Yoshua 24

Yoshua alongela na bhandu ku Shekemu

1Bhela Yoshua akabhabhongini papamu makabila ghokapi gha Izilaeli ku Shekemu hoku, na kubhaloha bhazee, ihongozi, bhatemula na maofisa bha Izilaeli, nabhombi bhakahikiki palongi jaka Chapanga. 2Yoshua akabhapwaghi bhandu bhokapi, “Bambo Chapanga, Chapanga wa Izilaeli apwagha anana, ‘Pamwandi hapa akahokolu bhinu, papamu na Tela tati waka Ibulahimu na Naholi, bhakatami kwihi ja nkoka Eufulati, na kuijojabhela ichapanga nayenge. 3Nambu nepani nakumbohiki Ibulahimu hokolu winu kuhuma kwihi ja nkoka Eufulati, nakundongwihi mu inchi jokapi ja Kanaani, na kumpekeha bhabhelakeka bhamaheli. Nakumpekihi Isaka, 4najombi Isaka nakumpekihi Yakobo na Esau. Nepani nakumpekihi Esau inchi ja chitombi cha Seili atamaje, nambu Yakobo papamu na bhana bhaki bhakahelili ku Misili. 5Bhela nakabhatumiki Musa na Haluni, nanatu nakajilapwili inchi ja Misili, kwa mambu ghokapi ghanahengiki pachilanda ja inchi jeniheji, na kumboha mwehapa konihoku. 6Nakabhabhohiki akahokolu bhinu ku Misili, nanamu mkahikiki mbaka kumaheku ja bahali ja Shamu. Bhamisili bhakunjengalili mwehapa kwa magali gha kuhutakika gha ngondo, na manjolinjoli bhakwela falasi mbaka ku bahali ja Shamu. 7Nambu Bhaizilaeli pabhakanelili nepani Bambo Chapanga kupala ujangatilu, nakabhekiki lubhendu pachilanda jinu na Bhamisili, na kuleta bahali jabhahyekaje panani jabhu. Mwehapa mabhete mkaweni kwa mihu ghinu mambu ghala ghanabhahengili pachilanda jabhu ku Misili hoku.

“ ‘Nanamu mkatami kulipololu hoku kwa machobha ghamaheli. 8Bhela nukundetiki mwehapa mu inchi ja Bhaamoli bhabhakabhili bhatama ku upambala wa kolipita lyobha wa nkoka Yoludani. Bhakakomini na mwehapa, nambu nepani nakabhajeghili nakabhatendiki bhalepalyaje palongi jinu. Nakabhayoningi palongi jinu, nanamu mkajitoliki mateka inchi jabhu. 9Chikahi Balaki mwana waka Sipoli, nkolongwa wa Moabu, paakalibhekiki wichu kukomana na bhandu bha Izilaeli, akundohiki Balaamu mwana waka Beoli, nahuli ahikaje kubhapekeha masolu. 10Nambu nepani ngachenajetakili kunjowanela Balaamu, bhela akajendalili kumpengalela kabheti na kabheti. Panihapa nakunkengalili mwehapa kuhuma mu chiwoku chaki. 11Paghapetiki ghanihagha mkalombwiki nkoka Yoludani na kuhika ku Yeliko. Nabhombi bhandu bha ku Yeliko bhakakomini na mwehapa. Bhelabhela mwehapa mkakomini na Bhaamoli, Bhapelizi, Bhakanaani, Bhahiti, Bhagiligashi, Bhahivi na Bhayebusi, nambu bhanihabha bhokapi nakabhabhekiki pahi ja lujiniku lwinu. 12Pamukabhili njingila mu inchi jeniheji nakatumiki manyiwa palongi jinu, ambaghu ghakabhatopwili palongi jinu bhakolongwa bhanihabha bhabheli bha Bhaamoli. Nga mapanga ghinu, wala mishali jinu jejuntendiki mwehapa kupata kubhaweza. 13Bhela nepani numpekihi mwehapa inchi ambaju ngachemujihengili lihengu, na michi jangakujichenga mwehapa jentama sajenu mkati jaki. Mkula mapambiku gha mighonda ja mizabibu ambaghu ngachemwapandike, na mkula mizeituni ambaju ngachemwapandike.’ ”

14“Yoshua akajendalili kupwagha, ‘Henu, munjojabya Bambo Chapanga, na kuntumakila kwa ulongwana na uchakaka wokapi. Ndekalaje kutali ichapanga ambayu akahokolu bhinu bhakaijojabhili kwihi ja nkoka Eufulati, na ku Misili hoku. Nanamu muntumakyaje Bambo Chapanga pela!’ 15Nambu ngati anambona kubha nga wichu kuntumakila Bambo Chapanga, muhaghulaje lalenu joanamuntumakyaje, anangati ichapanga yela ambayu akahokolu bhinu bhakaitumakili kwihi ja nkoka Eufulati, au ichapanga ya Bhaamoli, ambabhu sajenu mtama mu inchi jabhu. Nambu nepani na bhandu bha munyumba jangu, anatuntumakyaje Bambo Chapanga.”

