Yoshua 21

Michi ja Bhalawi

1Bhela, chikahi chenihechi ihongozi bha Bhalawi bhakunjendili mpenganyambiku Eleazali, na Yoshua mwana waka Nuni, na ihongozi bhangi bha lukolu ya makabila gha Izilaeli. 2Bhakalongili nabhu ku Shilo hoku, mu inchi ja Kanaani, na kubhapwaghila, “Bambo Chapanga akalaghalakili kupetela Musa kubha mtupekyaje michi ja kutama, papamu na pandu pa kulekeha hinyama hitu ya kudimakika.” 3Bhela bhandu bha Izilaeli bhakabhapekihi Bhalawi michi jeniheji, papamu na pandu pa kulekeha hinyama yabhu ya kudimakika, kubha upwelelu wabhu, ngati moakalaghalakile Bambo Chapanga.

4Lukolu lwa kutumbula kupata pandu pabhu kwa kulapula kula lwakabhili lukolu ya Bhakohati. Bhalawi bhabhakabhili bhabhelakeka bhaka mpenganyambiku Haluni bhakapekiwi michi komi na jitatu kuhuma mu makabila gha Yuda, Simeoni na Benyamini. 5Bhabhelakeka bhangi bhabhahighalile bha lukolu lwa Bhakohati bhakapekiwi michi komi kuhuma mu lukolu ya makabila ghaka Efulaimu, Dani na nusu ja likabila laka Manase upambala wa kolijibhi lyobha.

6Bhabhelakeka bhaka lukolu lwaka Gelishoni bhakapekiwi michi komi na jitatu kuhuma mu lukolu ya makabila ghaka Isakali, Asheli, Nafutali na nusu ja likabila laka Manase ku Bashani upambala wa kolipita lyobha.

7Bhabhelakeka bha lukolu lwaka Melali bhakapekiwi michi komi na jibheli kuhuma mu makabila ghaka Leubeni, Gadi na Zabuloni.

8Bhela Bhaizilaeli bhakabhapekihi Bhalawi michi jeniheji, papamu na pandu pa kulekeha hinyama yabhu ya kudimakika, ngati Bambo Chapanga moakalaghalakile kupetela kwaka Musa.

9Aghagha nde mahina gha michi jebhakapekiwi kuhuma mu makabila ghaka Yuda na Simeoni. 10Michi ajeji bhakapekiwi bhabhelakeka bhaka Haluni, ambabhu bhakabhokini na lukolu ya Bhakohati bhabhakabhili bha likabila laka Lawi, maghambu kula ja kutumbula jakabhapatiki bhombi. 11Bhakabhapekihi Kiliati Aliba, yani Hebuloni, papamu na pandu paki pa kulekeha hinyama yeiyongalwite muchi ghonihoghu, mu inchi ja itombi ya Yuda. Aliba akabhili tati waka Anaki. 12Nambu mighonda jejayongalwiti muchi ghonihoghu papamu na ijiji yaki, bhakumpekihi Kalebu mwana waka Yefune kubha pandu paki.

13Bhela bhabhelakeka bhaka mpenganyambiku Haluni bhakapekiwi Hebuloni papamu na pandu paki pa kulekeha hinyama. Hebuloni ukabhili muchi wa kukembalela kwa ndandi jaka mundu jokapi jola joakoma: Libina papamu na pandu paki pa kulekeha hinyama, 14na Yatili papamu na pandu paki pa kulekeha hinyama, Eshitemoa papamu na pandu paki pa kulekeha hinyama, 15na Holoni papamu na pandu paki pa kulekeha hinyama, na Debili papamu na pandu paki pa kulekeha hinyama, 16na Aini papamu na pandu paki pa kulekeha hinyama, Yuta papamu na pandu paki pa kulekeha hinyama na Beti Shemeshi papamu na pandu paki pa kulekeha hinyama. Michi jokapi jakabhili tisa kuhuma kwa makabila aghagha ghabheli, yani Yuda na Simeoni. 17Kuhuma kwa likabila laka Benyamini bhakabhapekihi Gibeoni papamu na pandu paki pa kulekeha hinyama, na Geba papamu na pandu paki pa kulekeha hinyama, 18na Anatoti papamu na pandu paki pa kulekeha hinyama, na Alimoni papamu na pandu paki pa kulekeha hinyama. Michi jokapi jebhakapekiwi jakabhili nchechi. 19Michi jokapi jebhakapekiwi bhabhelakeka bhaka Haluni, ambabhu bhakabhili bhapenganyambiku, jakabhili michi komi na jitatu, papamu na pandu paki pa kulekeha hinyama.

20Bhandu bhangi bhabhahighalile bha lukolu lwa Bhakohati, ambabhu bhakabhokini na Bhalawi, bhakapekiwi michi kuhuma mu pandu pa likabila laka Efulaimu. 21Kuhuma mu inchi ja itombi yaka Efulaimu bhakapekiwi muchi wa Shekemu, ambau ukabhili muchi wa kukembalela kwaka mundu jokapi jola joakoma, na Gezeli papamu na pandu paki pa kulekeha hinyama, 22na Kibisaimu papamu na pandu paki pa kulekeha hinyama, na Beti Holoni papamu na pandu paki pa kulekeha hinyama. Michi jokapi jebhakapekiwi jakabhili nchechi. 23Kuhuma mu pandu pa likabila laka Dani bhakapekiwi Eliteke papamu na pandu paki pa kulekeha hinyama, na Gibetoni papamu na pandu paki pa kulekeha hinyama, 24na Aiyaloni papamu na pandu paki pa kulekeha hinyama, na Gati Limoni papamu na pandu paki pa kulekeha hinyama. Michi jokapi jebhakapekiwi jakabhili nchechi. 25Kuhuma mu nusu ja likabila laka Manase ku upambala wa kolijibhi lyobha, bhakapekiwi Taanaki papamu na pandu paki pa kulekeha hinyama, na Gati Limoni papamu na pandu paki pa kulekeha hinyama. Michi jokapi jebhakapekiwi jakabhili jibheli. 26Bhela, michi jebhakapekiwi bhandu bhabhakahighalile bha lukolu yaka Kohati jakabhili michi komi, papamu na pandu paki pa kulekeha hinyama.

