Kombukombu la Tolati 24

Baluwa ja kulekana na kutoghulana kabhete

1“Ngati mwanalomi anaantowili mbomba, na palongi anaanhakalili kwa kubha aweni lijambu lihakau kwaki, bhela, mwanalomi hoju apalika andembila baluwa ja kundeka, ampekyaje na kumboha panyumba jaki. 2Ngati anaabhokiki kujenda kunyumba jaki, na kutoghuleka na mwanalomi jongi, 3anangati ndomi waki wa kabheli anaanhakalili na kundembela baluwa ja kundeka, anaampekihi na kumboha kuhuma panyumba jaki, au anaapotili, 4bhela ndomi waki wa kutumbula, jola joakumpekihi baluwa ja kundeka, ngacheimpalika kabheti kuntoghola mbomba hoju kubha nhwanu waki, maghambu ajomwili kujeghaleka uhakau. Ghanihagha anaghakubhaje mahakalilu palongi jaka Bambo Chapanga. Bhela ngawileta lihoku panani ja inchi jeakupekihe Bambo Chapanga, Chapanga waku, kujipwelela.

Shelia patalipatali

5“Ngati mwanalomi anaatowili henu kateki, ngacheimpalika kujenda kungondo, wala ngayipekewa lihengu lokapi lela, apalika atamaje kwa kulijeka kwa chaka chimu, nahuli atamaje panyumba na kuhekalela na nhwanu waki joantowile.

6“Mundu jokapi jola ngayitola liganga la kuyaghila, lela la panani au la pahi, na kubheka poni, maghambu kwa kuhenga bhenibhela nde ngati kughatola matamu ghaka mundu.

7“Ngati mundu anaabhonakini anjibhila Muizilaeli njaki, na kuntenda ngati mtumwa waki au kundombesa kubha mtumwa, mwihi hoju impalika akomakikaje. Bhenibhela nde momwibhokihaje uhakau pachilanda jinu.

8“Ngati anapapitalili chitamu cha malohi, impalika kulilingalila namaa kwa kujengalela malaghalakilu gha bhapenganyambiku Bhalawi. Impalika kughajengalela wichu mambu ghala ngati monabhalaghalaki bhombi. 9Nkombukaje lijambu lela Bambo Chapanga, Chapanga winu, leakuntendili Miliamu ku indela kola chikahi mwehapa pamukabhi muhuma ku Misili.

10“Chikahi paunjahika njaku chindu chokapi chela, ngawijingila munyumba jaki na kuchitola chindu chela cheachibheka kubha poni. 11Ulendalyaje kunja, na undekaje mundu jola jounjahiki akuletilaje mweni chindu hechi cha poni. 12Anangati mundu jonihoju nde kahochu, ngawijenda kughonela koni ukabya na poni heji. 13Ikupalika ukelabhuhaje ingobhu jaki kila lichobha mangani ja lyobha kujibhila, nahuli apataje kulihyeka, na kukulobhela mbengalelu. Kuhenga bhenibhela nde lijambu lamboni kwaku palongi jaka Bambo Chapanga, Chapanga waku.

14“Ngawambonela mundu kahochu au mtumika jounhajile joapalika kujangatiwa, ikubhi nde ndongu waku Muizilaeli au ngeni joatama mu ghumu wa michi jinu. 15Undepaje malepu ghaki kila lichobha mangani ja lyobha kujibhila, maghambu jombi nde kahochu na mtima waki ughategamela malepu ghanihagha. Nanga bhela, aweza kundelela Bambo Chapanga, panani jaku, nanau uweza kubha na mahoku.

16“Akatati ngabhikomakeka kwa ndandi ja mahakau ghabhahengiki bhana bhabhu, wala bhana ngabhikomakeka kwa ndandi ja mahakau ghabhahengiki akatati bhabhu. Kila mundu anaakomakikaje kwa ndandi ja lihoku laki mweni.

17“Uhengaje ngati moipalakila pauntemula ngeni au nkebha, wala ngawitola ingobhu jaka mbomba joaweliwi na ndomi waki kubha poni. 18Nambu nkombukaje kubha mkabhi bhatumwa ku Misili hoku, najombi Bambo Chapanga, Chapanga winu, akunkombwi konihoku. Jeniheji nde ndandi nundaghalakila kuhenga bhenibhela.

19“Chikahi pauhuna mahunu mungonda waku, na kughajewa mahunu kunyuma, ngawikelabhuka kujenda kughatola. Ughalekaje kwa ndandi ja bhagheni, bhakebha na akambomba bhabhaweliwi na bhalomi, nahuli Bambo Chapanga, Chapanga waku, awezaje kukupengalela wehapa mu mahengu ghokapi gha mabhoku ghaku. 20Chikahi pautongola mapambiku gha zeituni kuhuma mu mikongu jaku, ngawikelabhukila kutongola mu mambandi mala ja kabheli. Ughalekaje mapambiku ghaghahighalili kwa ndandi ja bhagheni, bhakebha na akambomba bhabhaweliwi na bhalomi bhabhu. 21Chikahi pauhuna mahunu gha zabibu kuhuma mu ngonda waku wa mizabibu, ngawikelabhukila mala ja kabheli. Wilekaje yeihighalile kwa ndandi ja bhagheni, bhakebha na akambomba bhabhaweliwi na bhalomi bhabhu. 22Nkombukaje kubha nanamu mkabhi bhatumwa ku inchi ja Misili. Jeniheji nde ndandi nundaghalakila kuhenga bhenibhela.