Yoshua 22

Makabila gha kolipita lyobha ghakelabhuka kunyumba

1Bhela Yoshua akabhalohiki bhandu bha likabila la Bhaleubeni, Bhagadi na nusu ja likabila laka Manase ku upambala wa kolipita lyobha, 2na kubhapwaghila, “Mwehapa njomwili kughahenga mambu ghokapi ghamwalaghalakiwi na Musa, mtumika waka Bambo Chapanga, nanamu ntehi kutii sauti jangu kwa kila lijambu lenakundaghalakile. 3Wala ngachemubhalekiki bhalongu bhinu Bhaizilaeli kwa chikahi chenihechi chokapi chilachu mbaka lalenu, nambu nkamwili wichu amuli yeakumpekihe Bambo Chapanga, Chapanga winu. 4Sajenu kwa kubha Bambo Chapanga, Chapanga winu, abhapekihi bhalongu bhinu Bhaizilaeli lipomulelu ngati moakabhalaghile. Bhela nkelabhukaje kunyumba jinu mu inchi jela ambaju Musa mtumika waka Bambo Chapanga, akumpekihi mwehapa jikubhaje mali ghinu, yani kwihi ja nkoka Yoludani. 5Nambu mulilingalyaje impalika kutii nakanopi amuli na shelia yokapi ambayu Musa, mtumika waka Bambo Chapanga, Chapanga winu, akundaghalakile. Kumpala Bambo Chapanga, Chapanga winu, na kujenda mu indela yaki yokapi, na kuikamula amuli yaki, na kukamulana najombi kwa uchakaka, na kuntumakila jombi kwa mtima winu wokapi na roho jinu jokapi.” 6Bhela Yoshua akabhapengalili, na kubhalaghila bhajendaje, nabhombi bhakapiti kunyumba jabhu. 7Musa akabhili ajomwili kubhapekeha nusu ja likabila laka Manase upwelelu wabhu mu Bashani ku upambala wa kolipita lyobha. Nambu nusu jengi ja likabila leniheli, Yoshua akabhili abhapekihi upwelelu wabhu ku upambala wa kolijibhi lyobha ja nkoka Yoludani papamu na bhalongu bhabhu. Yoshua paakabhili abhalaghila bhajendaje kunyumba jabhu, akabhapengalili, 8akapwaghaje, “Nkelabhukaje kunyumba hinu na wamaheli wa hindu hinu, yani mapogha makolongwa gha hinyama ya kudimakika, koni mkabyaje na madini gha feza, zahabu, shaba, choma, na ingobhu yamaheli namaa. Mkaghabhanaje na bhalongu bhinu hindu yeniheyi yokapi yemwitoliki mateka kuhuma kwa maadui bhinu.” 9Bhela bhandu bha likabila laka Leubeni, likabila laka Gadi na nusu ja likabila laka Manase ku upambala wa kolipita lyobha, bhakabhalekiki Bhaizilaeli ku Shilo mu inchi ja Kanaani, nahuli kukelabhuka ku Gileadi, inchi jabhu bheni jebhakajipatiki kulengana na lilaghalakilu laka Bambo Chapanga kupetela kwaka Musa.

Chihanja cha nyambiku pambipi na nkoka Yoludani

10Bhela pabhahikiki pa Geliloti pambipi na nkoka Yoludani, mu inchi ja Kanaani, Bhaleubeni, Bhagadi na nusu ja likabila laka Manase ku upambala wa kolipita lyobha, bhakachengiki chihanja chikolongwa na chinyahi cha kubhokela nyambiku pambipi na nkoka Yoludani. 11Bhaizilaeli bhakajowini, “Lingalyaje! Bhandu bha likabila laka Leubeni, Gadi na nusu ja likabila laka Manase ku upambala wa kolipita lyobha, bhachengiki chihanja cha nyambiku ku ulindakanilu wa Kanaani ku Geliloti hoku, pambipi na nkoka Yoludani ku upambala bha bhandu bha Izilaeli!” 12Bhela bhandu bha Izilaeli pabhajowini ghanihagha, lipogha lokapi la bhandu bha Izilaeli bhakahimangini papamu ku Shilo hoku, nahuli kujenda kukomana nabhu ngondo.

