Yoshua 20

Michi ja kukembalela

Hesabu 35:9-34; Kombukombu la Tolati 19:1-13

1Bhela Bambo Chapanga akumpwaghi Yoshua, 2“Ubhapwaghilaje bhandu bha Izilaeli, bhahaghulaje michi ja kukembalela, ngati monalaghalakile kwa kupetela chiwoku chaka Musa. 3Nahuli mundu jokapi anaankomiki mundu panga kuholakela, na panga kumanya, apataje kukembalela konihoku. Anapakubhaje pandu pa kukembalela kwinu mwehapa, kuntila mundu jola joapala kulepa kisasi kwa ndandi ja mwahi. 4Paakembalela mu ghumu wa michi ajeji, ajemaje mu ndyangu ukolongwa wa kujingalila muchi ghonihoghu, na kubhalandila bhazee bha muchi ghonihoghu panani ja malobhi ghaki. Panihapa anabhunjopalyaje mu muchi wabhu, na kumpekeha pandu, nahuli apataje kutama pachilanda jabhu. 5Ngati mundu joapala kulepa kisasi anaanjengalili, bhazee bha muchi ghonihoghu ngabhumpekeha mundu jola joankomiki njaki, maghambu akunkomiki njaki panga kuholakela, wala ngacheakunhakalili kutumbu pakutumbula hapa. 6Mundu hoju joankomiki njaki anaatamaje mu muchi ghonihoghu, mbaka payijemaje palongi ja uhimanganu nahuli kutemuliwa na mbaka payipotilaje mpenganyambiku nkolongwa joatumika mu chikahi chenihechi. Panihapa aweza kubhuja kunyumba jaki, ku muchi ambau akautiliki pakutumbula hapa.”

7Bhela bhakatengiki muchi wa Kadeshi mu Galilaya, ghoubhili mu inchi ja itombi ja Nafutali, Shekemu mu inchi ja itombi ya Efulaimu na Kiliati Aliba, yani Hebuloni mu inchi ja itombi ya Yuda. 8Bhelabhela kwihi ja kabheli ja nkoka wa Yoludani, upambala wa kolipita lyobha wa Yeliko, bhakahawili muchi wa Bezeli ghoubhili kulipololu, mu inchi ja uwanda ja likabila laka Leubeni, Lamoti mu Gileadi mu likabila laka Gadi, na Golani ku Bashani mu likabila laka Manase. 9Muizilaeli jokapi au ngeni jokapi joatama pachilanda jabhu anaankomiki mundu panga kuholakela, aweza kukembalela mu michi jeniheji jejitengakiki, nahuli ngayikomakeka na mundu jola joapala kulepa kisasi cha mwahi, mbaka payikubhaje ajemiki palongi ja uhimanganu wokapi.