Kombukombu la Tolati 32

1“Mwenga mbengu na ndema, njowanyaje malobhi ghangu,

njowanya wichu ghala ghanongela.

2Mabholu ghangu na ghatonyaje ngati iyula,

na malobhi ghangu anaghabhajangatya bhandu bhabhajowanela.

Ngati lumeme lwa iyula,

molujangatila mimea kukola.

3Ndandi ananilitangazaje lihina laka Bambo Chapanga.

Na kila mundu apalika amanya kubha Chapanga witu nde nkolongwa namaa.”

4“Bambo Chapanga nde Lindalaghu la kubha lukwali,

mahengu ghaki ghokapi ghakamilike,

ndandi indela yaki yokapi nde ya chakaka.

Jombi nde Chapanga ndongwana, jwangakubha na uhakau,

jombi ahenga mambu gha chakaka na ghaghapalika.

5Mwehapa mlepiki kubha na ulongwana palongi jaki,

mwehapa nga mabhana bhaki kabhete kwa ndandi ja uhakau winu,

mwehapa nde chibheleku chihakau na chechihobhike.

6Bho, anana le nde indela ja kundepa Bambo Chapanga,

mwenga mabhandu bhang'ang'a na bhangakubha na mbulau?

Bho, jombi le nga Atati winu joambombike, joantendike na kumbeka kubha mwembi na makile?”

7“Ukombukaje machobha gha mwande, uholalyaje hyaka ya ibheleku yamaheli yeipetike.

Mubhalalukya akatati bhinu, nabhombi anabhumpwaghila,

ubhalalukyaje bhazee bhaku, nabhombi anabhakulandilaje.

8Chapanga Joabhile Kunani Nakanopi paakabhapekihi bhandu bha inchi nayengi upwelelu wabhu,

paakabhagabhinyi bhandu bhokapi,

akabhekiki malindakanilu kwa ndandi ja inchi, kwa kulengana na ubhalangiku wa bhandu bha Izilaeli.

9Maghambu pandu paka Bambo Chapanga nde bhandu bhaki,

bhabhelakeka bhaka Yakobo nde mali gha upwelelu waki.”

10“Akabhahimanili bhayongolota mu inchi ja lipololu,

na mulipololu litopu lelijoghoha.

Akungohiki na kundenda,

na akundendiki ngati lihu laki mweni.

11Ngati ngwahe joayonanga chinhuwi chaki,

na kuhomba homba panani ja makenda ghaki.

Akahatambula mapapanilu ghaki, nahuli kubhakamulakila,

na kubhatola panani ja mapapanilu ghaki.

12Bambo Chapanga kanjika jaki nde joakabhalongwihe,

wala ngachepakabhili na kichapanga wa chigheni papamu naku.”

13“Akabhatendiki bhakwelaje pandu pa inchi papajinwike,

nabhombi akabhalehiki mahunu gha mumighonda.

Akundetili buse kuhuma mu lindalaghu,

na mahuta gha zeituni kuhuma mu mizeituni jejibhi mu luhombi lwa maganga.

14Akabhapekihi mahibha ghaghagandiki gha ng'ombi na mahibha gha mambeleli,

papamu na mahuta gha bhanambeleli, na imbuhi, mambeleli makambaku kuhuma ku Bashani, na inganu jinyahi.

Na mkanywili divai jinyahi kuhuma mu mizabibu.”

15“Nambu bhandu bha Izilaeli bhakanenipi, na kulapula mateke,

bhakanenipi na kubha na chitambi, na kuneng'anela namaa.

Bhela bhakundekiki Chapanga joabhabhombike,

na kunjojoha Lindalaghu la Ukengaleku wabhu.

16Bhakuntendiki Chapanga kubha na wihu kwa ichapanga yabhu,

na kuntenda kubha na inyela kwa imong'umong'u yabhu ya mahakalilu.

17Bhakabhohiki nyambiku kwa majobhi, ambayu nga Chapanga,

bhakaijendili ichapanga ambayu ngachebhimanyi ng'o,

ichapanga yahenu yeyapitalile mu machobha gha henu kateki, ichapanga ambayu akahokolu bhabhu ngachebhitopile.