13Bhela bhandu bha Izilaeli bhakuntumiki Finehasi mwana waka mpenganyambiku Eleazali, ku Gileadi kwa bhandu bha likabila laka Leubeni, Gadi na nusu ja likabila laka Manase ku upambala wa kolipita lyobha. 14Finehasi akabhokiki papamu na ihongozi komi, chiongozi jumu kwa kila likabila limu la Izilaeli ku upambala wa kolijibhi lyobha, kila jumu akabhili chiongozi pachilanda ja bhandu bha makabila gha Izilaeli. 15Pabhahikiki ku inchi ja Gileadi, kwa bhandu bha likabila laka Leubeni, Gadi na nusu ja likabila laka Manase ku upambala wa kolipita lyobha, bhakabhapwaghile, 16“Lipogha lokapi laka Bambo Chapanga lilalukila, ‘Bho, lihakau bholi aleli lemuhengiki panani jaka Chapanga wa Izilaeli? Bho, muweza bholi kundeka Bambo Chapanga, na kulichengela chihanja cha nyambiku na kumpenga Bambo Chapanga? 17Bho, mahoku ghatahengiki ku Peoli hoku le ngacheghajaghanile? Hata ngati kukabhili na chitamu cha tauni panani ja lipogha laka Bambo Chapanga, nambu mbaka lalenu tukali ngachetugholuliki kubhokana na lihoku leniheli! 18Bho, sajenu nde ndandi lelu mundeka Bambo Chapanga? Ngati anamkana kuntii Bambo Chapanga lalenu, chilabhu anaalihyomilaje lipogha lokapi la bhandu bha Izilaeli. 19Bhela, anangati inchi jinu jijeghaliki uhakau, ndombukaje na kujingila kongoni mu inchi jaka Bambo Chapanga, pandu ambapu lihema laka Bambo Chapanga palibhile, nanamu ntolaje pandu kuhuma pachilanda jitu. Nambu ngamwampenga Bambo Chapanga, wala panani jitu tepani kwa kulichengela chihanja cha nyambiku, nakanopi ja chihanja chela chaka Bambo Chapanga, Chapanga witu. 20Chikahi Akani mwana waka Zela paakakosiki ulongwana kwa hindu yeyabhohakiki kwaka Bambo Chapanga, bho, inyela jaka Bambo Chapanga ngachejabhili panani ja lipogha lokapi la bhandu bha izilaeli? Bho, ngacheakabhili Akani pela kanjika jaki joakapotili kwa ndandi ja lihoku lake?’ ”

