Yoshua 18

Ughabhaniku wa inchi jejihighalile

1Bhela uhimanganu wokapi wa bhandu bha Izilaeli bhakahimangini papamu ku Shilo, na kuchenga Lihema Lihuhu. Inchi jeniheji jakabhili pahi ja utawala wabhu. 2Nambu ghakahighalili makabila saba gha Izilaeli ambaghu ghakabhili ghakali ngacheghapatiki upwelelu wabhu. 3Bhela Yoshua akabhapwaghili Bhaizilaeli, “Bho, anandendalyaje mbaka lile nahuli kujingila na kujitama inchi ambaju Bambo Chapanga, Chapanga wa akahokolu bhinu, ampekihe? 4Muhaghulaje bhandu bhatatu kuhuma mu kila likabila. Nanatu ananabhatumaje bhandu bhanihabha kujenda kujikaghula inchi jeniheji, na kunembela mapalu ghabhu kubhokana na upwelelu wa kila likabila, na panihapa bhinetilaje malobhi ghaki. 5Mujighabhaje inchi jeniheji mu pandu saba. Yuda anaahighalyaje na pandu paki ku upambala wa kunkachi hoghu, na makabila ghaka Yusufu ku inchi jaki ku upambala wa kungondi hoku. 6Ananjomwili kulemba malobhi gha pandu saba pa inchi jeniheji, mughaletaje kwangu nepani, nanatu ananundapulya kula pambani palongi jaka Bambo Chapanga, Chapanga witu. 7Nambu Bhalawi ngabhipati pandu pokapi pala pachilanda jinu, maghambu upwelelu wabhu nde kubha bhapenganyambiku na kuntumakila Bambo Chapanga. Nabhombi Gadi, Leubeni na nusu ja likabila laka Manase bhajomwili kupata upwelelu wabhu ku upambala wa kolipita lyobha wa nkoka Yoludani, ambaku Musa mtumika waka Bambo Chapanga akajomwili kubhapekeha.”

8Bhela, bhandu bhanihabha pabhakabhi bhabhoka na kujenda kujikaghula na kulemba malobhi gha inchi jeniheji, Yoshua akabhalaghalakile, “Njendaje mkapetaje pachilanda ja inchi jeniheji, na kulemba malobhi ghaki, na muhikaje kunetela, nanatu ananapulaje kula palongi jaka Bambo Chapanga, ku Shilo hoku.” 9Panihapa bhandu bhanihabha bhakabhokiki na kujenda kupeta pachilanda ja inchi jenijela, na kulemba malobhi ghaki mu chitabu, na kujighabha michi jaki mu pandu saba, na kukelabhuka kwaka Yoshua kulikambi ku Shilo hoku. 10Bhela, Yoshua akalapwili kula kwa ndandi ja pandu panihapa palongi jaka Bambo Chapanga mu Shilo, na panihapa akajighabhiki inchi jeniheji kwa Bhaizilaeli kulengana na makabila ghabhu.

Pandu pabhakapekiwi bhandu bha likabila la Benyamini

11Likabila la kutumbula kupata pandu pabhu kwa kulapula kula lakabhili laka Benyamini kulengana na lukolu lwabhu. Pandu pabhu pabhakapekiwi pakabhili pachilanda ja likabila la Yuda na makabila gha bhana bhaka Yusufu. 12Upambala wa kungonde ulindakanilu wabhu ukabhili kuhuma pa nkoka Yoludani, na kupetela kungonde ja mihelelu ja Yeliko na kujendalela upambala wa kolijibhi lyobha wa inchi ja itombi, na kupitalila mbaka kulipololu la Beti Aveni. 13Kuhuma panihapa ulindakanilu ukapetiki ku mihelelu ja upambala wa kunkachi ja Luzu, yani Beseli, na kuhelela mbaka ku Ataloti Adali mu chitombi cha upambala wa kunkachi ja Beti Holoni ja Pahi. 14Upambala wa kolijibhi lyobha wa chitombi chenihechi chechibhili ku upambala wa kunkachi ja Beti Holoni ulindakanilu ukayongalwiti kunkachi mbaka ku Kiliati Baali, yani Kiliati Yealimu, muchi wa bhandu bha likabila la Yuda. Aghoghu ukabhili ulindakanilu waki kwa upambala wa kolijibhi lyobha. 15Upambala wa kunkachi ulindakanilu ukatumbwili pa ujomukelu wa muchi wa Kiliati Yealimu, kwa upambala wa kolijibhi lyobha, na kupitalila mbaka ku chemuchemu ya machi gha Nefitoa. 16Ulindkanilu ukahelili mbaka pahi kupetela munkeghi ja chitombi chechibhili pambipi na libondi laka Beni Homomu, ambalu lakabhili kungondi nakanopi ja libondi la Bhalefai. Ukajendalili pahi pa libondi la Hinomu, kunkachi ja mihelelu ja Bhayebusi, na kuhelela mbaka ku Eni Logeli. 17Konihoku ulindakanilu ukapendiki na kujenda kungondi mbaka ku Eni Shemeshi, na kujendalela mbaka ku Geliloti, ghoulingalanila na indela ja Adumimu, na kuhelela mbaka ku liganga laka Bohani mwana waka Leubeni. 18Kuhuma panihapa ukajendalili kuyongolota kungondi ja nhwelelu wa Beti Alaba, na kujomukela ku libondi la nkoka wa Yoludani hoku. 19Kabhete ulindakanilu ukajendalili ku nhwelelu wa kungondi wa Beti Hogila, na kupitalila ku chimbundi cha kungondi ja Bahali ja Mwinyu, pandu paujingila nkoka Yoludani. Aghoghu nde ulindakanilu wa ku upambala wa kunkachi. 20Nkoka Yoludani ukabhili nde ulindakanilu waki kwa upambala wa kolipita lyobha. Aghagha ghakabhili nde malindakanilu ghaghalangihi upwelelu wa lukolu ya likabila laka Benyamini ku ipambala yokapi.

21Ajeji nde michi ja lukolu ya likabila laka Benyamini kulengana na lukolu yabhu, Yeliko, Beti Hogila, Emeki Kesisi, 22na Beti Alaba, Semalaimu na Beseli, 23na Avimu, Pala na Ofila, 24na Kefali Amoni, Ofini na Geba. Michi jeniheji jokapi jakabhili komi na jibheli, papamu na ijiji yaki. 25Michi jengi jakabhili Gibeoni, Lama na Beeloti, 26na Misipa, Kefila na Moza, 27na Lekemu, Ilipeeli na Talala, 28na Zela, Elefu, muchi wa Bhayebusi, yani Yelusalemu, Gibeati na Kiliati Yealimu. Michi jeniheji jokapi jakabhili komi na nchechi, papamu na ijiji yaki. Aghoghu ukabhili nde upwelelu wa likabila laka Benyamini kulengana na lukolu yabhu.