16Bhela bhandu bhanihabha bhakayangike, “Ngabhela! Lijambu aleli la kundeka Bambo Chapanga, na kuitumakila ichapanga nayengi likubhaje kutali na tepani! 17Maghambu Bambo Chapanga mweni nde joatubhohiki tepani na akahokolu bhitu kuhuma mu inchi ja Misili, inchi jetukabhili bhatumwa, na kutenda nginyulila yela ikolongwa palongi ja mihu ghitu. Jombi nde joakatulendiki mu mwanja witu wokapi, na kwa bhandu bha mataifa ghokapi ghatwapetiki pachilanda jabhu. 18Bambo Chapanga nde joakabhatopwili bhandu bha mataifa ghokapi bhabhokaje palongi jitu, yani Bhaamoli bhabhakabhi bhatama mu inchi jenjenu. Bhela, kwa ndandi jeniheji tepani nanatu anatuntumakyaje Bambo Chapanga, maghambu jombi nde Chapanga witu.”

19Nambu Yoshua akabhapwaghile, “Mwehapa ngamuwezi kuntumakila Bambo Chapanga, maghambu jombi nde Chapanga Mhuhu. Chapanga joabhi na wihu, najombi ngaandekakeli mwehapa makosa ghinu, wala mahoku ghinu. 20Ngati anamundekiki Bambo Chapanga na kuitumakila ichapanga nayengi, panihapa anang'anambukaje na kuntendela mambu mahakau, na kunjonanga nakanopi, hata ngati antendili ghamboni aghagha ghokapi kunyuma hoku.”

21Bhandu bhanihabha bhakumpwaghi Yoshua, “Ngabhela! Nambu tepani anatuntumakyaje Bambo Chapanga.”

22Panihapa Yoshua akabhapwaghile, “Mwehapa mbili bhalandilu panani jinu mabhete kubha muhawili kuntumakila Bambo Chapanga.”

Nabhombi bhakayangike, “Ena, tepani nde bhalandilu.”

23Yoshua akabhapwaghile, “Henu, ndekalaje kutali ichapanga yeniheyi yeibhili pachilanda jinu, nanamu mjipelakaje mitima jinu kwaka Bambo Chapanga, Chapanga wa Izilaeli.”

24Bhandu bhanihabha bhakumpwaghi Yoshua, “Bambo Chapanga, Chapanga witu, nde joanatunjojabyaje, na kujitii sauti jaki.”

25Bhela Yoshua akatendiki lulaghilu na bhandu bhanibhala mu lichobha lenilela, na kubhapekeha amuli na malaghalakilu gha kujengalela ku Shekemu hoku. 26Yoshua akaghalembiki mambu ghanihagha ghokapi mu chitabu cha Shelia jaka Chapanga. Panihapa akatoliki liganga likolongwa, na kulijemeka konihoku pahi ja nkongu wa mwaloni, ghoukabhili pambipi na pandu pahuhu paka Bambo Chapanga. 27Yoshua akajendalili kubhapwaghi bhandu bhokapi, “Ndingalyaje! Liganga aleli analikubhaje ulandilu pachilanda jitu. Maghambu lijowini mambu ghokapi Bambo Chapanga ghaatupwaghile. Bhela analikubhaje ulandilu panani jinu, ngati anamundekiki Chapanga winu.” 28Bhela Yoshua akabhapwaghili bhandu bhabhokaje, nabhombi bhakapiti kila mundu ku pandu pa upwelelu waki.

Kupotela kwaka Yoshua na Eleazali

29Bhela, paghajomwiki mambu ghanihagha ghokapi, Yoshua mwana waka Nuni, mtumika waka Bambo Chapanga, akapotili koni akabya na umuli wa hyaka mia jimu na komi. 30Nabhombi bhakuntaghiki mu inchi ja upwelelu waki, ku Timuna Sela hoku, mu inchi ja itombi ya Efulaimu, ku upambala wa kungonde ja chitombi cha Gaashi.

31Bhandu bha Izilaeli bhakuntumakili Bambo Chapanga machobha ghokapi gha matamu ghaka Yoshua, na machobha ghokapi gha bhazee bhala bhabhakatami baada ja kupotela kwaka Yoshua, ambabhu bhakaweni kila chindu Bambo Chapanga cheakabhatendili bhandu bha Izilaeli.

32Nayombi ihupa yaka Yusufu, ambayu Bhaizilaeli bhakaikwehiki kuhuma ku Misili hoku, bhakaitaghiki ku Shekemu, pandu ambapu Yakobo akapahemili kuhuma kwa bhana bhaka Hamoli, tati waka Shekemu, kwa ipandi mia jimu ya madini gha feza. Pandu panihapa nde papakabhili upwelelu wa bhabhelakeka bhaka Yusufu.

33Najombi Eleazali mwana waka Haluni, akapotili na kutaghakika ku Gibea hoku, muchi wa kuchitombi ghoakapekiwi Finehasi mwana waki, ku inchi ja itombi ya Efulaimu.