Kombukombu la Tolati 21

Shelia kubhokana na kukoma

1“Ngati mundu anahimaniwi atehi kukomakeka, najombi aghoni kwitengu mu inchi ambaju Bambo Chapanga, Chapanga winu, ampekeha mjitamaje, nanamu nangakummanya jola joankomike, 2ihongozi bhinu na bhatemula bhinu bhabhokaje na kupema utali kuhuma ntuhi hoghu paughonile mbaka pa michi ja pambipi. 3Bhela, ihongozi bha muchi ghola ghoubhi pambipi na ntuhi ghola, bhatolaje litoli ambalu ngachelitumiwi kuhenga lihengu lokapi lela, wala langakukongakeka ngoje, 4na ihongozi bha muchi hoghu bhalitolaje litoli heli na kujenda nalu mbaka kulibondi ambalu ngachelilabhali kulemakeka au kupandwa mahunu, na papabhili na machi gha chemuchemu jejinyila. Panihapa ihongozi bhinu bhatunyulaje hingu ja litoli heli kulibondi hoku. 5Nabhombi bhapenganyambiku bha lukolu lwa Bhalawi, bhaheghalyaje pambipi, maghambu Bambo Chapanga, Chapanga winu, anhawili mwehapa kutumika na kubhoha mbengalelu kwa lihina laka Bambo Chapanga, na kutemula matakilu ghokapi gha kulochana na kupotikana. 6Bhela ihongozi bhokapi bha muchi ghoubhi pambipi na mundu hoju joakomakike, bhachambaje machi mabhoku ghabhu panani ja litoli heli lelitunyuliwi hingu jaki ku libondi hoku, 7na bhatangazaje, ‘Mabhoku ghitu ngacheghunkomiki mundu ajoju, wala mihu ghitu ngacheghaweni lijambu heli palakabhi lihengakeka. 8Wenga wa Bambo Chapanga, ubhalekakyaje bhandu bhaku Izilaeli, bhaubhakombwile kuhuma ku Misili, wala ngaubhabhalangila bhandu bhaku mahakau gha mwahi waka mundu jwangakubha na mahakau. Panihapa mwahi ghoujitiki hoghu anaukubhaje uhengakiwi ujonganesu.’ 9Bhela anamkubhaje mligholwili mabhete kubhokana na mahakau ghanihagha gha kunkoma mundu jwangakubha na mahoku, maghambu mlihengiki lijambu lela lelipalika palongi ja mihu ghaka Bambo Chapanga.

Kuntoghola mbomba mateka

10“Ngati anampiti kungondo kukomana na maadui bhinu, najombi Bambo Chapanga, Chapanga winu, anaantendiki kubhaweza maadui bhinu, na kubhatola kwa makili, 11ngati pachilanda ja mateka bhanihabha anaumbweni mbomba mnyahi, anauntokulili na kupala kuntoghola kubha nhwanu waku, untoghulaje. 12Bhela undetaje munyumba jaku, ummoghaje majunju ghaki na kunheketa yobhu yaki, 13na ang'anambulaje ingobhu yaki yeakawati chikahi paakabhi bhuntola kwa makili. Atamaje munyumba jaku na kuombuleza panani jaka tati waki na mabhu waki kwa mwehi ghumu, panihapa uweza kuntoghola na kubha ndomi waki, najombi anaakubhaje nhwanu waku. 14Nambu ngati ngawijendaleli kunyambakika naku, undekaje ajendaje pandu pokapi paapala. Ngawandombesa wala kuntendela ngati mtumwa ng'o, maghambu anaukubhaje unhekatili utopelu waki.

Shelia panani jaka mbelakeka wa kutumbula

15“Ngati mwanalomi anaabhili na mitala ja akabhahanu bhabheli, najombi ampala mbomba jumu, na jongi ngacheampala, na ngati bhokapi bhumbelakili bhana bha chikambaku, nambu mwana wa chikambaku wa kutumbula nde waka mbomba jola jwangakumpala, 16chikahi cha kubhoha upwelelu kwa bhana bhaki anaachihikike, ngayibhoha haki jaka mbelakeka wa kutumbula kwaka mwana waka mbomba jola joampala kwa upendeleu ng'o, nambu impalika ampekyaje mwana jola waka mabhu jwangakumpala, ambaju nde mbelakeka wa kutumbula. 17Ikupalika unjetakyaje mwana wa kutumbula waka mbomba jwangakumpala, kwa kumpekeha mafungu ghabheli gha hindu yokapi yeubhi nayu, maghambu jonihoju nde mwana wa utumbulilu wa makili ghaki, na haki jaka mbelakeka wa kutumbula nde jaki jombi.

Mwana jwangakutii

18“Ngati mundu anaabhili na mwana joabhi na ing'omu na jwangakutii sauti jaka tati waki, wala sauti jaka mabhu waki, nabhombi pabhundapula ngacheabhajowanela, 19panihapa tati waki na mabhu waki bhunkamulaje, na kumpeleka kuntakila kwa ihongozi bha muchi waki, pundyangu ukolongwa wa muchi ghonihoghu. 20Bhabhapwaghila ihongozi bha muchi waki, ‘Mwana witu jonjoni abhi na ing'omu, na ngacheatii, wala ngacheajowanela sauti jitu. Jombi nde ndohu na ndobhela uwembi.’ 21Bhela akanalomi bha mu muchi waki bhundapulaje kwa maganga mbaka apotilaje. Bhenibhela nde momwibhokihaje uhakau pachilanda jinu. Kila mundu mu Izilaeli anaajowanaje lijambu leniheli na kujoghopa.

Shelia patalipatali

22“Ngati mundu anahengiki lihoku lelumpalika kukomakeka, najombi anaakomakike, na kujijenjeha hyegha jaki panani ja nkongu, 23ngawajileka hyegha jaki panani ja nkongu ikilu jokapi ng'o. Impalika kujitagha hyegha jaki lichobha lela lela, maghambu kila mundu joanyongakiki panani ja nkongu abhi pahi ja masolu ghaka Chapanga. Ngamwajijeghela uhakau inchi jempekewa na Bambo Chapanga, Chapanga winu, kubha upwelelu winu.