Kombukombu la Tolati 27

Amuli yaka Chapanga yeyalembakiki mu ibau ya maganga

1Bhela, Musa na ihongozi bha Izilaeli bhakabhalaghalaki bhandu, bhakapwaghaje, “Nkamulaje amuli ayeyi yokapi yenundaghalaki lalenu. 2Lichobha lela pamwikubhaje ndombwiki nkoka Yoludani na kujingila mu inchi jeampekeha Bambo Chapanga, Chapanga winu, njemakaje maganga makolongwa na kughakilima kwa chokaa. 3Ndembaje panani jaki malobhi ghokapi gha shelia yokapi ayeyi, chikahi pamwikubhaje ndombwiki na kujingila mu inchi jeampekeha Bambo Chapanga, Chapanga winu, inchi jejibhi na mahibha na buse, ngati bhela Bambo Chapanga, Chapanga wa akahokolu bhinu, moakundaghalile. 4Pamwikubhaje ndombwiki nkoka Yoludani, mughajemakaje maganga aghagha panani ja chitombi cha Ebali, ngati monundaghalaki lalenu, na kughakilima kwa chokaa. 5Konihoku munchengilaje Bambo Chapanga, Chapanga winu, pandu pa kubhokeha nyambiku, nchengaje kwa maganga. Ngamwitumila chombu chokapi chela cha choma panani jaki. 6Munchengilaje Bambo Chapanga, Chapanga winu, pandu pa kubhokeha nyambiku kwa maganga ghangakubhachakika, na mumbokihaje Bambo Chapanga, Chapanga winu, nyambiku ya kujochakeka panani jaki. 7Mbohaje nhupu ya kutama kwa lukwali panani jaki, mkulaje na kuhekalela palongi jaka Bambo Chapanga, Chapanga winu. 8Nanamu ndembaje malobhi ghokapi gha shelia ajeji kwa palanga nakanopi panani ja maganga ghanihagha ghamughajemike.”

9Bhela, Musa na bhapenganyambiku Bhalawi bhakabhapwaghi bhandu bhokapi bha Izilaeli, “Ntumbalaje na njowanyaje mwenga bhandu bha Izilaeli. Lalenu mwehapa mbili bhandu bha inchi jaka Bambo Chapanga, Chapanga winu. 10Bhela ujowanyaje na kutii sauti jaka Bambo Chapanga, Chapanga waku, ujengalyaje amuli yaki na malaghalakilu ghaki ghanukulaghalakila lalenu.”

Masolu kwa bhangakutii

11Bhela Musa akabhalaghalaki bhandu bhanibhala mu lichobha lenilela, akapwaghaje, 12“Pamwikubhaje ndombwiki nkoka Yoludani, makabila aghagha anaghajemaje panani ja chitombi cha Gelizimu kubhapengalela bhandu: Bhandu bha likabila laka Simioni, Lawi, Yuda, Isakali, Yusufu na Benyamini. 13Na makabila aghagha anaghajemaje panani ja chitombi cha Ebali chikahi cha kubhoha masolu: Likabila laka Leubeni, Gadi, Asheli, Zabuloni, Dani na Nafutali. 14Bhela Bhalawi ibhapalika kubhapwaghila bhandu bhokapi bha Izilaeli kwa sauti ngolongwa:

15“ ‘Apataje masolu mundu jola joalenganakela chimong'umong'u cha kubhacha au cha kuyeyusha, na kuchijemeka na kuchijojabhela kwa kulihiya, chindu ambachu nde lihakalilu kwaka Bambo Chapanga, chechilenganakiki kwa ufundi wa mabhoku ghaka mundu.’

“Na bhandu bhokapi bhayangaje, ‘Amina!’

16“ ‘Apataje masolu mundu jola joanjojoha tati waki na mabhu waki.’

“Na bhandu bhokapi bhayangaje, ‘Amina!’

17“ ‘Apataje masolu mundu jola joaheghakela liganga la ulindakanilu waka njaki.’

“Na bhandu bhokapi bhayangaje, ‘Amina!’

18“ ‘Apataje masolu mundu jola joantenda ngalola kuhobha indela.’

“Na bhandu bhokapi bhayangaje, ‘Amina!’

19“ ‘Apataje masolu mundu jola joahobheha utemulu waka bhagheni, bhakebha na akambomba bhabhaweliwi na bhalomi bhabhu.’

“Na bhandu bhokapi bhayangaje, ‘Amina!’

20“ ‘Apataje masolu mwanalomi jola joaghonela kihyegha na nhwanu waka tati waki, maghambu akubha ampohiki lihamu tati waki.’

“Na bhandu bhokapi bhayangaje, ‘Amina!’

21“ ‘Apataje masolu mwanalomi jola joaghonela kihyegha na chinyama cha ntundu wokapi ghola.’

“Na bhandu bhokapi bhayangaje, ‘Amina!’

22“ ‘Apataje masolu mwanalomi jola joaghonela kihyegha na ndombu waki, yani mwali waka tati waki, au mwali waka mabhu waki.’

“Na bhandu bhokapi bhayangaje, ‘Amina!’

23“ ‘Apataje masolu mmwanalomi jola joaghonela kihyegha na nkowanu waki wa chimbomba.’

“Na bhandu bhokapi bhayangaje, ‘Amina!’

24“ ‘Apataje masolu mundu jola joankoma njaki kwa kulihiya.’

“Na bhandu bhokapi bhayangaje, ‘Amina!’

25“ ‘Apataje masolu mundu jola joatola ngolukelu nahuli kunkoma mundu jwangakubha na mahakau.’

“Na bhandu bhokapi bhayangaje, ‘Amina!’

26“ ‘Apataje masolu mundu jola jwangakukamulakila malobhi gha shelia jenjenu kwa kughatenda.’

“Na bhandu bhokapi bhayangaje, ‘Amina!’