21Panihapa bhandu bha likabila laka Leubeni, Gadi na nusu ja likabila laka Manase ku upambala wa kolipita lyobha, bhakabhayangiki ihongozi bha lukolu ya Izilaeli, bhakapwaghaje, 22“Bambo Chapanga Joabhi na Makile nde Chapanga! Bambo Chapanga Joabhi na Makile nde Chapanga! Jombi amanyi ndandi jitu tepani kuhenga bhenibhela, na bhandu bhokapi bha Izilaeli anabhamanyaje. Ngati aghoghu nde uasi au kulepa kubha na uhobhalelu kwaka Bambo Chapanga, ngamwatuleka kubha tabhomi mu lichobha la lalenu! 23Ngati anatulichengili chihanja chitu cha nyambiku nahuli kundeka Bambo Chapanga, na kubhoha nyambiku ya kujochakeka, au nhupu ya ilebhi, au nyambiku ya kutama kwa lukwale, bhela, Bambo Chapanga mweni na alitemulaje lijambu aleli lalenu. 24Nambu ngabhela. Tukahengiki bhenibhela kwa choghoi kubha machobha ghaghahika bhabhelakeka bhinu bhaweza kubhapwaghila bhabhelakeka bhitu, ‘Mwehapa mbili na uhusianu bholi na Bambo Chapanga, Chapanga wa Izilaeli? 25Bambo Chapanga autendiki nkoka Yoludani kubha ulindakanilu pachilanda jitu na mwehapa, mwehapa bhandu bhaka Leubeni na Gadi ngachembili na pandu pimu kwaka Bambo Chapanga.’ Bhela bhabhelakeka bhinu bhaweza kubhatenda bhabhelakeka bhitu kukotoka kunjojabhela Bambo Chapanga. 26Ajeji nde ndandi tukapwaghiki, ‘Tulichengilaje changili chihanja achechi, nambu nga kwa ndandi ja kubhokela nyambiku ya kujochakeka wala nhupu yokapi yela.’ 27Nambu anachikubhaje ulandilu pachilanda jitu tepani na mwehapa, na ibheleku yeihika, kubha anatunjojabyaje Bambo Chapanga mu pandu paki pahuhu, kwa nyambiku hitu ya kujochakeka, nhupu hitu na nhupu ya kutama kwa lukwale. Nahuli mu machobha ghaghahika, bhabhelakeka bhinu ngabhiweza kubhapwaghila bhabhelakeka bhitu, ‘Mwehapa ngachembili na pandu pokapi pala muka Bambo Chapanga.’ 28Bhela tukapwaghiki kubha anangati chikahi chokapi chela anabhatupwaghili lijambu leniheli, au kubhapwaghila bhabhelakeka bhitu, anatubhayangaje anana, ‘Ndingalyaje, ulenganesu ghongoni wa chihanja chaka Bambo Chapanga, ambachu akatati bhitu bhakachichengike, nga kwa ndandi ja kubhokela nyambiku ya kujochakeka na nhupu, nambu ngati ulandilu pachilanda jitu tepani na mwehapa.’ 29Lijambu aleli la kumuasi Bambo Chapanga, na kundeka mu lichobha la lalenu kwa kuchenga chihanja cha kubhokela nyambiku ya kujochakeka, nhupu ya ilebhi, na nhupu yengi, nakanopi ja chihanja cha kubhokela nyambiku chaka Bambo Chapanga, Chapanga witu, chechibhili palongi ja lihema laki, na likubhaje kutali na tepani.”

30Bhela mpenganyambiku Finehasi, ihongozi bha lipogha, na ihongozi bha lukolu ya bhandu bha Izilaeli, pabhakajowini malobhi ghabhapwaghiki Bhaleubeni, Bhagadi na nusu ja likabila laka Manase ku upambala wa kolipita lyobha, bhakalizike. 31Najombi Finehasi, mwana waka mpenganyambiku Eleazali, akabhapwaghili bhandu bhaka Leubeni, Gadi na nusu ja likabila laka Manase ku upambala wa kolipita lyobha, “Lalenu tumanyi kubha Bambo Chapanga abhili papamu na tepani, maghambu ngachemwalepiki kubha na ulongwana kwaka Bambo Chapanga mu lijambu aleli. Bhela, sajenu mubhakengalili bhandu bha Izilaeli kuhuma mu kuyonangeka na chiwoku chaka Bambo Chapanga.”

32Bhela, Finehasi mwana waka mpenganyambiku Eleazali, papamu na ihongozi bhajaki bhala, bhakabhalaghili bhandu bha makabila ghaka Leubeni na Gadi ku Gileadi hoku, bhakakelawiki ku inchi ja Kanaani na kubhapwaghila Bhaizilaeli malobhi ghanihagha. 33Malobhi ghanihagha ghakabhatendiki Bhaizilaeli kuhekalela namaa, nabhombi bhandu bha Izilaeli bhakundumbalili Chapanga, wala ngachebhalongalili kabheti panani ja kukomana ngondo, nahuli kujiyonanga inchi jebhakabhi bhatama bhandu bha makabila ghaka Leubeni na Gadi.

34Bhela bhandu bha makabila ghaka Leubeni na Gadi, bhakachilohiki chihanja cha maganga cha kubhokela nyambiku hechi, “Edi,” yani “Mlandilu.” Maghambu bhakapwaghiki, “Chihanja achechi anachikubha ulandilu pachilanda jitu tepani na mwehapa kubha Bambo Chapanga nde Chapanga.”