Yoshua 19

Pandu pabhakapekiwi bhandu bha likabila la Simioni

1Likabila la kabheli kupata pandu pabhu kwa kulapula kula lakabhili laka Simioni kulengana na lukolu lwabhu. Upwelelu wabhu ukabhili pachilanda ja upwelelu wa likabila la Yuda. 2Michi jebhakapatiki likabila laka Simioni kubha upwelelu wabhu jakabhili Beeli Sheba, Sheba na Molada, 3na Hasali Shuali, Bala na Esemu, 4na Elitoladi, Betuli na Holima, 5na Sikilagi, Beti Malikaboti na Hasali Susa, 6Beti Lebaoti na Shaluheni. Michi ajeji jokapi jakabhili komi na jitatu, papamu na ijiji yaki.

7Michi jengi jebhakapekiwi jakabhili Aini, Limoni, Eteli na Ashani. Michi jokapi jakabhili nchechi, papamu na ijiji yaki. 8Papamu na ijiji yokapi yeiyongolota michi ajeji mbaka Baalati Beeli, yani Lama ghoubhili ku upambala wa kunkachi ja pandu pajomu. Aghoghu ukabhili nde upwelelu wa likabila laka Simeoni, kulengana na lukolu yabhu. 9Upwelelu wa bhandu bha likabila laka Simeoni ukahumiki mu pandu pa likabila la Yuda. Maghambu pandu pa bhandu bha likabila la Yuda pakabhili pakolongwa namaa kwabhu. Bhela bhandu bha likabila laka Simeoni bhakabhili na upwelelu mkati ja pandu pa likabila la Yuda.

Pandu pabhakapekiwi bhandu bha likabila la Zabuloni

10Likabila la katatu kupata pandu pabhu kwa kulapula kula lakabhili laka Zabuloni kulengana na lukolu lwabhu. Ulindakanilu wa pandu pa upwelelu wabhu ukajaghanili mbaka ku Salidi. 11Kuhuma konihoku ulindakanilu ukapiti ku upambala wa kolijibhi lyobha mbaka ku Malala, ukapetiki munkeghi ja Dabesheti, na kuhika mbaka ku kikoka chechibhili ku upambala wa kolipita lyobha pambipi na Yokineamu. 12Kuhuma ku Salidi, ukapiti ku upambala wa kolipita lyobha na kuhika mbaka ku ulindakanilu wa Kisiloti Uboli, na kujenda mbaka ku Dabelati, na kuhuma panihapa ukakweliki kujenda ku Yafia. 13Kuhuma panihapa ukajendalili ku upambala wa kolipita lyobha mbaka ku Gati Hefeli, na kuhika mbaka ku Eti Kasini, na kupitalila ku Limoni na kung'anambuka kujenda ku Nea. 14Konihoku ulindakanilu ukayongalwiti ku upambala wa kungondi mbaka ku Hanatoni, na kujenda kujomukela ku libondi la Ifita Eli. 15Jakabhili na michi ja Katati, Nahalali, Shimiloni, Idala na Beselehemu. Michi jokapi jakabhili komi na jibheli, papamu na ijiji yaki. 16Michi ajeji na ijiji yaki yakabhili upwelelu wa likabila laka Zabuloni, kulengana na lukolu yabhu.

Pandu pabhakapekiwi bhandu bha likabila la Isakali

17Likabila la kacheche kupata pandu pabhu kwa kulapula kula lakabhili laka Isakali kulengana na lukolu lwabhu. 18Pandu pabhu pakabhili muchi wa Yezileeli, Kesuloti na Shunemu, 19na Hafalaimu, Shioni na Anahalati, 20na Labiti, Kishioni na Ebesi, 21na Lemeti, Eni Ganimu, Eni Hada na Beti Pasesi. 22Ulindakanilu ghonihoghu ukahikiki mbaka ku Taboli, Shahasuma na Beti Shemeshi, na kujomukela ku nkoka Yoludani. Michi jokapi jakabhili komi na sita, papamu na ijiji yaki. 23Michi ajeji na ijiji yaki yakabhili nde upwelelu wa likabila laka Isakali, kulengana na lukolu yabhu.

