Kombukombu la Tolati 19

Michi ja kukembalela

Hesabu 35:9-34; Yoshua 20:1-9

1“Chikahi Bambo Chapanga, Chapanga winu, payikubhaje abhayoningi bhandu ambabhu inchi jabhu ampekeha mwehapa, chikahi pamwikubhaje mubhatopwili na kutama mu michi jabhu na munyumba ghabhu, 2panihapa ntengaje michi jitatu jejibhili pachilanda ja inchi kwa ndandi jinu, mu inchi jeampekeha Bambo Chapanga, Chapanga winu, kujitola kubha jinu. 3Mujighabhaje inchi jeniheji jempekewa na Bambo Chapanga, Chapanga winu, mu pandu patatu. Bhela mwihaghulaje muchi ghumu wa kukembalela mu kila pandu patatu hapa. Mwilenganakyaje indela hinyahi nahuli bhandu bhawezaje kukembalela ku michi jeniheji kwa kupepuka nakanope. Nahuli ngati mundu anaankomiki njaki awezaje kutilila ku ghumu wa michi jeniheji na kubha lukwale. 4Ngati mundu jokapi jola anaankomiki njaki panga kuholakela, najombi ngacheakabhili adui waki, aweza kutilila mu ghumu wa michi jeniheji, na kughakengalela matamu ghaki. 5Kwa ulenganesu, mundu aweza kujenda muchitengu na njaki kuheketa mikongu, najombi paayongoloha libhaghu kuheketa nkongu, libhaghu liweza kuholapoka kuhuma mu mpini waki, na kundapula njaki na kunkoma. Mundu jonihoju aweza kutilila mu ghumu wa michi jeniheji, na kughakengalela matamu ghaki. 6Nambu ngati anakubhili na muchi ghumu pela, na utali wa muchi hoghu nde ukolongwa nakanope, mundu joapala kulepa kisasi hoju aweza kunjengalela kwa inyela ngolongwa, na kunkoma mundu joakuntendiki njaki kupotela hoju, hata ngati ngacheikampaliki kukomakeka, maghambu bhandu bhabheli habha ngachebhakabhili maadui kutumbu pakutumbula. 7Kwa ndandi ajeji, nundaghalakila mwehapa kutenga michi jitatu ja kukembalela kwa ndandi jinu.

8“Ngati Bambo Chapanga, Chapanga winu, anaajonjukili malindakanilu gha inchi jinu, ngati moakalaghile kwa kulapa kwa akahokolu bhinu na kumpekeha inchi jokapi jeakalaghile kubhapekeha akahokolu bhinu, 9nanamu ananjengalili wichu na kukamula amuli ayeyi yokapi yenundaghalakila lalenu, na kuitenda, kwa kumpala Bambo Chapanga, Chapanga winu, na kujenda machobha ghokapi mu indela yaki, bhela, panihapa ntengaje michi jengi jitatu nakanope. 10Mtendaje bhenibhela nahuli mwahi wangakubha na hatia ngawijitika mu inchi jinu, ambaju Bambo Chapanga, Chapanga winu, ampekeha kubha jinu, nahuli ngamwikubha na lihoku la kujitila mwahi.

11“Nambu anangati mundu anhakalila njaki, anaanjobhalili, kundapula na kunkoma, najombi anaakembalili mu ghumu wa michi jeniheji, 12panihapa bhazee bha muchi waki anabhatumaje bhatenga kwaki, nahuli bhundetaje kuhuma ku muchi ghonighola, na kumpekeha kwaka mundu joalepa kisasi cha kujitila mwahi, na kunkoma. 13Lihu laku ngalambonela chiha, nambu ikupalika ubhohaje mwahi waka mundu jwangakubha na hatia mu Izilaeli, nahuli upataje kutama kwa lukwali.

Malindakanilu gha mwande

14“Ngawijonjukela alama ja malindakanilu ghaka njaku, ambaghu ghakabhekakiki na bhandu bha mwande mu upwelelu waku ghoujopalela mu inchi ambaju Bambo Chapanga, Chapanga waku, akupekeha kujitola.

Malaghalakilu kwa ndandi ja bhalandilu

15“Mlandilu jumu ngacheajaghanila kuntenda mundu joahokiye atemuliwaje, wala kunjeghela mu lihakau lokapi lela leaweza kulitenda. Ipalika litakilu lokapi lela litemuliwaje kwa ulandilu wa bhandu bhabheli au bhatatu. 16Ngati mlandilu joabhi na ndandi ja kunhokela njaki anaajemiki kuntakila mundu kwa kuhenga mambu ghangakupalika, 17bhela bhandu bhabheli bhabhahusika na matakilu ghanihagha ibhapalika bhajendaje pandu pa kunjojabhela Bambo Chapanga, palongi ja bhapenganyambiku, na palongi ja bhatemula bhabhikubhaje palihengu mu machobha ghanihagha. 18Bhatemula ibhapalika kughachunguza matakilu ghanihagha kwa mkati nakanope, ngati mlandilu anaabhonakini kubha nde mpuhe, najombi abhohiki ulandilu wa upuhe panani jaka Muizilaeli njaki, 19panihapa unhengilaje ngati moapalilaje kunhengela ndongu waki Muizilaeli. Bhenibhela nde momwibhokihaje uhakau pachilanda jinu. 20Bhela bhandu bhabhihighalyaje anabhajowanaje na kujoghopa, na uhakau ngati ghonihoghu ngawihengakeki kabhete pachilanda jinu ng'o. 21Ngawikubha na lihu la chiha kwaka mundu wa ntundu ghonihoghu. Malepu ghaki anaghakubhaje womi kwa womi, lihu kwa lihu, linu kwa linu, chiwoku kwa chiwoku, na chigholu kwa chigholu.