Kombukombu la Tolati 28

Mbengalelu kwa bhandu bhabhatii

Bhalawi 26:3-13; Kombukombu la Tolati 7:12-24

1“Bhela ngati anauntii Bambo Chapanga, Chapanga waku, kwa kukangamala, na kuitenda amuli yaki yokapi yenukupekeha lalenu, panihapa Bambo Chapanga, Chapanga waku, anaakupekyaje utopelu panani ja bhandu bha inchi yokapi ya pundema. 2Bhela mbengalelu ayeyi yokapi anaihikaje panani jaku na kuipata, ngati anauntii Bambo Chapanga, Chapanga waku:

3“Bambo Chapanga anaakupengalya kumbwani, na anaakupengalya kumighonda.

4“Bambo Chapanga anaabhapengalya bhabhelakeka bha lutumbu lwaku, na mahunu gha inchi jaku, hinyama yaku ya kudimakika, yani mapogha gha ng'ombi yaku, na bhana bha mambeleli ghaku.

5“Bambo Chapanga anaapengalya mahunu ghaku, na chombu chaku cha kuhunyila uhembi.

6“Bambo Chapanga anaakupengalya chikahi paujingila panyumba, na anaupengaliwaje chikahi paupita munyumba.

7“Bambo Chapanga anaabhatendaje maadui bhabhajinuka palongi jaku wehapa kulepalela. Anabhakuhikila kwa indela jimu, nambu anabhatila palongi jaku kwa indela saba.

8“Bambo Chapanga anaalaghalakyaje mbengalelu ihikaje mu ugholu yaku, na kila chindu chewigusaje kwa chiwoku chaku. Bambo Chapanga, Chapanga waku, anaakupengalyaje mu inchi jeakupekeha.

9“Bambo Chapanga anaakutendaje kubha bhandu bhaki bhahuhu, ngati moakakulaghile kwa kulapa, anaukamwi amuli yaki Bambo Chapanga, Chapanga waku, na kujenda mu indela yaki. 10Ngati anamuntii Bambo Chapanga, Chapanga winu, kwa kukangamala, na kujengalela amuli yaki yenumpeke lalenu, panihapa Bambo Chapanga, Chapanga winu, anaantenda kubha na lujiniku panani ja bhandu bha inchi yokapi ya pundema. 11Bambo Chapanga anaakutendaje kuneng'anela nakanopi, anaakupekyaje bhana bhamaheli, hinyama yamaheli ya kudimakika, na mahunu gha mumighonda, mu inchi jeakabhalapile kubhapekeha akahokolu bhaku. 12Bambo Chapanga anaahoghulaje mbengu, na chikoku chaki cha mbengalelu, kwa kukutonyela iyula kuhuma mumahundi kwa chikahi chaki chechipalika, na kukupengalela wehapa mu mahengu ghokapi gha mabhoku ghaku. Anaubhajahikaje bhandu bhamaheli, nambu wehapa ngawijahiki kwaka jokapi jola. 13Bambo Chapanga, Chapanga waku, anaakutendaje wehapa kubha mmutu, wala nga nkela. Nanau anaukubhaje kunani pela, wala ngawikubhi pahi, ngati anaukamwili na kuitenda kwa kukangamala amuli yaka Bambo Chapanga, Chapanga waku, yenukulaghalakila lalenu. 14Ngawikotoka ng'o kuitii amuli yangu yenukupekeha lalenu, kwa kujenda kumalelelu au kumangeja, kwa kujengalela ichapanga nayengi na kuitumakila.

Masolu kwa bhangakutii

Bhalawi 26:14-46

15“Nambu hata bhela, ngati ngacheujitii sauti jaka Bambo Chapanga, Chapanga waku, na kuikamula kwa kukangamala amuli yaki yokapi yenukulaghalakila lalenu, masolu aghagha ghokapi anaghahikaje panani jaku na kukupata:

16“Anaupataje masolu paukubha kumbwani, na anaupataje masolu paukubha kumighonda.

17“Anaupata masolu ngawikubha na mahunu, na chilebhi chechibhokana na mahunu ghanihagha.

18“Bhabhelakeka bhaku anabhapata masolu, mahunu gha inchi jaku, mapogha gha ng'ombi yaku na bhanamambeleli ghaku ngaghijonjukeki.

19“Anaupataje masolu chikahi paujingila munyumba jaku, na chikahi paupita munyumba jaku.

