Kombukombu la Tolati 25

1“Ngati bhandu bhabheli bhatenda kulochana, ubhapelaka pachengu, na bhatemula anabhatemulaje litakilu labhu, bhundekakyaje jwangakubha na lihakau, na joabhi na lihakau atemuliwaje. 2Ngati mundu joakamuliki kubha na lihakau anaatemuliwi kulapulika iboku, mtemula anaandaghalakyaje mundu hoju aghonila ukutama pahi nahuli alapulikaje palongi jaki, kwa ubhalangiku wa iboku kulengana na lihakau laki. 3Mundu joabhi na lihakau hoju aweza kulapulika iboku alobaini, nambu nga nakanopi. Ngati anaalapuliki nakanopi ja iboku alobaini, ndongu waku anaabhonikanaje kubha umpohiki lihamu palanga.

4“Ngawajikonga ng'ombi ndomu chikahi pajipumunda chilebhi.

Cheapalika kuhenga mundu joaweliwi na ndongu waku

5“Ngati bhalongu bhabheli akanalomi bhatama pandu pamu, na jumu wabhu anaapotili panga kubhaleka bhana, nhwanu waka mundu jola joapotili ngayitoghuleka kunja ja bhalongu bhanihabha ng'o. Ndongu wa chikambaku waka ndomi waki joapotile impalika antoghulaje mbomba hoju, na kubha nhwanu waki. 6Mwana wa kutumbula joanaambelakaje ampekyaje lihina laka ndongu waki joapotile, nahuli lihina laki ngalihungulika mu Izilaeli. 7Nambu anangati ndongu waka mundu joapotili hoju ngacheapala kuntoghola nhwanu waka ndongu waki, mbomba hoju ajendaje kwa ihongozi pundyangu ukolongwa wa muchi, na kupwagha, ‘Ndongu wa chikambaku waka ndomi wangu akana kuliendeleza lihina laka ndongu waki joapotili mu Izilaeli. Ngacheapala kutimiza lihengu laki kwangu nepani ndamu waki kwa ndandi jaka ndomi wangu joapotile.’ 8Bhela ihongozi bha muchi anabhundohaje na kulonge naku, najombi anaapwaghiki, ‘Ngachembala kuntoghola kubha nhwanu wangu,’ 9nhwanu waka ndongu waki joapotili hoju ajendaje palongi ja ihongozi, anhulaje ligubasi limu na kunhuni imata pamihu, na kumpwaghila, ‘Anana nde moipalakila kuhengewa mundu jola joakana kumpekeha ndongu waki bhabhelakeka.’ 10Bhela lihina laka mundu jonihoju mu Izilaeli analilohakikaje, ‘Nyumba jaka mundu joahulakiki ligubasi.’

Shelia nayengi

11“Ngati akanalomi bhabheli bhatenda kukomana, na nhwanu waka jumu wabhu anahikiki kunkengalela ndomi waki kwa kunkamu utupu waka mundu jola joakomana na ndomi waki, 12mbomba ipalika unhekataje chiwoku chaki, wala lihu laku ngalambone chiha.

13“Ngawikubha na maganga gha ntundu ubheli gha kupemela mu mfuku waku, limu lelitopiki na lengi lelipepwike. 14Ngawikubha na ipemu ya ntundu ubheli mu nyumba jaku, chimu chikolongwa, na chengi kichoku. 15Ikupalika utumilaje ipemu yeibhi na kutopa kokupalika, nahuli upataje kutama machobha ghamaheli mu inchi jeakupekeha Bambo Chapanga, Chapanga waku. 16Maghambu bhandu bhokapi bhabhahenga mambu ghanihagha, bhokapi bhabhahenga mambu gha kukolowa, nde mahakalilu palongi jaka Bambo Chapanga, Chapanga waku.

Amuli ja kubhakoma Bhaamaleki

17“Nkombukaje chela chebhakunhengili Bhaamaleki mu indela chikahi pamukabhi muhuma ku Misili. 18Chikahi pamukabhi ntondiki na kujomukewa na makili kwa mwanja winu, bhakabhalapwili bhandu bhala bhabhakabhi bhajengalela kunyuma. Bhakahengiki bhenibhela maghambu Bhaamaleki ngachebhunjowipi Chapanga. 19Bhela Bambo Chapanga, Chapanga waku, paakupekyaje lipomulelu kubhokana na adui bhaku bhokapi bhabhukuyongolota mu inchi jeakupekeha kujitama kubha upwelelu waku, ikupalika uhungulaje kombukombu lokapi la Bhaamaleki pahi ja mbengu. Ngawijewa!