Kombukombu la Tolati 31

Yoshua atola pandu paka Musa

Hesabu 27:12-23

1Bhela Musa akajendali kubhapwaghi Bhaizilaeli malobhi aghagha ghokapi, 2akabhapwaghile, “Nepani sajenu mili na umuli wa hyaka mia jimu na ishilini, nanatu ngachemili kabhete na makili gha kupita na kujingila. Bhelabhela Bambo Chapanga ambwaghili, ‘Ngawilomboki nkoka aghoghu wa Yoludani.’ 3Bambo Chapanga, Chapanga winu, anaalombukaje palongi jinu, na kubhayonanga bhandu bha inchi ayeyi palongi jinu, nanamu anamujitamaje inchi jabhu, na Yoshua anaalombukaje palongi jinu, ngati Bambo Chapanga moakapwaghile. 4Bambo Chapanga anaabhayonangaje bhandu bhanihabha ngati moakabhahengile Sihoni na Ogu, bhakolongwa bha Bhaamoli, ambabhu akabhayoningi papamu na inchi jabhu. 5Bambo Chapanga anaabhajeghalaje bhandu bhanihabha mumabhoku ghinu, nanamu impalika mubhahengilaje kulengana na amuli jela jenundaghalakile. 6Mkangamalaje na kubha na mtima ghoubhi na makili. Ngamwijoghopa wala ngamubhahola, maghambu Bambo Chapanga, Chapanga winu, anaajendaje papamu na mwehapa, ngayikotoki kunjangatila wala ngaandeki mwehapa.”

7Bhela Musa akundohiki Yoshua, na kumpwaghila palongi ja bhandu bhokapi bha Izilaeli, “Ukangamalaje na ukubhaje na mtima ghoubhi na makili, maghambu ikupalika ujendaje papamu na bhandu abhabha ku inchi jela ambaju Bambo Chapanga akabhalapili kubhapekeha akahokolu bhaku, nanau ikupalika ubhaghabhilaje kubha upwelelu wabhu. 8Bambo Chapanga mweni anaakulongulyaje, na anaakubhaje papamu na wehapa, ngaakukepakeli wala kukuleka ng'o. Bhela ngawijoghopa, wala ngawihola.”

Kusoma kabhete Shelia mu kila chaka cha saba

9Bhela, Musa akajilembiki shelia ajeji na kubhapekeha bhapenganyambiku bha lukolu lwaka Lawi, bhabhakatoliki Lisanduku la Lulaghilu laka Bambo Chapanga, bhelabhela akabhapeki na bhazee bhokapi bha Izilaeli. 10Musa akabhalaghalakili, akapwaghaje, “Mu ujomukelu wa kila chaka cha saba, mu chaka cha kulekakela madene, mu chikahi chechilaghalakiwi cha Uwangalalu wa Indamba, 11chikahi bhandu bhokapi bha Izilaeli pabhahika kunjojabhe Bambo Chapanga, Chapanga winu, pandu pala paanahaghulaje, wisomaje shelia ajeji palongi ja bhandu bhokapi bha Izilaeli koni bhakajowanaje. 12Ubhabhonganaje bhandu bhokapi, akanalomi, akambomba, bhana na bhagheni bhabhabhi mu michi jinu, nahuli kila mundu apataje kujowana na kulibhola kuntopela Bambo Chapanga, Chapanga winu, na kujengalela kwa kughatenda malobhi ghokapi ghaghalembakiki mu shelia jenjenu. 13Bhana bhabhu ambabhu ngachebhajimanyi shelia ajeji, ibhapalika bhajowanaje na kulibhola kuntopela Bambo Chapanga, Chapanga winu, machobha ghokapi ghamwitamaje mu inchi jela jendomboka kwihi ja nkoka Yoludani kujenda kujitama.”

Malaghalakilu gha kujomulela ghaka Bambo Chapanga kwaka Musa

14Bhela, Bambo Chapanga akumpwaghi Musa, “Lingalyaje, lichobha laku la kupotela liheghalile, undoha Yoshua, na muhikaje mabhokapi mu lihema la kuhimanganila, nahuli numpekyaje malaghalakilu ghaki gha lihengu.” Bhela Musa na Yoshua bhakapiti, na kubhonikana mkati ja lihema la kuhimanganila. 15Bambo Chapanga akabhonakini mu Lihema mu nguzu ja lihundi, nalombi lihundi heli lakajemiki panani ja ndyangu wa kujingalila mu Lihema.