20“Bambo Chapanga anaaletaje masolu panani jaku, kulepa kujongana na mang'ahiku mu kila chindu chewijeghalaje chiwoku chaku kuchihenga, mbaka pawikubhaje uyonangiki manyata kwa ndandi ja uhakau wa matendu ghaku, na kwa ndandi ja kundeka Bambo Chapanga. 21Bambo Chapanga anaandetilaje itamu yangakujomoka, mbaka ajomulaje kukuyonanga kuhuma mu inchi jeujingila kujitama. 22Bambo Chapanga anaandapulaje kwa itamu ya kujambukila, chitamu, mapute, kupyopa kukolongwa, ulali, lipanga na likongobha, mambu ghanihagha anaghukupataje mbaka pawikubhaje uyonangiki. 23Mbengu jejibhi kunani jaku anajijomaje ngati madini gha shaba panga iyula, na inchi anajijomaje ngati choma. 24Bambo Chapanga anaajitendaje iyula ja inchi jaku kubha mpongu wa luhombi na mpongu wa luhanga, nayombi anayunelilaje kuhuma kunani mbaka pamwikubhaje njomwili kuyonangeka.

25“Bambo Chapanga anaakutendaje ulapulikaje palongi ja maadui bhaku. Anaubhajendilaje kwa indela jimu, nambu anautilaje palongi jabhu kwa indela saba. Nanau anaukubhaje chindu cha kuhakaliha kwa bhandu bhokapi bha pundema. 26Pawikubha upotili, ntuhi waku anaukubhaje chilebhi cha ijuni yokapi ya kunani, na hinyama yokapi ya pundema, wala ngapikubhi na mundu wa kuitopola. 27Bambo Chapanga anaakulapulaje kwa maputi ghaghabhapatiki bhandu bha ku Misili, na kwa ilonda, ikwanda na kunyanya, ambayu ngawiwezi kulama. 28Bambo Chapanga anaandapulaje kwa kubha na mangongo, kubha ngalola na kulepa kumanya cha kuhenga. 29Chikahi cha muhi anaujendaje kwa kupapaha papaha ngati ngalola mu lubhendu, wala ngawijendaleli mu mahengu ghokapi ghaughahenga. Lichobha kwa lichobha anaubhoniwaje na kunyaghuliwa hindu, wala njeta jokapi jola joanaakukengalyaje.

30“Anaubhohaje nhweku kwaka mbomba, nambu mwanalomi jongi anaaghonila naku kihyegha kwa makili. Anauchenga nyumba, nambu ngawitami mkati jaki. Anaupandaje ngonda wa mizabibu, nambu ngawikuli mapambiku ghaki ng'o. 31Ng'ombi jaku anajichinjakikaje palongi ja mihu ghaku, nambu ngawikuli inyama jaki. Liponda laku analitolakikaje palongi ja mihu ghaku kwa makili, nambu ngawikelabhukiwe. Mambeleli ghaku anabhapekiwaje adui bhaku, wala ngapikubhi na mundu wa kukukengalela. 32Bhana bhaku bha chikambaku na bha chimbomba anabhabhohakikaje kwa bhandu bha inchi nayengi nahuli kubha bhatumwa, koni ukatulaje mihu ghaku muhi jokapi kwa kubhalolakela lichobha kwa lichobha nahuli bhakelabhukaje, nambu ngawikubhi na makili gha kubhakelabhuha bhana bhaku. 33Mapambiku gha inchi jaku na mahunu ghokapi gha inchi jaku ghaughahengi lihengu kwa kukangamala, anaitolakikaje na bhandu bha inchi najengi jangakujimanya wehapa, anaubhoniwaje na kutimbakika pahi machobha ghaku ghokapi. 34Hindu yewaibhonaje kwa mihu ghaku, anayukutendaje kubha ngati mwanangongo. 35Bambo Chapanga anaaghalapulaje majuwa ghaku na magholu ghaku kwa maputi ghaghabhili na mabhinilu makolongwa ghangakuweza kulama, naghombi anaghajaghanyaje kutumbula kulwaju mbaka ku lutohutolu lwa pamutu.

36“Bambo Chapanga anaakupelaka wehapa, na nkolongwa joumbekiki panani jaku ku litaifa ambalu mwehapa ngachemulimanyi wala akahokolu bhinu. Konihoku anautumakyaje ichapanga nayengi ya mikongu na maganga. 37Nanamu anamkubhaje chindu cha kuhakaliha, kupohakeka lihamu, na chindu cha kukangacha, pachilanda ja bhandu bhokapi koanaampelakaje Bambo Chapanga.

