Kombukombu la Tolati 26

Nhupu ya mahunu

1“Chikahi pawikubha ujingili mu inchi jeakupekeha Bambo Chapanga, Chapanga waku, kutama mkati jaki ngati upwelelu waku, 2utolaje mahunu gha kutumbula gha ghala ghamwihunaje mu inchi jeakupekeha Bambo Chapanga, Chapanga waku, ukabhekaje muchitonga, na kujenda naghu pandu pala payihaghulaje Bambo Chapanga, Chapanga waku, nahuli kubha pandu pa kunjojabhela. 3Unjendilaje mpenganyambiku joanakubhaje mu machobha ghanihagha, na kumpwaghila, ‘Lalenu nyetakela kwaka Bambo Chapanga, Chapanga wangu, kubha nyingili mu inchi jeakabhalapili akahokolu bhitu kubha anaatupekyaje.’

4“Bhela mpenganyambiku anaajopalyaje chitonga hechi kuhuma mu mabhoku ghaku, na kuchibheka pahi palongi ja pandu pa kubhokeha nyambiku paka Bambo Chapanga, Chapanga waku. 5Bhela witangazaje palongi jaka Bambo Chapanga, Chapanga waku: ‘Tati wangu akabhi Mwalamu joakabhi pambipi na kuhobha, akahelili ku Misili na kutama konihoku ngati ngeni. Jombi na bhalongu bhaki bhakabhi bhachokopi pela pabhakabhi bhajenda konihoku, akatami konihoku mbaka bhakabhi bhandu bha inchi ngolongwa, jejibhi na makili na bhandu bhamaheli. 6Nambu Bhamisili bhakatubhonili, na kutung'aha, na kutujomalakela kuhenga mahengu ghaghanonwipi gha kitumwa. 7Bhela twakundelili Bambo Chapanga, Chapanga wa akahokolu bhitu, najombi akajowini chilelu chitu, na kughabhona mang'ahiku ghitu, na mahengu ghaghanonwipi na kubhonewa kwitu. 8Bhela, Bambo Chapanga akatubhohiki ku inchi ja Misili kwa chiwoku chaki chechibhi na makili na chechihatambwike, kwa kujoghoha kukolongwa, nginyulila na ngangachu. 9Akatuletiki pandu pambani, na kutupekeha inchi jenjenu, inchi jejibhi na mahibha na buse. 10Nanatu sajenu neta kwaku mahunu gha kutumbula ghanhuniki mungonda wangu mu inchi ambaju wehapa Bambo Chapanga, utehi kumbekeha.’

“Panihapa ubhekaje chitonga hechi pahi palongi jaka Bambo Chapanga, Chapanga waku, na kujojabhela palongi jaki Bambo Chapanga, Chapanga waku. 11Bhela wehapa papamu na Bhalawi, na bhagheni bhokapi bhabhabhi pachilanda jinu muhekalyaje kwa hindu yokapi yamboni ambayu Bambo Chapanga, Chapanga waku, akupekihi wehapa papamu na bhandu bha munyumba jaku.

12“Kila baada ja hyaka itatu, kila jumu winu anaimpalikaje kubhoha pandu pamu pa komi pa mahunu ghaki ghokapi kwa ndandi ja Bhalawi, bhagheni, bhakebha na bhabhaweliwi na bhalomi bhabhu, nahuli bhawezaje kula chilebhi mu michi jinu. 13Bhela umpwaghila Bambo Chapanga, Chapanga waku, ‘Hindu yeibhili ihuhu niibhohiki munyumba jangu na kubhapekeha Bhalawi, bhagheni, bhakebha na bhabhaweliwi na bhalomi bhabhu, ngati mounaghalakili nhengaje. Ngachenhekiti amuli yaku wala kujijewa hata jimu. 14Ngachenakuliki pandu pokapi pa zaka jaku panakabhili ndenda kuombuleza, wala ngachenagusiki hindu heyi chikahi panakabhi ngachenyetakalewa palongi jaku, wala ngachemohiki pandu pokapi pala pa hindu yeniheyi kwa ndandi ja bhakuwa. Nyendalili kukutii Bambo Chapanga, Chapanga wangu, na kuhenga kila chindu ngati mounaghalakile. 15Ulingalyaje pahi kuhuma ku matamu ghaku mahuhu gha kunani kumahunde, na ubhapengalyaje bhandu bhaku Izilaeli papamu na inchi jeutupekihe ngati moukabhalapile akahokolu bhitu, inchi jejibhi na mahibha na buse.’

Malakalilu kwa bhandu bhaka Bambo Chapanga

16“Lalenu Bambo Chapanga, Chapanga waku, akulaghalakila kujengalela amuli na shelia ayeyi yokapi. Bhela uikamulaje na kuitii kwa mtima waku wokapi na kwa roho jaku jokapi. 17Lalenu utangizi kubha Bambo Chapanga nde Chapanga waku, na kubha anaujengalyaje indela yaki, kwa kukamula amuli yaki, shelia yaki, malaghalakilu ghaki na kujijowanela sauti jaki. 18Najombi Bambo Chapanga lalenu anjetakili mwehapa kubha nde bhandu bhaki bhahuhu bhabhatengakiki kwa ndandi jaki mweni, ngati moakalaghile, na kubha impalika kukamula amuli yaki yokapi. 19Atangizi kubha anaambekaje panani kupeta bhandu bha inchi yengi bhokapi bhaabhabhombike. Nanamu anamulikengalyaje lihina laki, ulumbalilu waki na utopelu waki. Mwehapa anamkubhaje bhandu bhahuhu kwaka Bambo Chapanga, Chapanga winu, ngati moakalaghile.”