Yoshua 23

Yoshua abhalaghila ihongozi

1Bhela pachapetiki chikahi chilachu, Bambo Chapanga akabhapekihi bhandu bha Izilaeli lipomulelu palongi ja maadui bhabhu bhokapi bhabhayongalwite. Chikahi chenihechi Yoshua akabhili mzee ya hyaka yamaheli. 2Yoshua akabhalohiki bhandu bhokapi bha izilaeli, bhazee bhokapi, ihongozi bhabhu, bhatemula na maofisa bhabhu, na kubhapwaghila, “Sajenu nepani mili mzee wa hyaka yamaheli. 3Mwehapa mabhete mughaweni mambu ghokapi Bambo Chapanga, Chapanga winu, ghaabhahengile mataifa aghagha ghokapi kwa ndandi jinu. Bambo Chapanga, Chapanga winu, nde joankomanile. 4Nkombukaje ntundu monungabhanakile kwa kulapula kula mataifa aghagha ghaghahighalile, kubha upwelelu kwa makabila ghinu, yani mataifa ghanaghawezike, kutumbula ku nkoka Yoludani mbaka ku bahali ja Meditelania, ku upambala wa kolijibhi lyobha. 5Bambo Chapanga, Chapanga winu, anaabhabhohaje maadui bhinu kwa makili bhabhokaje palongi jinu. Anaabhatopulaje ngabhikubha kabhete palongi jinu, nanamu anamjitawalaje inchi jabhu, ngati Bambo Chapanga, Chapanga winu, moakundaghile. 6Bhela mkangamalaje namaa kughakamula ghokapi ghaghalembakiki mu chitabu cha Shelia yaka Musa, na kughatenda, wala ngamughaleka kwa kung'ambambukila ku upambala wa kumalelelu au upambala wa kumangeja. 7Ngamwijangatana na mataifa aghagha ghaghahighalili pachilanda jinu, wala ngamwilobha kwa mahina gha ichapanga yabhu, wala ngamwaijojabhela, wala kubhalapisha bhandu kwa mahina ghanihagha, ngamwaitumakila wala kuichikamila palongi jabhu. 8Nambu nkamulanaje kwa ulongwana na Bambo Chapanga, Chapanga winu, ngati montendile mbaka lalenu. 9Kwa ndandi Bambo Chapanga aghatopwili palongi jinu mataifa makolongwa na ghaghabhi na makili, na kwinu mwehapa njeta mundu hata jumu joaweza kujema palongi jinu mbaka lalenu. 10Mundu jumu pachilanda jinu anaawezaje kubhatopola bhandu elufu jimu, maghambu Bambo Chapanga, Chapanga winu, nde joankomanela mwehapa, ngati moakundaghile. 11Bhela, impalika mkangamalaje namaa, kumpala Bambo Chapanga, Chapanga winu. 12Nambu ngati anamng'anambwiki kwa kukamulana na mahighalilu gha mataifa aghagha ghaghahighalili pachilanda jinu, na ngati anantoghulini nabhu na kujangatana nabhu, 13bhela mmanyaje kubha chakaka Bambo Chapanga, Chapanga winu, ngaabhatopoli kabhete mataifa ghanihagha palongi jinu. Nambu anaghakubhaje kwinu chihibhalakilu na chimbenda kwinu. Anaghakubhaje ngati iboku ya ndomondo mu mighongu jinu na miha mumihu ghinu, mbaka pamwiyonangikaje na kubhoka mu inchi ajeji jinyahi, ambaju Bambo Chapanga, Chapanga winu, ampekihi mwehapa.

14“Sajenu nepani nheghalile kupotela na kujenda mu indela ja bhandu bhokapi bha pundema. Mmanyi mu mitima jinu na roho hinu kubha njeta chilanga chokapi chela ambachu Bambo Chapanga, Chapanga winu, akundaghili, ambachu chikali ngakupitalila. Kila chilanga chitimizwe, njeta hata chimu changakupitalila. 15Nambu ngati bhela Bambo Chapanga, Chapanga winu, moatimizile mambu ghokapi ghamboni ghaakalaghile, bhelabhela aweza kundetela mahakau ghokapi mbaka anjonangaje mabhokapi kubhoka mu inchi ajeji jinyahi, ambaju Bambo Chapanga, Chapanga winu, jeampeki mwehapa. 16Ngati anamuhekiti lulaghilu lwaka Bambo Chapanga, Chapanga winu, ambalu akundaghalakili mwehapa mlukamulaje, kwa kujenda kuitumakila ichapanga nayengi, na kuichikamila, bhela, inyela jaka Bambo Chapanga anajibhelalaje panani jinu, nanamu anamuyonangikaje manyata kuhuma mu inchi ajeji jinyahi jeampeki mwehapa.”