38“Anaupandaje imbeju yamaheli mungonda, nambu anauhunaje pachokopi pela, maghambu nzige anaikulaje mahunu ghaku. 39Anaupandaje mighonda ja mizabibu na kujikulaghalila, nambu ngawihuni mizabibu jeniheji na kunywa divai jaki, maghambu idudu anaikulaje. 40Anaukubhaje na mizeituni pandu pokapi pa inchi jaku, nambu ngawalipaki mahuta ghaki, maghambu mizeituni jaku anajipolutaje. 41Anaubhelakaje bhana bha chikambaku na bha chimbomba, nambu ngabhikubhi bhaku wehapa, maghambu anabhatolakika kwa makili na kupelekwa kuutumwa. 42Nzige anaikulaje mapambiku ghaku, na mahunu ghaku ghokapi gha mumighonda.

43“Ngeni joatama pachilanda jinu mwehapa anaakwelaje kunani nakanopi kupeta wehapa, nambu wehapa anauhelalaje pahi nakanopi. 44Jombi anaakujahikaje wehapa, nambu wehapa ngawanjahiki jombi. Jombi anaakubhaje mmutu, nambu wehapa anaukubha nkela.

45“Masolu aghagha ghokapi anaghakubhaje panani jaku wehapa, naghombi anaghakujengalyaje na kukupata wehapa mbaka pawikubhaje uyonangike, maghambu ngachewajowanili sauti jaka Bambo Chapanga, Chapanga waku, kwa kukamula amuli yaki na malaghalakilu ghaki ghaakupekihe. 46Yeniheyi anaikubhaje ulandilu wa utemulu waka Bambo Chapanga panani jaku na bhabhelakeka bhaku mileli. 47Maghambu Bambo Chapanga, Chapanga waku, akakupengalili wehapa kwa kila ntundu, nambu wehapa ngacheuntumakili kwa chiheku na kwa mtima wa kuchengula. 48Bhela anaubhatumakyaje maadui bhaku bhanaabhaletaje Bambo Chapanga panani jaku. Anamkubha na injala, inywita, kulepa kubha na ingobhu, na uhochu ghoupetalile. Jombi anaakukongaje chingolingoli cha choma pahingu jaku mbaka paikubhaje ajomwili kukuyonanga. 49Bambo Chapanga anaakuletilaje bhandu bha inchi najengi kuhuma kutali, bhandu ambabhu ngacheujimanyi lugha jabhu, kuhuma ku ujomukelu wa ndema, ngati ngwahe mojihelela kujenda kukamu chindu pahi. 50Bhandu bhabhabhi na sula yangakulangi chiha, na bhangakubhajali bhazee wala akakombu. 51Anabhakulaje hinyama hinu ya kudimakika, na mahunu ghaku gha inchi mbaka pawikubha ujomwili kuyonangeka. Ngabhandekeli chindu chokapi chela, mahunu, divai, mahuta gha zeituni, ng'ombi na mambeleli na anampotilaje. 52Bhandu bhanihabha anabhajiyongalutaje michi jaku jokapi, mbaka lumatu lwaku lulachu lwa ngomi jaku loukabhi ulutegamela palwikubhaje luhawiki pahi. Anabhayongalutaje michi jaku ipambala yokapi mu inchi ambaju Bambo Chapanga, Chapanga waku, atenda kukupekeha.

