwa kupala wamwete chindu chokapi chela cheachipala. 9Ndingalyaje ngamwibheka liholalelu aleli lihakau mu mitima jinu: ‘Chaka cha saba, nde chaka cha kuhungula madeni chiheghalile,’ ngawilangiha liholalelu lihakau kwaka ndongu waku kahochu na kukana kumpekeha chokapi chela cheachipala. Jombi aweza kundelela Bambo Chapanga kwa ndandi jinu, nanamu anamkubhaje mpatakini na mahoku. 10Umpekyaje kwa mtima wamboni na pangakung'ong'uteka mu mitima jinu, maghambu kwa ndandi ja leniheli Bambo Chapanga, Chapanga winu, anaampengalyaje mwehapa mu mahengu ghinu ghokapi, na kwa kila chindu chemwihengaje kwa mabhoku ghinu. 11Kwa ndandi machobha ghokapi akakahochu anabhakubha mu inchi. Bhela nukulaghalakila kubha, ikupalika ukubhaje na mtima wamboni wa kubhajangatila bhalongu bhaku akakahochu, na bhokapi bhaipalika kubhajangatila mu inchi jaku.

Ntundu wa kubhahengela bhatumwa

Kubhoka 21:1-11

12“Ngati Muebulania njaku, mwanalomi au mbomba, anaalilombisi kwaku na kukutumakila kwa hyaka sita, mu chaka cha saba ikupalika undekaje abhokaje kuhuma kwaku akabya alijeka. 13Nanau pawandekaje abhokaje kuhuma kwaku akabya alijeka, ngawandeka abhokaje mabhoku matopu. 14Umpekyaje kwa mtima wamboni kuhuma mu libheghi laku la mambeleli na imbuhi, kuhuma mu pandu paku pa kughohela mahunu, na kuhuma mu pandu paku pa kuminyila divai. Umpekyaje ngati Bambo Chapanga, Chapanga waku, moakupengalile. 15Nkombukaje kubha mwehapa nanamu mkabhili bhatumwa ku Misili hoku, nambu Bambo Chapanga, Chapanga winu, akunkombwile. Jeniheji nde ndani numpekeha lilaghalakilu lendenu lalenu.

16“Nambu mtumika waku anaakupwaghile, ‘Ngachembala kubhoka kwaku wehapa,’ kwa kubha akupala wehapa, na bhandu bha munyumba jaku na apala kujendalela kutama na wehapa, 17bhela, wantolaje mbaka pa ubau wa ndyangu wa nyumba jaku, witolaje lukombu na kuhotola likutu laki mbaka lukombu holu lujingalaje, najombi anaakubhaje mtumika waku mileli. Uhengaje bhelabhela na kwaka mtumika waku wa chimbomba. 18Wala ngawibhona kunonopa kundeka mtumika waku kulijeka, maghambu utumika waki kwaku wehapa kwa hyaka ayeyi sita ubhili na samani ja nusu jaka mundu joundepiki kukuhengela lihengu. Undekaje kulijeka, najombi Bambo Chapanga, Chapanga waku, anaakupengalyaje wehapa kwa kila lijambu leanauhengaje.

Bhabhelakeka bha kutumbula bha ng'ombi na mambeleli

19“Bhabhelakeka bha kutumbula bha chikambaku bhokapi bhabhibhelakikaje mu lipogha laku la ng'ombi na mambeleli, umbokihaje Bambo Chapanga, Chapanga waku. Ngaughahengesha lihengu mapongu ghanihagha gha ng'ombi, wala ngaughamogha mangoma gha bhabhelakeka bha kutumbula bha lipogha laku la mambeleli. 20Kila chaka, wehapa papamu na bhandu bha munyumba jaku anaimpalikaje kula hinyama yeniheyi palongi jaka Bambo Chapanga, Chapanga winu, pandu pala paanahaghulaje. 21Ngati chinyama chenihechi anachibhili na dosali, yani anachibhi chilema, ngalola, au anachibhili na dosali jokapi jela ngolongwa, ngawachibhoha kubha nyambiku kwaka Bambo Chapanga, Chapanga waku ng'o. 22Wikulaje chinyama cha ntundu ghonihoghu mkati ja muchi waku. Mundu jokapi joajetakaliwi palongi jaka Chapanga, na jola jwangakujetakalewa palongi jaka Chapanga bhaweza kula chinyama chenihechi, ngati mobhakulila inyama ja holoku au inyama ja mbabhala. 23Nambu ngawikula mwahi waki ng'o, ujitalaje paluhombi ngati machi.