Pandu pabhakapekiwi bhandu bha likabila la Asheli

24Likabila la kahanu kupata pandu pabhu kwa kulapula kula lakabhili laka Asheli kulengana na lukolu lwabhu. 25Pandu pabhu pakabhili michi ja Helikati, Hali, Beteni na Akishafu, 26na Alameleki, Amadi na Mishali. Upambala wa kolijibhi lyobha ulindakanilu wabhu ukahikiki mbaka ku muchi wa Kalimeli na Shiholi Libinati. 27Kuhuma konihoku ukang'anambwiki na kujenda ku upambala wa kolipita lyobha mbaka ku Beti Dagoni, na kulindakanila na likabila laka Zabuloni na libondi la Ifita Eli. Kuhuma panihapa ukapiti ku upambala wa kungondi mbaka ku Beti Emeki na Neyeli, na kujendalela kupeta kungondi mbaka ku Kabuli. 28Ukajendalili mbaka ku Abidoni, Lehobu, Hamoni, Kana, na kuhika mbaka ku muchi ukolongwa wa Sidoni. 29Ulindakanilu ghonihoghu ukang'anambwiki na kujenda ku Lama, na ku muchi wa Tilo ghoubhili na lumatu. Panihapa ukang'anambwiki kujenda ku Hosa, kujenda kupitalila kubahali ku inchi ja Akizibu, 30na Uma, Afeka na Lehobu. Michi jokapi jakabhili ishilini na jibheli, papamu na ijiji yaki. 31Michi ajeji na ijiji yaki yakabhili nde upwelelu wa likabila laka Asheli, kulengana na lukolu lwabhu.

Pandu pabhakapekiwi bhandu bha likabila la Nafutali

32Likabila la sita kupata pandu pabhu kwa kulapula kula lakabhili laka Nafutali kulengana na lukolu lwabhu. 33Ulindakanilu wabhu ukatumbwili ku Hefeli, na nkongu ukolongwa wa mwaloni ghoubhili ku Saananimu, na kupeta mbaka ku Adami Nekebu na Yabineeli mbaka ku Lakumu, na kujomukela ku nkoka wa Yoludani. 34Ulindakanilu ukajendalili ku upambala wa kolijibhi lyobha kujenda ku Azinoti Taboli na kupitalila ku Hukoki. Ukahikiki mbaka ku upambala wa kunkachi wa likabila laka Zabuloni, na kujenda mbaka ku upambala wa kolijibhi lyobha wa pandu pa likabila laka Asheli, na kuhika mbaka ku likabila laka Yuda ku nkoka wa Yoludani, ku upambala wa kolipita lyobha. 35Michi jejakabhili na lumatu jakabhili Sidimu, Seli, Hamati, Lakati na Kineleti, 36na Adama, Lama na Hazoli, 37na Kedeshi, Edilei na Eni Hasoli, 38na Iloni, Migidali Eli, Holemu, Beti Anati na Beti Shemeshi. Michi jokapi jakabhili komi na tisa, papamu na ijiji yaki. 39Michi jeniheji papamu na ijiji yaki yakabhili nde upwelelu wa likabila laka Nafutali, kulengana na lukolu lwabhu.

Pandu pabhakapekiwi bhandu bha likabila la Dani

40Likabila la saba kupata pandu pabhu kwa kulapula kula lakabhili laka Dani, kulengana na lukolu lwabhu. 41Pandu pa upwelelu wabhu pakabhili na michi ja Sola, Eshitaoli na Ili Shemeshi, 42na Shaalabini, Aiyaloni na Itila, 43na Eloni, Timuna na Ekuloni, 44na Eliteke, Gibetoni na Baalati, 45na Yehudi, Bene Belaki na Gatilimoni, 46na Me Yalikoni, Lakoni, papamu na ulindakanilu ghoukabhili pambipi na Yafa. 47Nambu bhandu bha likabila laka Dani bhakang'ahakiki namaa kutamila pandu pabhu, bhela bhakakweliki kujenda kuulapula muchi wa Leshemu. Bhakautoliki mateka, na pabhajomwili kubhakoma bhenei bhokapi monihomu kwa lipanga, bhakatami monihomu, na kuupekeha lihina laka Dani, kwa kujengalela lihina laka Dani hokolu wabhu. 48Michi ajeji na ijiji yaki yakabhili nde upwelelu wa likabila laka Dani, kulengana na lukolu lwabhu.

Pandu paakapekiwi Yoshua

49Bhela bhandu bha Izilaeli pabhakajomwili lihengu leniheli la kughabhana pandu pokapi pa inchi, bhandu bha Izilaeli bhakumpekihi Yoshua, mwana waka Nuni upwelelu pachilanda jabhu. 50Ngati Bambo Chapanga moakalaghalakile, Bhaizilaeli bhakumpekihi muchi ambau akauhawili mweni, yani Timunati Sela ghoubhili mu inchi ja itombi ya Efulaimu. Najombi akauchengiki muchi na kutama konihoku.

51Bhela, panihapa nde pandu ambapu mpenganyambiku Eleazali na Yoshua mwana waka Nuni, papamu na ihongozi bha lukolu ya makabila gha bhandu bha Izilaeli ghabhaghabhiki kwa kulapula kula ku Shilo palongi jaka Bambo Chapanga, pundyangu wa kujingalila mu Lihema Lihuhu. Bhela, bhakajomwili kujighabha inchi.