18Ngachemunkomboka Lindalaghu joambelike,

mundibhalili Chapanga joambeliki mwehapa.”

19“Bambo Chapanga akaliweni lijambu leniheli na kubhaleka,

akabhakaniki bhana bhaki bha chikambaku na bha chimbomba.

20Panihapa akapwaghike, ‘Nepani nganabhajangati kabhete,’

na anamonaje ujomukelu wabhu anaukubha kike.

Maghambu nde chibheleku chechibhi na ing'omu namaa, na nde bhana bhangakuhobhaleka.

21Bhandendiki ngubha na wihu kwa bhombi kuitumakila ichapanga ya upuhe,

na bhandendiki ngubha na inyela kwa imong'umong'u yabhu.

Nanatu ananabhatendaje bhabhonaje wihu kwa bhandu bhala ambabhu nga litaifa,

ananabhatendaje bhahakalyaje,

kwa kutumila litaifa la bhandu bhang'ang'a.

22Maghambu moto upambakiki kwa inyela yangu,

na uyonanga mbaka pahi kuwawa,

ujocha ndema papamu na mahunu ghaki,

na kujocha misingi ja itombi.”

23“ ‘Ananundikaje malapuliku panani jabhu,

na kubhalapula kwa mishali jangu mbaka jijomukaje.

24Anandumaje injala ngolongwa kwabhu bhakombalaje,

na kubhayonanga kwa itamu ihakau.

Anambelakaje hinyama yeibhili na minu ghaghatema kubhayonanga,

na majoka ghaghabhi na chikau ghaghakwabha muluhombi.

25Ngondo anajipelakyaje nyiwa yamaheli kunja,

na mumanyumba ghabhu anachitawala choghoi.

Akakombu bhabhu akanalomi na akambomba anabhayonangikaje,

bhelabhela kwa bhana bhang'eng'a na bhazee bhabhabhi na huliya.

26Nakapwaghiki kubha ananabhapechangana kutali,

na kuhungula kombukombu labhu pachilanda ja bhandu.

27Nambu nganabhaleki maadui bhabhu bhalilumbalyaje,

maadui bhabhu ngabhihika kupwagha malobhi gha upuhe,

ngabhihika kupwagha kubha bhaweziki kubhayonanga, nanatu Bambo Chapanga ngachenhengiki chindu chokapi chela kwabhu.’ ”

28“Bhaizilaeli nde litaifa langakubha na malangu,

ngachebhabhi na umanyi mkati jabhu.

29Ngati bhakabhi na malangu, bhakabya bhaghamanyi aghagha,

na kuholalela ujomukelu wabhu anaukubha bhole.

30Bho, mundu jumu aweza bholi kubhatopola bhandu elufu jimu,

au bhandu bhabheli kubhatopola bhandu elufu komi,

ngati Lindalaghu labhu ngaakabhalombisi,

na Bambo Chapanga wabhu ngaakabhalekike?

31Hata adui bhitu bhajetakile kubha ichapanga yabhu ngachelibhi na makili

ngacheibhi na makili ngati moabheli Chapanga wa Izilaeli.

32Ndandi, mizabibu jabhu jihuma mu mizabibu ja ku Sodoma, na mighonda ja Gomola,

zabibu yabhu itwelili ubhabha, na ishada yaki nde ibhabha.

33Divai jabhu nde ngati chikau cha lijoka, jibhili na chikau chikali cha lijoka.”

34“Bho, aghagha le ngacheghabhekakiki kughaghoha kwangu nepani?

Na kughakongela mu yumba yangu ya chikoku?

35Kulepa kisasi nde lihengu langu nepani, nanatu ananepaje,

chikahi magholu ghabhu paghinyelambukaje, maghambu lichobha labhu la chilelu lihenghalile,

na ujomukelu wa mambu ghaghabhapataje uheghalili namaa.

36Kwa kubha Bambo Chapanga anaabhakengalya bhandu bhake,

na kubhabhonela chiha bhatumika bhake,

chikahi paanabhonaje kubha makili ghabhu ghajomwiki,

wala njeta joahighalile, mtumwa wala joabhi wakulijeka.

