Kombukombu la Tolati 30

Bambo Chapanga abhapengalyaje bhandu bhaki

1“Bhela Musa akajendalili kupwagha: Chikahi mambu aghagha ghokapi paghakuhikilaje palongi jaku, gha kuhaghula mbengalelu na masolu, nanau pawikubhaje ughakomboka pachilanda ja bhandu bha ichi yokapi, pandu ambapu Bambo Chapanga, Chapanga waku, anaakupelakaje, 2nanau pawankelabhukyaje Bambo Chapanga, Chapanga waku, na kujitii sauti jaki kwa roho jaku jokapi na kwa mtima waku wokapi, kulengana na mambu ghokapi ghanukulaghalakila lalenu, wehapa papamu na bhana bhaku, 3panihapa Bambo Chapanga, Chapanga waku, anaakukelabhukyaje ghamboni ghaku, najombi anaakubhonila chiha, na kukubhongana kabhete kuhuma mu inchi yokapi ambayu Bambo Chapanga, Chapanga waku, akakupechangine. 4Hata ngati bhandu bhaku bhapechangini ku inchi ya kutali nakanopi pundema, kuhuma konihoku Bambo Chapanga, Chapanga waku, anaabhabhonganaji na kubhakelabhuha. 5Bambo Chapanga, Chapanga waku, anaakukelabhuhaje ujingalaje mu inchi jebhakatami akahokolu bhaku, nanau anautama monihomu. Najombi anaakutendilaje mambu ghamboni na kukujonjukela kubha bhandu bhamaheli kupeta akahokolu bhaku. 6Bambo Chapanga, Chapanga waku, anaakutendaje wehapa na bhana bhaku mkubhaje na mtima wa kutii, nahuli muwezaje kumpala Bambo Chapanga, Chapanga winu, kwa mtima winu wokapi, na kwa roho jinu jokapi, na mpataje kubha bhomi. 7Bambo Chapanga, Chapanga waku, anaatendaje masolu aghagha ghokapi ghabhapataje maadui bhaku bhabhakuhakalila, na bhabhakabhili bhakung'aha wehapa. 8Nanau anaukelabhukaje na kujitii sauti jaka Bambo Chapanga kabhete, na kuikamula amuli yaki yokapi yenukulaghalakila lalenu. 9Bhela Bambo Chapanga, Chapanga waku, anaakutendaje uneng'anyaje mu mahengu ghokapi ghaughahenga kwa mabhoku ghaku, anaukubhaje na bhabhelakeka bhamaheli, ng'ombi yamaheli na mighonda jaku anajipihaje mahunu ghamaheli. Bambo Chapanga anaakuhekalyaje kabhete na kukutenda uneng'anyaje, ngati moakahekalile papani ja akahokolu bhaku. 10Nambu ikupalika kuntii Bambo Chapanga, Chapanga waku, kwa kughakamula malaghalakilu ghaki, na amuli yaki yeilembakiki mu chitabu chenjenu cha shelia, na kung'anambukila Bambo Chapanga, Chapanga waku, kwa mtima waku wokapi, na kwa roho jaku jokapi.

11“Maghambu amuli ayeyi yenukulaghalakila wehapa lalenu, ngacheinonwipi kuikamula, wala ngacheibhi kutali na wehapa. 12Ngacheibhi kunani kumahunde, mbaka upwaghaje, ‘Bho, nde nane joanakwelaje kunani kumahunde kujenda kutuletela, na kuhika kutupwaghila tujowanyaje, nahuli tupata kuitii?’ 13Wala ngacheibhi kwihi ja kabheli ja bahali, mbaka upwaghaje, ‘Bho, nde nane joanalombuka bahali kujenda kutuletela, na kuhika kutupwaghila tujowanyaje, nahuli tupata kuitii?’ 14Ngabhela, nambu lilobhi leniheli libhi pambipi na wehapa namaa, libhi mundomu waku na muntima waku, nahuli uwezaje kulitii.

15“Lingalyaje, lalenu nukubhekili palongi jaku nahuli uhaghulaje ghamboni au mahakau, na womi au nyiwa. 16Nukulaghalakila lalenu kubha umpalaje Bambo Chapanga, Chapanga waku, na ujendaje mu indela yaki yokapi, na kukamula malaghalakilu ghaki, amuli yaki na shelia yaki, nahuli upataje kubha wamwomi na kujonjukeka. Bambo Chapanga, Chapanga waku, anaakupengalyaje mu inchi jeujingila kujenda kujitama. 17Nambu anangati mtima waku anaung'anambukili kutali, na kukana kuitii, ngati anauhutakiki kutali kujenda kuijojabhela ichapanga nayengi, na kuitumakila, 18nukutangazi lalenu kubha chakaka anauyonangikaje. Ngawitami kwa machobha ghamaheli mu inchi jeulomboka nkoka Yoludani, na kujingila kujenda kujitama. 19Niiloha mbengu na ndema kubha ngati bhalandilu panani jaku lalenu, kubha nukubhekili palongi jaku womi au nyiwa, mbengalelu au masolu. Bhela, uhaghulaje womi, nahuli wehapa na bhabhelakeka bhaku mpataje kutama, 20na kumpala Bambo Chapanga, Chapanga waku, kwa kujijowanela sauti jaki, na kukamulana naku. Maghambu kuhenga bhenibhela nde womi waku, na kulangiha kubha anaupataje kutama machobha ghamaheli, na kutama mu inchi ambaju Bambo Chapanga akabhalapili akahokolu bhaku, Ibulahimu, Isaka na Yakobo, kubha anaabhapekyaje.”