Kombukombu la Tolati 29

Lulaghilu lwaka Bambo Chapanga na Bhaizilaeli mu inchi ja Moabu

1Aghagha nde malobhi gha lulaghilu ambalu Bambo Chapanga akundaghalaki Musa kutenda na bhandu bha Izilaeli mu inchi ja Moabu, kwa kujonjukela lulaghilu loakahengiki Bambo Chapanga ku chitombi cha Holebu hoku.

2Musa akabhalohiki bhandu bhokapi bha Izilaeli na kubhapwaghila, “Mihu ghinu ghaweni mambu ghokapi Bambo Chapanga ghaakamuhengile nkolongwa Falao ku inchi ja Misili, papamu na ihongozi bhaki, bhatumwa bhaki, na kwa inchi jaki jokapi. 3Kwa mihu ghinu mabhete mkaweni malapuliku makolongwa, nginyulila na ngangachu ikolongwa yeakahengiki Bambo Chapanga. 4Nambu mbaka lalenu Bambo Chapanga ngacheampekihi malangu gha kumanya, mihu gha kubhona, na makutu gha kujowana kwa ghala ghamughapetile. 5Kwa chikahi cha hyaka alobaini, nepani nakabhi nundongoha mulipololu, ingobhu hinu ngacheyahakie, wala magubasi ghinu ngacheghahakie mu magholu ghinu. 6Ngachemwakuliki libumunda, wala ngachemwakunywiki divai, wala chindu chokapi chela cha kulobhela. Nambu Bambo Chapanga akunjangatile, nahuli mpata kumanya kubha jombi nde Bambo Chapanga, Chapanga winu. 7Chikahi patukahikiki pandu pambani, Sihoni nkolongwa wa Heshiboni, na Ogu nkolongwa wa Bashani, bhakahikiki kukomana ngondo na tepani, nambu tepani tukabhawezike. 8Tukajitoliki inchi jabhu na kubhapekeha makabila gha Bhaleubeni, Bhagadi na nusu ja likabila laka Manase, kubha upwelelu wabhu. 9Bhela, nkamulaje kwa ukangamalu malobhi gha lulaghilu londone, nahuli mpata kuneng'anela mu mambu ghokapi ghamughahenga.

10“Lalenu mwehapa mabhokapi njemiki palongi jaka Bambo Chapanga, Chapanga winu, koni mkabyaje papamu na ihongozi bha makabila ghinu, ihongozi bhinu, bhazee bhinu, na akanalomi bhangi bhokapi bha Izilaeli, 11na akabhahanu bhinu, bhana bhinu, papamu na bhagheni bhabhatama mu makambi ghinu ambabhu bhunhalila hanju na kuntekela machi. 12Mbili pambani lalenu nahuli kutenda lulaghilu na Bambo Chapanga, Chapanga winu, lulaghilu ambalu Bambo Chapanga, Chapanga winu, alutenda na mwehapa lalenu, na kulujeghela muhuli kwa kulapa, 13na kundangiha kwa uchakaka lichobha la lalenu kubha mwehapa nde ngati bhandu bhaki mweni, nahuli awezaje kubha Chapanga winu, ngati moakakulaghile, na ngati moakabhalapile akahokolu bhinu Ibulahimu, Isaka na Yakobo. 14Wala ngachendenda lulaghilu londoni na kulapa koni na mwehapa kanjika jinu pela, 15nambu papamu na jola joajemiki na tepani pambani palongi jaka Bambo Chapanga, Chapanga witu, papamu na bhabhelakeka bhitu bhangakubha pambani lalenu.

16“Mwehapa mabhete mmanyi ntundu motwatamile mu inchi ja Misili, na ntundu motwapetile pachilanda ja bhandu bha inchi nayengi mbaka kuhika pambane. 17Mkaweni imong'umong'u yabhu ya kuhakaliha yebhakabhi bhaijojabhela, na ichapanga ya mikongu, maganga, madini gha feza na zahabu yebhakabhi nayu. 18Mlilingalyaje kubha ngapikubha na mwanalomi au mbomba, lukolu au likabila lokapi lela pachilanda jinu, leanalundekaje Bambo Chapanga, Chapanga witu, na kujenda kuitumakila ichapanga nayengi ya mataifa ghanihagha. Lijambu leniheli analikubha ngati nkegha ghoumela na kupambika mapambiku mabhabha ngati chikau. 19Mundu jokapi anaajomwili kujowana malobhi aghagha gha kulapa, na kutumbula kulipengalela mweni muntima waki, na kupwagha, ‘Anangubha lukwali, hata ngati ananyendalile kujijengalela indela jangu namwete.’ Lijambu leniheli analiletaje malapuliku kwa inchi jejitonyi iyula na kubha jijomu. 20Bambo Chapanga ngaandekakeli mundu jonihoju ng'o, inyela na wihu waka Bambo Chapanga, anaibhelalaje panani jaka mundu jonihoju, na masolu ghokapi ghaghalembakiki mu chitabu chenjenu anaghuntamilaje panani jaki, na Bambo Chapanga anaalihungulaje lihina laki pahi pundema pani. 21Bambo Chapanga anaantengaje mundu jonihoju kwa uhakau waki kuhuma mu makabila ghokapi gha Izilaeli, nahuli ghumpataje mayonangeku, kulengana na masolu ghokapi gha lulaghilu ghaghalembakiki mu chitabu chenjenu cha Shelia.

22“Mu ibheleku yaku yeijengalyaje baada jaku wehapa, na ngeni joanahikaje kuhuma ku inchi ja kutali, anabhaghabhonaje malapuliku ghaghajipatiki inchi jenjenu, na hitamu na mang'ahiku ghaakaletiki Bambo Chapanga panani ja inchi jenjenu. 23Inchi jokapi anajitwelalaje madini gha baluti na mwinyu, jiyonangiki na kubha jitopu, ngachejipandakika imbeju, wala ngachejipiha mahunu, wala ngapikubhi na manyonyoli ghaghimelaje panani jaki. Anaghakubhaje ngati mayonangeku gha Sodoma na Gomola, Adima na Seboimu, ambayu Bambo Chapanga akaiyoningi kwa inyela jaki jikali. 24Bhela bhandu bha inchi yengi yokapi anabhapwaghaje, ‘Bho, maghambu kike Bambo Chapanga ajihengili inchi jabhu ajeji anana? Bho, inyela ayeyi ikali ndandi jaki kike?’ 25Panihapa bhandu anabhayangaje, ‘Nde kwa ndandi bhandu abhabha bhakalulekiki lulaghilu lwaka Bambo Chapanga, Chapanga wa akahokolu bhabhu, lulaghilu loakatendiki nabhu chikahi paakabhabhohiki mu inchi ja Misili. 26Bhakapiti na kuitumakila ichapanga nayengi, na kuijojabhela ichapanga yangakuimanya, ambayu Bambo Chapanga akabhakanakili ngabhijojabhela. 27Bhela inyela yaka Bambo Chapanga yakabhelili panani ja bhandu bha inchi ajeji, kwa kuleta panani jaki masolu ghokapi ghaghalembakiki mu chitabu chenjenu. 28Bhela, Bambo Chapanga akabhabhohiki kuhuma mu inchi jabhu kwa inyela jikali, na imbuka ikolongwa, na kubhakangila mu inchi najengi, ngati mokubheli lalenu.’

29“Mambu ghaghalihiike nde ghaka Bambo Chapanga, Chapanga witu, nambu ghala ghaghayekuliwi nde ghitu tepani na bhana bhitu mileli, nahuli tuwezaje kughahenga malobhi ghokapi gha shelia jenjenu.