16Bhela Bambo Chapanga akumpwaghi Musa, “Lingalyaje, wehapa anaupotilaje na kujenda kutaghakika papamu na akahokolu bhaku, na anaujomwili kupotela bhandu abhabha anabhatumbulaje kuneka nepani na kujenda kuijojabhela ichapanga ya chigheni ya mu inchi jebhajenda kutama mkati jaki. Anabhanekaje na kuheketa lulaghilu lwangu lonahengiki nabhu. 17Panihapa inyela yangu anaibhelalaje panani jabhu, nanatu ananabhalekaje na kubhahiya pamihu jangu, nabhombi anabhayonangikaje. Mahakau ghamaheli na mang'ahiku ghamaheli anaihikaje panani jabhu, mbaka pabhipwaghaje, ‘Bho, mahakau ghangani le ghahika panani jitu maghambu Chapanga ngacheabhi pachilanda jitu?’ 18Chakaka nanatu nganabhajangatili lichobha leniheli, maghambu bhahengiki mahakau ghokapi hagha kwa kuing'anambukila ichapanga nayenge.

19“Bhela sajenu ulembaje lujembu londone, ubhabholaje bhandu bha Izilaeli na kubhalaghalakila bhajembaje, nahuli lupataje kubha mlandilu wangu, pachilanda ja bhandu bha Izilaeli. 20Ananyomwili kumpeleka mu inchi jejibhi na mahibha na buse, inchi jenakabhalaghili akahokolu bhabhu kwa kulapa, nabhombi anabhakuliki na kutupila na kuneng'anela, anabhang'anambukaje na kuijojabhela ichapanga nayengi, kwa kunyojoha nepani na kuheketa lulaghilu lwangu. 21Mahakau na mang'ahiku ghanihagha anaghajomwili kuhika panani jabhu, lujembu alolu analubhalandilaje pachilanda jabhu, maghambu ngalwijewakeki na bhabhelakeka bhabhu. Ndandi manyi lijambu lela lebhaholalela kulihenga, hata mangani ngachenabhajingihi mu inchi jenakabhalaghili kwa kulapa.”

22Bhela, Musa akalulembiki lujembu loniholu mu lichobha leleli, na kubhabhola bhandu bha Izilaeli.

23Bhela Bambo Chapanga akundaghalaki Yoshua mwana waka Nuni, akapwaghaje, “Ukangamalaje na ukubhaje na makili, maghambu anaubhapelakaje bhandu bha Izilaeli mu inchi jenabhalaghili kwa kulapa, nanatu namwete anangubhaje papamu na wehapa.”

24Bhela Musa paakajomwili kulemba malobhi gha shelia ajeji mu chitabu kutumbu pakutumbula mbaka pakujomukela, 25Musa akabhalaghalaki Bhalawi bhabhakabhi bhalitotola Lisanduku la Lulaghilu laka Bambo Chapanga, na kubhapwaghila, 26“Ntolaje Chitabu achechi cha Shelia, mkachibhekaje pambipi na Lisanduku la Lulaghilu laka Bambo Chapanga, Chapanga winu, nahuli chikubhaje ngati mlandilu pachilanda jinu. 27Maghambu nummanyi ntundu mombelile bhangakutii na mwembi na ing'omu. Ndingalyaje, ngati mkana kuntii Bambo Chapanga chikahi nepani mili papamu na mwehapa, bho, anamkotukaje kuntii mala palenga chikahi nepani anambotile? 28Mubhabhonganaje bhazee bhokapi bha makabila ghinu, na ihongozi bhinu, nahuli mbata kulonge nabhu malobhi ghangani koni bhakajowanyaje, nayombi mbengu na ndema ilandilaje panani jabhu. 29Maghambu manyi kubha nepani anambotili, chakaka anamkubha bhahakau nakanopi na kung'anambuka kuhuma mu indela jenundaghalaki kujijengalela. Mu machobha ghaghahika, mang'ahiku anaghumpataje kwa ndandi anamtenda mahakau palongi jaka Bambo Chapanga, na kuchochakela inyela yaki kwa mambu ghala ghamwihengaje kwa mabhoku ghinu.”

Lujembu lwaka Musa

30Bhela Musa akaghasomiki malobhi gha lujembu alolu palongi ja lipogha lokapi la bhandu bha Izilaeli, mbaka paghajomwike.