27Lukolu lwaka Gelishoni, kuhuma mu likabila la Bhalawi, bhakapekiwi michi jibheli kuhuma mu nusu ja pandu pa likabila laka Manase ku upambala wa kolipita lyobha. Michi jeniheji jakabhi Golani mu Bashani muchi wa kukembalela kwaka mundu jokapi jola joakoma, papamu na pandu paki pa kulekeha hinyama, na Beeshitela papamu na pandu paki pa kulekeha hinyama. Michi jokapi jebhakapekiwi jakabhili jibheli. 28Kuhuma mu pandu pa likabila laka Isakali, bhakapekiwi muchi wa Kishioni papamu na pandu paki pa kulekeha hinyama, na Debelati papamu na pandu paki pa kulekeha hinyama, 29na Yalimuti papamu na pandu paki pa kulekeha hinyama, na Enganimu papamu na pandu paki pa kulekeha hinyama. Michi jokapi jebhakapekiwi jakabhili nchechi. 30Kuhuma mu pandu pa likabila laka Asheli, bhakapekiwi muchi wa Mishali papamu na pandu paki pa kulekeha hinyama, na Abidoni papamu na pandu paki pa kulekeha hinyama, 31na Helikati papamu na pandu paki pa kulekeha hinyama, na Lehobu papamu na pandu paki pa kulekeha hinyama. Michi jokapi jebhakapekiwi jakabhili nchechi. 32Kuhuma mu pandu pa likabila laka Nafutali, bhakapekiwi Kedeshi muchi wa kukembalela kwaka mundu jokapi jola joakomiki, ghoubhili ku Galilaya papamu na pandu paki pa kulekeha hinyama, na Hamoti Doli papamu na pandu paki pa kulekeha hinyama, na Kalitani papamu na pandu paki pa kulekeha hinyama. Michi jokapi jebhakapekiwi jakabhili jitatu. 33Michi jokapi jebhakapekiwi lukolu ya Bhagelishoni jakabhili komi na jitatu, papamu na pandu paki pa kulekeha hinyama.

34Lukolu lwaka Melali, kuhuma mu likabila la Bhalawi, bhakapekiwi michi kuhuma mu pandu pa likabila laka Zabuloni. Michi jeniheji jakabhi Yokineamu papamu na pandu paki pa kulekeha hinyama, na Kalita papamu na pandu paki pa kulekeha hinyama, 35na Dimina papamu na pandu paki pa kulekeha hinyama, na Nahalali papamu na pandu paki pa kulekeha hinyama. Michi jokapi jebhakapekiwi jakabhili nchechi. 36Kuhuma mu pandu pa likabila laka Leubeni bhakapekiwi, Bezeli papamu na pandu paki pa kulekeha hinyama, Yahasa papamu na pandu paki pa kulekeha hinyama, 37na Kedomoti papamu na pandu paki pa kulekeha hinyama, na Mefaati papamu na pandu paki pa kulekeha hinyama. Michi jokapi jebhakapekiwi jakabhili nchechi. 38Kuhuma mu pandu pa likabila laka Gadi bhakapekiwi Lamoti mu Gileadi, muchi wa kukembalela kwaka mundu jokapi joakoma, papamu na pandu paki pa kulekeha hinyama, na Mahanaimu papamu na pandu paki pa kulekeha hinyama, 39na Heshiboni papamu na pandu paki pa kulekeha hinyama, na Yazeli papamu na pandu paki pa kulekeha hinyama. Michi jokapi jebhakapekiwi jakabhili nchechi. 40Michi jokapi jebhakapekiwi bhabhelakeka bhaka Melali, yani mahighalilu gha likabila la Bhalawi, jakabhili michi komi na jibheli.

41Michi jokapi jebhakapekiwi likabila la Bhalawi kuhuma mu pandu pa Bhaizilaeli jakabhili michi alobaini na nane, papamu na pandu paki pa kulekeha hinyama. 42Kila ghumu pachilanda ja michi ajeji jakayongalitwi na pandu pa kulekeha hinyama. Bhenibhela nde mokwabhelile kwa michi jeniheji jokapi.

Bhaizilaeli bhatola inchi

43Bhela Bambo Chapanga akabhapekihi bhandu bha Izilaeli inchi jeniheji jokapi, jeakalapiki kubhapekeha akahokolu bhabhu, nabhombi bhakajitoliki na kutama monihomu. 44Bhela Bambo Chapanga akabhapekihi lipomulelu ipambala yokapi, ngati moakabhalapile akahokolu bhabhu, njeta adui hata jumu joakaweziki kubhaweza palongi jabhu. Maghambu Bambo Chapanga akabhabhekiki adui bhabhu bhokapi pahi ja lujiniku lwabhu. 45Njeta hata chilanga chimu chamboni chaka Bambo Chapanga kwa bhandu bha Izilaeli ambachu ngachechatimile. Kila chilanga chakatimie.