Kombukombu la Tolati 33

Musa aghapengalela makabila gha Izilaeli

1Ajeji nde mbengalelu jaka Musa, mundu waka Chapanga, jeakabhapengalili bhandu bha Izilaeli mangane ja kupotela kwaki.

2Akapwaghike, “Bambo Chapanga akahikiki kuhuma ku chitombi cha Sinai,

akatupitalili ngati lyobha kuhuma ku chitombi cha Seili,

na kumulika kuhuma pa chitombi cha Palani.

Akahikiki papamu na bhatumika bhaki bha kunani kumahunde makomi elufu,

upambala wa chiwoku chaki cha kumalelelu, pakabhi na shelia ja moto.

3Chakaka wehapa nde weubhapala makabila gha bhandu,

bhahuhu bhaku bhokapi bhabhi mumabhoku ghaku.

Bhokapi bhatama palongi ja magholu ghaku,

na anabhajopalyaje malobhi ghokapi kuhuma kwaku.

4Musa akatulaghalakili kutii shelia jenjenu,

nde upwelelu wa lipogha lokapi laka Yakobo.

5Bhela Bambo Chapanga akabhi nkolongwa kwa bhandu bha Izilaeli,

pabhakalibhongini ihongozi bha bhandu, papamu na makabila ghokapi gha Izilaeli.”

6Musa akalongili panani ja likabila laka Leubeni,

“Leubeni na atamaje, ngayipotela,

wala bhandu bhaki ngabhikubha bhachokope.”

7Malobhi gha mbengalelu gha likabila laka Yuda ghakabhi aghagha, akapwaghike,

“Wenga wa Bambo Chapanga, ujowanyaje chilelu chaka Yuda,

unkelabhuhaje kabhete kwa bhandu bhaki bhangi.

Ukomanaje kwa mabhoku ghaku kwa ndandi jaki,

nanau ukubhaje ujangatilu waki kubhokana na maadui bhaki.”

8Kwa likabila laka Lawi, akapwaghike,

“Wenga wa Bambo Chapanga ulipekyaje likabila laka Lawi malobhi ghaku gha Sumimu na Ulimu,

kwa bhatumika bhaku bhalongwana,

ambabhu ukabhalengiki ku Masa, na kulongalanela naku pa machi gha Meliba.

9Akapwaghiki anana kubhokana na tati waki na mabhu waki,

‘Nepani ngachenumbwene,’ akabhajewiki bhalongu bhaki, wala ngacheakabhamanyi bhana bhaki.

Ndandi bhalijengalili lilobhi laku,

na kulukamula lulaghilu laku.

10Likabila laka Lawi bhabholaje bhabhelakeka bhaka Yakobo kuikamula amuli yaku, na bhandu bha Izilaeli shelia yaku.

Anabhahuwa ubani palongi jaku, na nyambiku jihilima ya kujochakeka panani ja pandu paku pa kubhokeha nyambiku.

11Wenga wa Bambo Chapanga, ughapengalyaje mali ghaki ghokapi,

na ughajetakyaje mahengu gha mabhoku ghabhu.

Ughahekataje makili gha maadui bhabhu,

na bhala bhabhunhakalila, ngabhijinuka kabhete.”

12Kwa likabila laka Benyamini, akapwaghike,

“Aleli nde likabila lelipalakika na Bambo Chapanga, nalombi litama lukwale pambipi jaki.

Maghambu alilenda muhi jokapi,

na kutama pachilanda jabhu.”

13Kwa likabila laka Yusufu, akapwaghike,

“Bambo Chapanga na ajipengalyaje inchi jake, kwa mbengalelu jinyahi ja lyangame kuhuma kunani kumahunde,

na kwa chemuchemu ya machi ghaghabhi kokunyoliki pahi nakanopi.

14Apengaliwaje kwa mapambiku manyahi nakanopi ghaghapili kwa lyobha,

na kwa mapambiku manyahi nakanopi ghaghapambika mu kila mwehi.

15Apengaliwaje kwa mapambiku manyahi nakanopi gha itombi ya mwande, na mahunu ghamaheli gha itombi ya mileli.

