Kombukombu la Tolati 34

Kupotela kwaka Musa

1Bhela, Musa akakweliki kuhuma ku uwanda wa Moabu, na kujenda mbaka ku chitombi cha Nebo, na kukwela mbaka panani nakanopi ja chihongu cha Pisiga, ku upambala wa kolipita lyobha wa Yeliko. Panihapa Bambo Chapanga akundangihi inchi jokapi: Kutumbula ku Gileadi mbaka ku Dani, 2pandu pokapi pa Nafutali, inchi jokapi jaka Efulahimu na Manase, inchi jokapi ja Yuda mbaka ku bahali ja Meditelania, 3pandu pajomu ku upambala wa kunkache wa Yuda, uwanda wokapi wa libondi la Yeliko, muchi wa Mitende, mbaka ku Soali. 4Bhela Bambo Chapanga akumpwaghi Musa, “Ajeji nde inchi jenakabhalaghili Ibulahimu, Isaka na Yakobo kwa kulapa, nakapwaghaje, ‘Ananabhapekyaje bhabhelakeka bhabhu.’ Bhela nukulangihi wehapa ujibhonaje kwa mihu ghaku, nambu ngawilomboki kujingi monihomu.”

5Bhela, Musa mtumika waka Bambo Chapanga, akapotili ku inchi ja Moabu hoku, ngati Bambo Chapanga moakapwaghile. 6Bambo Chapanga akuntaghiki ku libondi la inchi ja Moabu, pambipi na Beti Peoli, nambu njeta joalimanyi litengeli laki mbaka lalenu. 7Musa akabhi mundu wa hyaka mia jimu na ishilini chikahi paakapotile. Hata bhela mihu ghaki ghakabhi ghakali na makili gha kulola wichu, wala makili gha hyegha jaki ngacheghakepike.

8Bhandu bha Izilaeli bhakaombulizi kupotela kwaka Musa kwa chikahi cha machobha selasini ku inchi ja uwanda wa Moabu. Bhakahengiki bhenibhela mbaka machobha gha maombulezu kwa ndandi ja kupotela kwaka Musa ghakajomwike.

9Bhela Yoshua, mwana waka Nuni, akabhi atwelili roho ja mbulau, maghambu Musa akabhi ambekili mabhoku ghaki panani jaki. Panihapa bhandu bha Izilaeli bhakunjowanili Yoshua, na kuhenga ghokapi ngati Bambo Chapanga moakundaghalaki Musa.

10Kutumbula chikahi chenihechi, ngacheapitalili mlota jongi ngati Musa, ambaju Bambo Chapanga akummanyi pamihu kwa pamihu. 11Njeta mlota jongi joakahengiki nginyulila na ngangachu ngati yela ambayu Bambo Chapanga akuntumiki Musa kuhenga ku inchi ja Misili, yani kwaka Falao, kwa bhatumika bhaki bhokapi, na kwa inchi jaki jokapi. 12Ndandi njeta mlota jongi jokapi jola joalabhalili kulangiha makili ghamaheli, au kuhenga mambu makolongwa gha kujoghoha, ngati moakahengi Musa palongi ja bhandu bhokapi bha Izilaeli.