Yoshua 1

Bambo Chapanga andaghalakila Yoshua kujitola mateka inchi ja Kanaani

1Paakajomwiki Musa ntumika waka Bambo Chapanga, Bambo Chapanga akumpwaghi Yoshua mwana waka Nuni, njangatila waka Musa, 2Mtumika wangu Musa apotile. Henu wehapa papamu na bhandu bhokapi abhabha, muliandiyaje kulomboka nkoka aghoghu wa Yoludani kujingila mu inchi ambuju numpekeha mwehapa mabhandu bha Izilaeli. 3Kila pandu lwaju lwa magholu ghinu pamwikanyataje numpekihi mwehapa, ngati bhela monukundapile Musa. 4Malindakanilu gha inchi jinu anaghakubha anana: Kunkache nde lipololu, kungonde nde itombi ya Lebanoni, kolipita lyobha nde nkoka ghola ukolongwa wa Eufulati, kupetela mbaka inchi jokapi ja Bhahiti, mbaka bahali ngolongwa ja Meditelania jejibhili upambala wa kolijibhi lyobha. 5Nga mundu jokapi joanaakuwezaje wehapa machobha ghokapi gha matamu ghaku. Ngati bhela monabhelili papamu na Musa, nde bhelabhela monibhelilaje papamu na wehapa, nganakuleki wala nganakukepakele. 6“Ukubhaje na makili na mtima wa kukangamala, maghambu wehapa nde weubhalonguaje bhandu abhabha kujenda kujitola nchi jenabhalaghile kubhapekeha akahokulu bhabhu. 7Ukubhaje na makili, na ukangamalu wamaheli. Ukangamalaje kukamula shelia yokapi yeakupeki Musa mtumika wangu, ngawaileka shelia yangu, nahuli upata kufanikiwa pokapi paujenda. 8Ngawilibhalila kulibhola chitabu achechi cha Shelia chikahi chokapiu, nambu ughaholalya malobhi ghaki ikilu na muhi, nahuli upata kulingalila kuhenga ngati moipalakila kubhokana na malobhi ghokapi ghaghalembakiki mkati jaki. Panihapa nde anaufanikiwaje, na kuneng'anela pokapi paujenda. 9Bho, nga nepani le nenukulaghalakile? Ukubhaje na makili na mtima wa kukangamala. Ngawijoghopa wala ngawihekateka mtima, kwa kubha Bambo Chapanga, Chapanga waku, anaakubhaje papamu na wehapa pokapi pawijendaje.”

Yoshua abhalaghalakila bhandu

10Bhela Yoshua akabhalaghalakili ihongozi bha manjolinjoli, akapwaghaje, 11Mpetaje mu makambi ghokapi na kubhalaghalakila bhandu, “Mbekaje tayali ilebhi hinu. Machobha ghatatu kutumbu sajeno anandombukaje nkoka Yoludani nahuli kujingila na kujitama inchi ambaju Bambo Chapanga, Chapanga winu, ampekeha mwehapa kubha jinu mabhete.”

12Kabhete Yoshua akabhapwaghili bhandu bha likabila laka Leubeni, likabila laka Gadi na nusu ja likabila laka Manase, 13“Mkombukyaje lilaghalakilu laka Musa mtumika waka Bambo Chapanga leakumpekihe, ‘Bambo Chapanga, Chapanaga winu ampekeha mwehapa pandu pa kupomulela, najombi ampekihi inchi ajeji upambala wa kolipita lyobha mwa nkonka Yoludani.’ 14Akabhahanu bhinu, bhana bhinu na hinyamba jinu anajitama mu nchi heji Musa jeampekihi upambala wa kolipita lyobya wa Yoludani, nambu akanalomi bhokapi bhabhaweza kukomana ngondo, koni bhakabya na silaha bhalombukaje nkoka na kubhalongulela bhalongu bhabhu, nahuli mpataje kubhajangatila bhalongu bhinu, 15Bambo Chapanga ampekyaje chiheku mwehapa papamu nabhu, ngati moakumpekihe mwehapa, nabhombi bhelabhela bhatamaje mu inchi jebhapekewa na Bambo Chapanga, Chapanga winu. Bhela mwikelabhukaje mu inchi ambaju nde jinu mabhete na kutama monihomu, inchi ambaju mkapekiwi na Musa, mtumika waka Bambo Chapanga, ku upambala wa kolipita lyobha wa nkoka Yoludani.”

16Panihapa bhakamuyangiki Yoshua, “Chokapi cheutulaghalakile anatuhengaje, na pokapi pawatutumaje anatujendaje. 17Ngati bhela motukabhi tunjowanela Musa mu mambu ghokapi, bhenibhela nde motwakujowanyaje wehapa. Bambo Chapanga, Chapanga waku, akubhaje papamu na wehapa pela, ngati bhela moakabhelile papamu na Musa. 18Mundu jokapi joanakotukaje kutii amuli jaku, kukana kughatii malobhi ghaku, au lijambu lokapi lela lewandaghalakyaje, anaakomakikaje. Nambu wehapa ukubhaje na makili, na ukangamalu pela!”