53“Chikahi cha maadui bhaku kukuyongalota na kukung'aha, anaukulaje inyama ja bhana bhaku bha chikambaku na bha chimbomba ambabhu Bambo Chapanga, Chapanga waku, atehi kukupekeha, kubhokana na mang'ahiku ghala ambaghu maadui bhaku anabhakuletilaje pabhikubhaje bhakuyongalwite. 54Hata mundu joabhi ndongwana nakanopi na joaleliwi wichu, na joalainiki nakanopi pachilanda jaku, ngayikubhi na lihu la chiha kwaka ndongu waki mweni, kwaka nhwanu waki joampala nakanopi, na kwa bhana bhaki bhabhahighalili naku. 55Wala ngaangabhi hata jumu wabhu inyama ja bhana bhaki bhaikulaje. Maghambu njeta chindu chengi chechihighalili kwaki mu chikahi chenihechi cha kuyongolotwa na kung'ahakika kukolongwa, ambaku maadui bhaki anabhundetilaje mu michi jaki jokapi. 56Hata mbomba joabhili ndongwana nakanopi na joaleliwi wichu, na joalainiki nakanopi pachilanda jaku, yani ambaju ngachealabhalili kukanyata luhombi kwa lwaju lwa chigholu chaki, najombi anaakubhaje na choju kwaka ndomi waki joampalike, na kwaka mwana waki mweni wa chikambaku na mwali waki mweni. 57Anaabhakulaje bhana bhaki bhang'eng'a bhaabheleka, na lipyanda lelipita anaajomwili kubhelakeka mwana. Maghambu aholalela kubhakula kwa kulihiya bhana bhaki panga hata ndomi waki, au jumu wa bhana bhaki kumanya, mu chikahi cha kuyongolotwa na mang'ahiku ambaghu maadui bhaki anabhaletaje panani jaki mu michi jaki.

58“Ngati ngacheupala kujengalela kwa kukangamala malobhi gha shelia ghaghalembakiki mu chitabu chenjenu, na ngati ngaulitopeli na kulilumbalila lihina la kujoghoha laka Bambo Chapanga, Chapanga waku, 59bhela Bambo Chapanga anaaletaje malapuliku gha kujoghoha panani jaku na kwa bhabhelakeka bhaku, malapuliku makolongwa na gha kutamakila, na itamu ikolongwa na ya kutamakila nakanopi. 60Bhelabhela anaakuletilaje kabhete itamu yokapi yeyakabhapatiki bhandu bha ku Misili yeukaiweni na kuijoghopa, nayombi anayunjengalyaje chikahi chokapi. 61Bhelabhela Bambo Chapanga anaandetilaje kila ntundu wa chitamu na mang'ahiku ghangi ambayu ngacheilembakiki momboni mu chitabu cha shelia, mbaka pawikubhaje ujomwili kuyonangeka. 62Mwehapa ambabhu mkabhi bhamaheli ngati ndondwa ya kunani, anamuhighalyaje bhachokopi pela kwa ubhalangiku, maghambu ngachemwajowanili na kujitii sauti jaka Bambo Chapanga, Chapanga winu. 63Kabhete, anakukubhaje ngati Bambo Chapanga moakabheli ahekalela panani jinu chikahi mwehapa pamkabhi mneng'anela na kujonjukeka kwa ubhalangiku, bhenibhela nde Bambo Chapanga moanahekalyaje kunjonanga mwehapa. Nanamu anambohakikaje mu inchi jeniheji jenjingila kujenda kutama.

64“Bhela Bambo Chapanga anaantendaje mwehapa kupechangana pachilanda ja bhandu bha inchi yokapi, kuhuma ku ujomukelu ghumu wa ndema mbaka ku ujomukelu ghongi. Nanamu anantumakyaje ichapanga nayengi konihoku, ichapanga ya mikongu na maganga, yangakuimanya wehapa wala akahokolu bhaku. 65Pachilanda ja bhandu bha inchi yeniheyi ngamwipati chiheku cha ntundu wokapi ghola, wala pandu pinu mabhete pa kupomulela. Nambu Bambo Chapanga anaantendaje mpataje choghoi chikolongwa mu mitima jinu, mihu ghaghatondike kwa kulendalela na mtima ghouhekiti utokulelu. 66Anautamaje mu mang'ahiku machobha ghokapi, na anaukubhaje na choghoi ikilu na muhi, wala ngawikubhi na uchakaka na matamu ghaku ng'o. 67Chikahi cha lukela anaupwaghaje, ‘Anangati kukabhi pakamihi!’ Na pakamihi anaupwaghaje, ‘Anangati kukabhi lukela!’ Wiholalyaje bhenibhela kwa ndandi ja choghoi chela chechitwelakyaje mtima waku, papamu na hindu yela ambayu anawibhonaje kwa mihu ghaku. 68Bambo Chapanga anaakukelabhuhaje kabhete ku Misili kwa sitima, mwanja ambau nakakupwaghili kubha ngawijendi kabhete ng'o. Konihoku anamulilombisaje mabhete kwa maadui bhinu ngati bhatumwa bha chikambaku na bha chimbomba, nambu njeta mundu jokapi jola joanaanhemalaje.”