Kombukombu la Tolati 16

Lichobha la Pasaka

Kubhoka 12:1-20

1“Ntendaje uwangalalu wa Pasaka mu mwehi wa Abibu, kwa kuntopela Bambo Chapanga, Chapanga winu, maghambu mu mwehi ghonihoghu wa Abibu, Bambo Chapanga, Chapanga winu, akumbohiki ku Misili ikilu. 2Mwibhohaje nyambiku ja Pasaka kuhuma mu lipogha la mambeleli au la ng'ombi, kwa kuntopela Bambo Chapanga, Chapanga winu, pandu pala ambapu Bambo Chapanga anaapahaghulaje kubha matamu gha lihina laki. 3Ngamwikula inyama jeniheji papamu na mabumunda ghaghajeghaliki amila. Nambu kwa machobha saba anamkulakaje mabumunda ghangakujeghaleka amila, yani mabumunda gha kuling'aha, maghambu mkabhokiki ku Misili kwa manyata, nahuli machobha ghokapi gha matamu ghinu, mkombukaje lichobha pamkabhokiki ku Misili. 4Kwa chikahi cha machobha saba mundu jokapi ngayibheka amila munyumba jaki mu inchi jinu jokapi, wala inyama jokapi jela ja nyambiku jemwichinjaje pakamihi ja lichobha la kutumbula, ngajihighalila mbaka lukela.

5“Ngamwibhoha nyambiku ja Pasaka mu muchi wokapi ghola ghoanaampekyaje Bambo Chapanga, Chapanga winu, 6nambu pandu pala paanahaghulaje Bambo Chapanga, Chapanga winu, kubheka matamu gha lihina laki. Panihapa nde paimpalika mwehapa kubhoha nyambiku ja Pasaka pakamihe, lyobha palijibhila, kwa chikahi ngati chemwabhokiki ku Misili. 7Ntelakaje inyama jeniheji na kula pandu pala payihaghulaje Bambo Chapanga, Chapanga winu, na lukela mwikelabhukaje ku mahema ghinu. 8Kwa machobha sita mwikulaje mabumunda ghangakujeghaleka amila, na mu lichobha la saba mkubhaje na uhimanganu uhuhu wa kunjojabhela Bambo Chapanga, Chapanga winu, na ngamwihenga lihengu mu lichobha leniheli.

Uwangalalu wa Mahunu

Kubhoka 34:22; Bhalawi 23:15-21

9“Mbalangaje majuma saba, kutumbula pamtola chisenga na kutumbula kuhuna mahunu. 10Bhela, muhekalyaje Uwangalalu wa Majuma kwa kuntopela Bambo Chapanga, Chapanga winu, kwa kubhoha nhupu ya kupala mabhete, kubhokana na Bambo Chapanga, Chapanga winu, moampengalile. 11Mwihekalyaje palongi jaka Bambo Chapanga, Chapanga winu, mwehapa papamu na bhana bhinu bha chikambaku, akakamwali bhinu, bhatumika bhinu bha chikambaku na bha chimbomba, Bhalawi, bhagheni, bhakebha, na akambomba bhabhaweliwi na bhalomi bhabhu bhabhatama papamu na mwehapa. Mtendaje bhenibhela pandu pala payihaghulaje Bambo Chapanga, Chapanga winu, kubheka matamu gha lihina laki. 12Mkombukaje kubha mkabhili bhatumwa ku Misili hoku, bhela mkamulaje amuli ayeyi na kuijengalela.

Uwangalalu wa Indamba

Bhalawi 23:33-43

13“Mtendaje Uwangalalu wa Indamba kwa machobha saba ananjomwili kubhongana mahunu ghinu, na ananjomwili kuminya divai. 14Mwihekalyaje uwangalalu ghonihoghu mwehapa papamu na bhana bhinu bha chikambaku, akakamwali bhinu, bhatumika bhinu bha chikambaku na bha chimbomba, Bhalawi, bhagheni, bhakebha, na akambomba bhabhaweliwi na bhalomi bhabhu, bhabhatama mu michi jinu. 15Kwa machobha saba muntendilaje uwangalalu Bambo Chapanga, Chapanga winu, pandu pala payihaghulaje Bambo Chapanga. Kwa kubha Bambo Chapanga, Chapanga winu, anaampengalyaje mu mahunu ghinu ghokapi na mu mahengu ghinu ghokapi, nanamu anamuhekalyaje nakanope.

16“Akanalomi bhokapi bha inchi jinu ibhapalika bhahikaje palongi jaka Bambo Chapanga, Chapanga winu, mala patatu kwa kila chaka, pandu pala payihaghulaje: Chikahi cha Uwangalalu wa Mabumunda Ghangakujeghaleka Amila, Uwangalalu wa Majuma, na Uwangalalu wa Indamba. Wala ngabhihika palongi jaka Bambo Chapanga mabhoku matopu. 17Kila jumu winu impalika aletaje nhupu yaki kulengana na Bambo Chapanga, Chapanga winu, moampengalile mu chaka chenihechi.

Bhatemula

18“Mubhaghulaje bhatemula na ihongozi bhangi kuhuma mu makabila ghinu mu kila muchi ambau Bambo Chapanga, Chapanga winu, anaampekyaje, nabhombi anabhatemulaje bhandu kwa kulengana. 19Mtemulaje ngati moipalakila, wala ngamwilingalila sula jaka mundu. Ngamwijetakela kutola ngolukelu, maghambu ngolukelu jichuchuha mihu gha bhala bhabhabhili na mbulau, na kung'anambula malobhi ghaka mundu wambone. 20Mubhahengilaje bhandu mambu ghala ghaghapalika pela, nahuli mpataje kutama na kujitola inchi jempekewa na Bambo Chapanga, Chapanga winu.

21“Ngamwijemeka nguzu jokapi jela jaka kichapanga wa upuhe Ashela pambipi na pandu pa kubhokeha nyambiku pamunchengile Bambo Chapanga, Chapanga winu. 22Wala ngamwijemeka liganga la kujojabhela, maghambu Bambo Chapanga, Chapanga winu, ayihakalila hindu ayeyi.