Yoshua

Chitabu chaka

Yoshua

Ulongulelo

Chitabu chaka Yoshua chijendalela kulandila histolia ja litaifa la Izilaeli koni chakatumbulaje pandu pala ambapu Chitabu cha Kombukombu la Tolati pachijomukela. Chikahi Chitabu chaka Yoshua pachitumbula kulandila kwaki, Bhaizilaeli bhakabhili bhabhekiki likambi ku upambala wa kolijibhi lyobha wa nkoka Yoludani. Chitabu chenu chilongalela ntundu Bhaizilaeli mobhalombukile nkoka wa Yoludani na kubhashinda bhenei bha inchi ja Kanaani, koni bhakabyaje pahi ja ulonguheku waka Yoshua joakumpwelile Musa ngati chiongozi wa litaifa. Bhakahengiki bhenibhela maghambu Chapanga akabhalaghalakili bhahengaje bhenibhela. Mu lijambu aleli, Chapanga akabhili atimiza chilanga cheakalaghile kubha anaabhapekyaje bhabhelakeka bhaka Ibulahimu inchi jeniheji ambaju jakabhili jitamakika na Bhakanaani (Utumbulilu 12:7).

Ngacheimanyikana kubha nde nane joakachilembiki chitabu chaka Yoshua. Mu chikahi yengi, mlemba antenda mundu kuholakela kubha mweni akabhili ashiliki matukiu ghokapi ghaghakabhili ghapitalila (kwa ulenganesu, Yoshua 5:1, 6). Kubhokana na ndandi ajeji, bhasomi bhamaheli bha mambu gha Bibilia bhaholakela kubha Yoshua mweni nde joakalembiki pandu pakolongwa pa chitabu chenu. Bhelabhela nde chakaka kubha mundu jongi tofauti na Yoshua akalembiki pandu pakumu pa chitabu chenu, ngati bhela, malobhi gha kupotela na kutaghakika kwaka Yoshua (Yoshua 24:29). Bhasomi bhangi bhahobhalela kubha chitabu chenu chakalembakiki ngati hyaka 800 baada ja lijambu leniheli kupitalila. Mambu ghaghalongaleka mkati ja Chitabu chaka Yoshua iwezikana ghakapitalili mu chaka cha 1250 K. K. Ngati hyaka 40 baada jaka Falao Lamesesi kutumbula kutawala inchi ja Misili. Lamesesi ajoju nde mtawala joaholaleka kubha akatawili inchi ja Misili mu chikahi bhandu bha izilaeli pabhakabhili bhabhoka mu Misili (Kubhoka 1:11).

Ghaghabhihomu

Sula ja 1 mbaka ja 5:12 ilongalela ntundu Bhaizilaeli mobhalombukile nkoka Yoludani na kujingila mu inchi ja Kanaani.

Kabhete mu sula ja 5:13 mbaka sula ja 12 ilongalela mipangu ja Bhaizilaeli kujilapula na kubhaweza bhandu bha inchi ja Kanaani.

Paghajomwiki ghanihagha, sula ja 13 mbaka ja 21 ilongalela ntundu inchi ja Kanaani mojaghabhakike kwa makabila ghokapi komi na ghabheli gha Izilaeli.

Kujomulela, sula ja 22 mbaka ja 24 ilandila ntundu makabila ghakumu moghakelabhukile ku upambala wa kolipita lyobha wa nkoka Yoludani, malobhi gha kujomulela ghaka Yoshua kwa litaifa la Izilaeli, kupotela na kutaghakika kwaki papamu na ntundu Bhaizilaeli mobhakatendile kwa kukelabhukila lulaghilu lwabhu na Chapanga.