Kombukombu la Tolati 20

Malaghalakilu kubhokana na ngondo

1“Pamwijendaje kungondo kukomana na maadui bhinu, na kubhona falasi, magali gha ngondo na lipogha likolongwa la manjolinjoli kupeta linu, ngamubhajoghopa, maghambu Bambo Chapanga, Chapanga winu, joambohiki ku Misili, anaakubhaje papamu na mwehapa. 2Chikahi pachiheghalyaje mwehapa kujenda kungondo, mpenganyambiku ahikaje palongi na kulongela na manjolinjoli, 3akapwaghaje, ‘Mwenga manjolinjoli bha Izilaeli, nyowanyaje nepani! Lalenu njenda kungondo kukomana na maadui bhinu, ngamwipotela mitima jinu, wala ngamwijoghopa, ngabhunjoghoha, wala ngamwijeghaleka choghoi palongi jabhu. 4Maghambu Bambo Chapanga, Chapanga winu, nde joajenda papamu na mwehapa kunkomanela kwa maadui bhinu, nahuli kunkengalela mwehapa.’

5“Bhela ihongozi anabhapwaghila manjolinjoli bha Izilaeli, ‘Bho, kubhi le na mundu joachengiki nyumba jangakubhekakeka palongi jaka Chapanga? Jonihoju akelabhukaje kunyumba jaki, ngayihika kupotela kungondo na mundu jongi kujibheka nyumba heji palongi jaka Chapanga. 6Bho, kubhi le na mundu jokapi jola joalemiki ngonda wa mizabibu, na wala ngacheatumbwile kughatumila mapambiku ghaki? Jonihoju abhujaje kunyumba jaki, ngayihika kupotela kungondo, na mundu jongi kuhekalela mapambiku ghaki. 7Bho, kubhi le na mwanalomi jokapi jola pambani joabhohiki hweku na abhi pambipi kutoghola? Jonihoju na abhujaje kunyumba jaki, ngayihika kupotela kungondo, na mbomba hoju kutoghuleka na mwanalomi jongi.’

8“Bhela ihongozi bhajendalyaje kubhapwaghi bhandu, ‘Bho, kubhi le na mundu pambani joajoghopa na joapotili mtima? Jonihoju na abhujaje kunyumba jaki, nahuli bhalongu bhaki nabhombi ngabhipotela mtima ngati jombi.’ 9Chikahi ihongozi pabhijomulaje kulongela na bhandu, ipalika bhahaghulaje ihongozi bha kubhalongoha manjolinjoli.

10“Chikahi pamwiheghalyaje kuulapula muchi, kutumbula mubhalalukya hoti bhandu bha muchi ghonihoghu, na kubhapekeha mbekenyu ja kukweha mabhoku. 11Ngati bhenei bha muchi ghonihoghu anabhajetakili kunhoghulela milyangu ja michi jabhu kwa lukwale, panihapa bhandu bhokapi bhabhabhi monihomu anabhuntumakya mwehapa kwa kuhenga lihengu lelinonwipe. 12Nambu ngati anabhakaniki kuhenga majonganu gha lukwali na mwehapa, na kukomana ngondo na mwehapa, bhela manjolinjoli ghinu ghauyongalutaje muchi ghonihoghu kwa ngondo. 13Chikahi Bambo Chapanga, Chapanga winu, anaanjangatili kubhaweza handu bha muchi ghonihoghu, mubhakomaje kwa lipanga akanalomi bhokapi bhabhabhi monihomu. 14Nambu akambomba na bhana, hinyama ya muchi, na hindu yokapi yeibhi mkati ja muchi, muweza kuitola kubha ngati mateka kwa ndandi jinu. Nanamu muweza kuitumila yentoliki mateka heyi ambayu Bambo Chapanga, Chapanga winu, ampekihi kuhuma kwa maadui bhinu. 15Bhenibhela nde moimpalakila kuhenga kwa michi jokapi jejibhili kutali na mwehapa, ambaju ngachejitawaliwa na bhandu bha inchi ya pambipe.

16“Nambu mu michi ja inchi ayeyi yeakupekeha Bambo Chapanga, Chapanga waku, kubha jaku, ngawachileka kubha chomi chindu chokapi chela chekipomola. 17Mubhayonangaje nakanopi bhandu bhokapi bha inchi ayeyi, yani, Bhahiti, Bhaamoli, Bhakanaani, Bhapelizi, Bhahivi na Bhayebusi, ngati Bambo Chapanga, Chapanga winu, moandaghalakile. 18Nanga bhela, anabhumbolaje kujengalela mambu ghokapi gha mahakalilu ghabhahenga gha kuijojabhela ichapanga yabhu, nanamu anamkubhaje munhengili mahoku Bambo Chapanga, Chapanga winu.

19“Chikahi pamwikubhaje muyongolota muchi kwa chikahi chilachu, koni mkakomana ngondo nahuli kuutola kwa makili, ngamwiyonanga mikongu jaki kwa kujiheketa kwa mabhaghu, maghambu anamuwezaje kula mapambiku ghaki. Bhela ngamujiheketa. Bho, mikongu heji ja mumighonda le nde bhandu mbaka mujilapulaje? 20Hata bhela, muweza kujiheketa mikongu ambaju nga ja mapambiku, na kujitumila kwa kuchenga ngazi ya kujingalila mu muchi, mbaka muchi ghoubhili mu ngondo na mwehapa pawihabhukaje.