16Inchi jaki jokapi jitwelalaje ghaghabhi ghambone,

jipengaliwaje na wamboni waka Bambo Chapanga,

joakabhi alongela kupetela mu chitutu chechibhelala moto chela.

Mbengalelu ayeyi yokapi na ikubhaje kwa bhandu bha likabila laka Yusufu,

maghambu jombi nde joakabhi nkolongwa pachilanda ja bhalongu bhaki.

17Ulumbalilu waki nde ngati ulumbalilu waka mbelakeka wa kutumbula wa likambaku la ng'ombi,

na manyelu ghaki nde manyelu gha chinyama chechilowakeka nyati.

Anaatumilaje manyelu ghanihagha kubhakanga bhandu bha inchi yokapi,

mbaka ku ujomukelu wa inchi.

Anabhakubhaje makomi elufu ghaka Efulaimu,

nabhombi nde maelufu ghaka Manase.”

18Kwa likabila laka Zabuloni, akapwaghike,

“Uhekalyaje wa Zabuloni, chikahi cha kupita kunja,

na wenga wa Isakali, uhekalyaje mu mahema ghaku.

19Anabhabhalohaje bhagheni bhahikaje kuitombi,

na kubhoha nyambiku yeijetakalewa konihoku.

Maghambu bhombi anabhapataje wamaheli wa hindu yabhu kubhokana na bahali,

na hindu yeihiyakiki mumaheku ja luhanga.”

20Kwa likabila laka Gadi, akapwaghike,

“Apengalikaje Chapanga joampekeha Gadi pandu pakolongwa.

Gadi atama konihoku ngati lihimba,

nahuli ahekataje chiwoku na lutohutohu lwa mmutu.

21Akalihaghulili pandu panyahi kupeta pokapi,

maghambu konihoku nde kolabhekakiki lifungu laka mboha shelia.

Akahikiki papamu na ihongozi bha bhandu, na kuhenga mpangu waka Bambo Chapanga,

na ndemulu yaki kwa bhandu bha Izilaeli.”

22Kwa likabila laka Dani, akapwaghike,

“Dani nde mwanalihimba,

joahomba kuhuma ku Bashani.”

23Kwa likabila laka Nafutali, akapwaghike,

“Nafutali atwelili namaa upendeleu waka Bambo Chapanga,

najombi atwelili mbengalelu yaki, upwelelu waku anaukubhaje ku upambala wa kolijibhi lyobha na kunkache ja nhwanga wa Galilaya.”

24Kwa likabila laka Asheli, akapwaghike,

“Bhana bhaka Asheli na bhapengaliwaje nakanopi kupeta bhangi,

jombi na ajetakaliwaje pachilanda ja bhalongu bhaki,

inchi jaki na jitwelalaje kwa wamaheli wa mikongu ja mahuta gha zeituni.

25Milyangu mikolongwa ja michi jaku na jijighalikaje na kabali ya choma na shaba,

na makili ghaku anaghalenganaje na machobha ghaku gha kutama.”

26“Mwenga mabhandu bha Izilaeli, njeta jongi joalengana na Chapanga,

joahika koni akweliki panani ja mbengu nahuli kutujangatila,

na panani ja mahunde mu ulumbalilu waki.

27Chapanga wa mileli nde matamu ghaku,

na mabhoku gha mileli ghabhi pahi jaku.

Akabhatopwili kutali adui bhaku palongi jaku,

na kukulaghalakila, ‘Ubhayonanga bhokapi.’

28Bhela bhandu bha Izilaeli bhatama lukwale, na bhabhelakeka bhaka Yakobo kanjika jabhu,

mu inchi jejitwelile mahunu na divai jahenu, na pandu ambapu mbengu jaki jihabhuha iyula.

29Mpengaliwi mwenga, Bhaizilaeli!

Bho, nde nane joabhi ngati mwehapa,

mabhandu mwenkengaliwi na Bambo Chapanga?

Jombi nde ngau jinu na ujangatilu winu, na lipanga la ulumbalilu winu.

Adui bhinu anabhahika palongi jinu nahuli kundobha mubhabhonila chiha,

nanamu anamupakanyataje pandu pabhu papajinwike.”