Kombukombu la Tolati 23

Kutengakeka na bhandu bhaka Bambo Chapanga

1“Mwanalomi jokapi jola joahekitwi ntondola, au joahekitwi utopu waki, mundu jonihoju ngayibhalangika mu uhimanganu wa bhandu bhaka Bambo Chapanga.

2“Mundu jokapi jola joabhelakiki mu ndowa jangakujetakalewa, ngayibhalangika mu uhimanganu wa bhandu bhaka Bambo Chapanga. Wala bhabhelakeka bhaka mundu jonihoju hata chibheleku cha komi, ngayibhalangika mu uhimanganu wa bhandu bhaka Bambo Chapanga.

3“Mundu jokapi jola wa likabila la Bhaamoni au Bhamoabu, ngayibhalangika mu uhimanganu wa bhandu bhaka Bambo Chapanga. Wala bhabhelakeka bhabhu hata chibheleku cha komi ngayibhalangika mu uhimanganu wa bhandu bhaka Bambo Chapanga. 4Maghambu chikahi pamukabhi muhuma ku Misili ngachebhakahikiki kunjopalela koni bhakabya na chilebhi na machi, na kwa kubha bhakamuajili Balaamu mwana waka Beoli kuhuma ku Petoli jejibhili ku Alamu jejibhili ku Mesopotamia, nahuli kumpekeha masolu mwehapa. 5Nambu Bambo Chapanga, Chapanga winu, ngacheakajetakili kunjowanela Balaamu, nambu akang'anambwili masolu na kubha mbengalelu, maghambu Bambo Chapanga, Chapanga winu, ampala mwehapa. 6Bhela ngamwilonda majonganu gha lukwali na bhandu bhanihabha mu matamu ghinu ghokapi mileli.

7“Nambu ngawamuhakalila Muedomu, maghambu jombi nde ndongu waku. Ngawamuhakalila Mmisili, maghambu ukabhili ungeni mu inchi jaki. 8Bhabhelakeka bhabhu, kutumbula chibheleku cha katatu bhaweza kujingila mu uhimanganu wa bhandu bhaka Bambo Chapanga.

Kulitenda likambi kubha linyahi

9“Pawibhokaje kujenda kukomana ngondo na maadui bhaku, na kuchenga likambi, ulijepaje na kila chindu chihakau. 10Ngati mundu anahakihi kwa kupitwa na imbeju ya chikambaku ikilu, impalika apitaje kunja ja likambi na kutama konihoku, wala ngayijingila mulikambi. 11Nambu pakamihi anajiheghalile, ajogha machi, na lyobha analijibhile anaajingalaje kabheti mulikambi.

12“Impalika ntengaje pandu kunja ja likambi, ambapu muweza kujenda kulijangatila. 13Pachilanda ja hindu hinu impalika mkubhaje na kaghela kangongwa, nanamu anantumilaje kukemba libhomba, chikahi pamulijangatila na kuhyelalela chela chechipitike. 14Maghambu Bambo Chapanga, Chapanga winu, ajenda mu likambi linu nahuli kundenda mwehapa na kubhatenda maadui bhinu kulepalela palongi jinu. Likambi linu lipalika likubhaje lihuhu, nahuli ngayibhona chindu chokapi chela chechibhi chihakau pachilanda jinu, nanga bhela aweza kung'anambuka na kundeka.

Shelia patalipatali

15“Ngati mtumwa anaakembalili kwaku wehapa nahuli kundenda, ngawankelabhuha kwaka bambo waki. 16Impalika mundekaje atamaje pachilanda jinu, pandu pokapi paapala jombi, na mu muchi wokapi ghola ghoachaghula pamihu jaki. Ngamwambonela.

17“Ngapikubha na nkemi pachilanda ja akakamwali bha Izilaeli, wala mwanalomi hanisi pachilanda ja bhandu bha Izilaeli. 18Bhelabhela ngawileta mbija yeipatakini kwa kuhenga ukemi, ikubhi mbomba au mwanalomi mu Nyumba jaka Bambo Chapanga, Chapanga winu, kwa ndandi ja nazili jokapi jela, maghambu ghokapi ghabheli aghagha nde mahakalilu kwaka Bambo Chapanga, Chapanga winu.

19“Ngawanjahika chindu ndongu waku Muizilaeli kwa kupata nyonjeka, ikubhi nde nyonjeka ja mbija, nyonjeka ja chilebhi, au chindu chokapi chela cheuweza kupata nyonjeka. 20Uweza kujopa nyonjeka paunkopesha ngeni, nambu nga kwaka ndongu waku Muizilaeli, nahuli Bambo Chapanga, Chapanga waku, apataje kukupengalela mu mambu ghokapi ghaubheka chiwoku chaku, mu inchi jeujingila kujitama.

21“Ngati anaubhekiki nazili kwaka Bambo Chapanga, Chapanga waku, ikupalika ngawikabhakila kujitimiza, maghambu Bambo Chapanga, Chapanga waku, anaakudayaje, nanau anaubhalangikaje kubha na lihoku. 22Nambu anaulihibhalili na kukotoka kubheka nazili, ngalikubhi lihoku kwaku. 23Nambu chindu chokapi chewilongilaje kwa ndomu waku, ikupalika utimizaje, maghambu ukabhekiki nazili ja nhupu waku kwa kupala wamwete palongi jaka Bambo Chapanga, Chapanga waku, kwa ndomu waku wamwete.

24“Ngati anaujingili mu ngonda wa mizabibu waka njaku, uweza kula zabibu na kutupila kwa ntundu moupalila, nambu ngawitongola na kubheka mu chitonga chaku ng'o. 25Ngati anaujingili mu ngonda wa mahunu waka njaku, uweza kukwachula mapukutu kwa chiwoku chaku na kula, nambu ngawitola chisenga na kuhuna mahunu ghaghajemiki ghaka njaku.