37Bhela Bambo Chapanga anaapwaghaje, ‘Ibhi kwaku ichapanga hinu, lindalaghu lemukalikembalile?

38Ibhi kwaku ichapanga yela yeyakuliki nyambiku hinu,

na kunywa divai na nhupu hinu ya kunywa?

Bhela, na ijumukaje na kunjangatila mwehapa. Na kubha bhalonda bhinu!’ ”

39“ ‘Henu mmanyaje kubha Nepani nde Chapanga,

wala njeta Chapanga jongi nambu Nepani.

Nepani ngoma, na Nepani niyoha, nyeghela mabhanga na kulamiha,

wala njeta joaweza kukengalela kuhuma mu mabhoku ghangu nepani.

40Ndandi ngweha chiwoku changu kunani kumahunde,

na kulapa: Chakaka ngati nepani mondamila mileli,

41chikahi panihyola lipanga langu lelimelameta,

na kuhatambula chiwoku changu nahuli kutemula,

ananabhalepa kisasi adui bhangu,

na kubhalapula bhala bhabhanhakalila nepani.

42Ananijitendaje mishali jangu jiholula mwahi,

na lipanga langu analabhakomaje bhandu bhabhambenga nepani.

Analitepatyaje mwahi wa bhala bhabhakomakiki na bhabhatolakiki kwa makili,

na kuheketa mimutu ja ihongozi bha maadui.’ ”

43“Muhekalyaje, mwenga bhandu bha inchi nayengi, papamu na bhandu bhaki,

maghambu anaalepaje kisasi cha mwahi wa bhatumika bhaki.

Anaalepaje kisasi kwa maadui bhaki,

na kutenda ujonganeshu kwa ndandi ja inchi ja bhandu bhaki.”

44Musa na Haluni mwana waka Nuni, bhakahiki na kupwagha malobhi aghagha ghokapi gha lujembu alolu palongi ja bhandu bhokapi bha Izilaeli nahuli bhajowanyaje.

Malaghalakilu gha kujomulela ghaka Musa

45Bhela Musa paakajomwili kubhapwaghila bhandu bha Izilaeli malobhi ghanihagha ghokapi, 46akabhapwaghile, “Mughabhekaje mumitima jinu na kughatii malobhi ghokapi ghanuntangazila lichobha la lalenu. Impalika mubhalaghalakyaje bhana bhinu, nahuli bhaghaghohaje na kughajengalela malobhi ghokapi gha shelia jenjenu. 47Maghambu shelia jenjenu nga malobhi matopu pela kwinu, nambu nde womi wino. Kwa kujengalela shelia ajeji anantamaje matamu malachu mu inchi jela jendomboka nkoka Yoludani kujenda kujitama.”

48Mu lichobha leleli, Bambo Chapanga akalongi na Musa, akapwaghaje, 49“Ukwelaje mu chitombi achechi cha Abalimu, mbaka ku chitombi cha Nebo, chechibhili mu inchi ja Moabu, kujenda mbaka ku muchi wa Yeliko, na ukajilingaje inchi ja Kanaani, inchi jenabhapekeha bhandu bha Izilaeli kubha upwelelu wabhu. 50Bhela anaupotilaje ku chitombi chenihechi na kutaghakika kunani kuchitombi hoku, ngati moakapotile ndongu waku Haluni, na kutaghakika kunani ja chitombi cha Holi. 51Maghambu mwehapa mabhokapi mwabheli mkahekiti ulongwana winu kwangu nepani palongi ja bhandu bhokapi bha Izilaeli chikahi pamukabhili pa machi gha Meliba, pambipi na muchi wa Kadeshi, ku lipololu la Sini, na kwa ndandi mkalepiki kulangiha utopelu wangu pachilanda ja bhandu bha Izilaeli. 52Bhela anaujibhona pela inchi cha kutali palongi jaku, nambu wehapa ngawijendi kujingila mu inchi jeniheji jenabhapekeha bhandu bha Izilaeli.”