Kombukombu la Tolati 22

1“Ngati anaujiweni ng'ombi jaka Muizilaeli njaku au limbeleli laki litenda kuhobha, ngawajileka, nambu ujikelabhuhaje kwaka mweni jaki. 2Nambu anangati nyumba jaka ndongu waku hoju jibhi kutali na wehapa, au ngati ngacheujimanyi mweni jaki, utolaje na kuchibheka chinyama hechi kunyumba jaku mbaka mweni chaki ahikaje kuchilonda, panihapa nde umpekyaje. 3Uhengaje bhela bhela ngati anaulihimanili liponda laki au ingobhu jaki, au chindu chokapi chela cheahoiki ndongu waku. Ngawalihiya kubha ngati ngacheukiwene.

4“Ngati anauliweni liponda laka ndongu waku, au ng'ombi jaki jihawiki paindela, ngawikotoka kulijangatila, ulijangatyaje kujema kabhete.

5“Mbomba ngaiwata ingobhu ya chikambaku, wala nkambaku ngayiwata ingobhu ya chimbomba, maghambu kila mundu joahenga mambu ghanihagha nde lihakalilu kwaka Bambo Chapanga, Chapanga winu.

6“Ngati anauweni unhuwi wa chijuni punkeghi ja indela, chikubhi munani ja nkongu au pahi, na chijuni hechi anachijobhatili bhana bhaki au mahombi, ngawachitola chijuni hechi papamu na bhana bhaki. 7Ikupalika uchilekaje chijuni hechi chijendaje, nambu bhana bhaki uweza kubhatola, nahuli mambu ghaku ghapataje kujenda wichu, na kughatenda machobha ghaku kubha ghamaheli.

8“Chikahi pauchenga nyumba jahenu, ulenganakyaje lumatu munkeghi ja ugholu, nahuli ngawaliletela lihoku la kukoma panani ja nyumba jaku, ngati mundu jokapi jola anaahawiki na kupotela.

9“Ngawipanda ntundu ubheli wa imbeju mu ngonda waku wa mizabibu, anauhengiki bhenibhela, nga mahunu pela ghaupandiki ghaghikubhaje mahakau, nambu hata mapambiku ghaupandiki mu ngonda wa mizabibu bhelabhela.

10“Ngawilema ngonda kwa kutumila ng'ombi na liponda yeikongakiki lingolingoli kwa papamu.

11“Ngawiwata ingobhu jejihangaghini kwa mangoma gha limbeleli na ingobhu jinyahi jihuhu.

12“Ulenganakyaje mahundwa gha uzi mu kona nchechi ya lijoho laku.

Shelia panani jaka ndomi na nhwanu waki

13“Ngati mwanalomi anaantowili mbomba, na anaaghonili naku kihyegha, na panakatai anaapaliki kundeka, 14kwa kunkopunganela na kundoha lihina lihakau, akapwaghaje: Nakuntowili mbomba ajoju, nambu panakaghonili naku kihyegha ngachenaweni ulandilu wokapi ghola ghoulangiha kubha jombi nde kamwali lenda.

15“Bhela tati na mabhu bhaka mwali hoju anabhaletaje ulandilu ghoulangiha kubha chakaka akabhi bikila kwa ihongozi bha muchi pundyangu ukolongwa wa muchi. 16Tati waka mwali hoju abhapwaghilaje ihongozi, ‘Nakuntoghukili mwali wangu kwaka mwanalomi ajoju kubha nhwanu waki, nambu sajenu ngacheampala.’ 17Ndingalyaje, ankopunganili akapwaghaje, ‘Ngachenaweni ulandilu ghoulangiha kubha akabhi kamwali lenda. Nambu pambani pabhi na ulandilu ghoulangi kubha mwali wangu ngachealabhali kughone na mwanalomi. Bhela bhabheleka bhaki bhahatambulaje ingobhu yela ya ulandilu hoghu palongi ja ihongozi bha muchi.’ 18Panihapa ihongozi bha muchi bhuntolaje mwanalomi hoju na kundapu iboko. 19Bhelabhela bhundepishaje ipandi mia jimu ya madini gha feza na kubhapekeha bhabheleka bhaka mwali hoju, maghambu mwanalomi hoju ampekihi mwali lenda wa Izilaeli lihina lihakau. Na mbomba hoju anaajendalyaje kubha nhwanu waki, ngacheimpalika kundembela baluwa ja kundeka machobha ghokapi gha matamu ghaki ng'o.

20“Nambu anangati litakilu heli nde la chakaka, na kubha njeta ulandilu ghoupatakini kulangiha kubha mwali hoju akabhili mwali lenda, 21mwali hoju anaaletakikaje pundyangu wa nyumba jaka tati waki, na bhandu bha muchi waki anabhundapulaje kwa maganga mbaka apotilaje. Maghambu ahengiki lijambu la iyoni mu Izilaeli kwa kuhenga ukemi koni akabya munyumba jaka tati waki. Bhenibhela nde momwibhokihaje uhakau pachilanda jinu.

22“Ngati mwanalomi anaahimaniwi ahenga ugoni na nhwanu waka mundu jongi, ibhapalika bhokapi bhabheli bhakomakikaje, mwanalomi joaghoni na mbomba hoju, papamu na mbomba hoju. Bhenibhela nde momwibhokihaje uhakau pachilanda jinu.

23“Ngati mwanalomi anaanhimanili mwali lenda joabhowakiki nhweku kumbwane, na kughonela naku kihyegha, 24ikupalika ubhatolaje bhokapi bhabheli mbaka pundyangu ukolongwa wa muchi na kubhalapula kwa maganga mbaka bhapotilaje. Mwali hoju anaakomakikaje maghambu ngacheakajamalili kwa kulobha ujangatilu hata koni akabhili kumbwane, na mwanalomi hoju anaakomakikaje maghambu antendili uhakau nhwanu waka mundu jongi. Bhenibhela nde momwibhokihaje uhakau pachilanda jinu.

25“Nambu ngati mwanalomi anaahimangini na mwali joabhowakiki nhweku kungonda, na kutumila makili kunjingalila kihyegha, mwanalomi joahengiki bhenibhela kanjika jaki pela nde joanakomakikaje. 26Nambu ngawantendela mwali hoju lijambu lokapi lela, maghambu ngacheabhili na lihoku lelumpalika kukomakeka. Kwa kubha lijambu leniheli lilengana na lela laka mundu kundapula mundu jongi na kunkoma kwa nahuli. 27Maghambu mwanalomi hoju akunhimanili mwali hoju kumighonda, na hata koni mwali joabhowakiki nhweku hoju akatehi kujamalila kwa kujopa ujangatilu, nambu ngachepakabhi na mundu wa kunkengalela.

28“Ngati mwanalomi anahimangini na mwali lenda jwangakubhowakeka nhweku, anaankamwili na kughone naku kihyegha kwa makili, nabhombi anabhakamuliki, 29mwanalomi hoju impalika andepaje tati waka mwali hoju ipandi hamsini ya madini gha feza. Bhelabhela impalika antoghulaje mwali hoju na kubha nhwanu waki, maghambu anhengili lijambu lihakau. Ngacheimpalika kundembela baluwa ja kundeka machobha ghokapi gha matamu ghaki ng'o.

30“Mwanalomi jokapi jola ngacheimpalika kuntoghola nhwanu waka tati waki, wala kughonela naku kihyegha nhwanu waka tati waki ng'o.