Bhaamuzi 1

Bhandu bha lkabila laka Yuda na Simeoni bhunkamula nkolongwa Adonibezeki

1Bhela paakapoti Yoshua, Bhaizilaeli bhakundalukili Bambo Chapanga, “Bho, likabila bholi leanalilongulyaje kukwela palongi jitu nahuli kukomana na Bhakanaani?”

2Bambo Chapanga akayangike, “Likabila la Yuda nde leanalilongulyaje, maghambu nijibhekiki inchi jeniheji pahi ja lujiniku lwabhu.”

3Panihapa bhandu bha likabila laka Yuda bhakabhapwaghi bhalongu bhabhu bhandu bha likabila laka Simioni, “Mkwelaje papamu na tepani mu inchi jetupekiwi, nahuli tupata kukomana na Bhakanaani. Tepani natatu anatujenda papamu na mwehapa mu pandu pinu pampekiwi.” Bhela Bhasimioni bhakapiti papamu nabhu. 4Henu bhandu bha likabila laka Yuda bhakapiti kukomana, Bambo Chapanga akabhabhekiki Bhakanaani, na Bhapelezi pahi ja lujiniku lwabhu, nabhombi bhakabhakomiki bhandu elufu komi ku Bezeki hoku. 5Konihoku nde kobhakunhimanili nkolongwa Adoni Bezeki, bhakakomini naku na kubhaweza Bhakanaani na Bhapelizi. 6Nkolongwa Adoni Bezeki akatiliki, nambu bhakunjengalili na kunkamula, bhakunhekiti ngonji ikolongwa ya mumawoku na mumawolu. 7Nkolongwa Adoni Bezeki akapwaghike, “Chapanga anapwili maghambu pakutumbula hapa nakabhakamwili bhakolongwa sabini na kubhaheketa ngonji ya mumabhoku na mumagholu na kubhajomalakela kula imbala pahi ja meza jangu. Henu Chapanga anepiki ghangani, ngati ghala ghanakabhatendile.” Bhakumpeliki ku Yelusalemu, najombi akapotili konihoku.

Bhandu bha likabila laka Yuda bhabhaweza bhandu bha Yerusalem na Hebron

8Bhandu bha likabila laka Yuda bhakakomini na bhandu bha ku Yelusalemu, na kuutola mateka. Bhakabhakomiki bhandu bhaki kwa mapanga na kuujocha muchi hoghu kwa moto. 9Panihapa bhandu bha likabila laka Yuda bhakapiti kukomana na Bhakanaani bhabhatamikaje mu inchi ja itombi, pandu pajomu ku upambala wa kunkache, na pandu pa uwanda ku upambala wa kolijibhi lyobha. 10Bhela bhandu bhaka Yuda bhakakomini na Bhakanaani bhabhatamikaje mu Hebuloni ambaju pamwandi hapa ukalowakiki Kiliati Aliba, na konihoku akaiweziki ngolu ya Sheshai, Ahimani, na Talimai.

Otinieli na manjolinjoli ghaki abhaweza bhandu bha muchi wa Debili

Yoshua 15:13-19

11Kuhuma ku Hebuloni bhandu bha likabila laka Yuda bhakapiti kukomana na bhandu bha muchi wa Debili, ambau pamwandi hapa ukalowakiki Kiliati Sefeli. 12Panihapa Kalebu akatangize, “Mundu jokapi jola joanawezaje kuulapula na kuutola mateka muchi wa Kiliati Sefeli, ananuntoghukyaje mwali wangu Akisa akubha nhwanu wake.” 13Bhela Otinieli, mwana waka Kenazi, nnung'una waki Kalebu, akautoliki mateka muchi ghonihoghu, najombi Kalebu akumbohiki mwali waki Akisa atoghulikaje na Otinieli. 14Mu lichobha labhu la ndowa, Akisa akapiti kulobha ngonda kwaka Kalebu, tati waki. Panihapa Akisa akahulwiki kuhuma panani ja liponda laki, na Kalebu akundalukile, “Bho, upala nukupekya kike?” 15Akisa akayangike, “Umbekya mhupu. Kwa kubha umbekihi ngonda ku pandu pajomu ku upambala wa kunkache, nukulobha umbekyaje na pandu papabhili na mikolulela bhelabhela.” Bhela Kalebu akumpekihi chemichemi ya machi ya kundonda, na mikolulela ya machi ya pahi.

Makabila gha Yuda na Benyamini ghaweza

16Bhabhelakeka bhaka Mkeni, joakabhili nkowanu waka Musa, bhakakweliki papamu na bhandu bha likabila laka Yuda kuhuma mu muchi wa mitende, yani muchi wa Yeliko, mbaka ku lipololu la Yuda, pambipi na upambala wa kunkache ja muchi wa Aladi. Bhakabhekiki matamu ghabhu konihoku papamu na bhandu bhaka Yuda. 17Bhela bhandu bha likabila laka Yuda bhakajangatini na bhalongu bhabhu, yani bhandu bha likabila laka Simeoni, kubhaweza Bhakanaani bhabhatamika ku Sefati. Bhakauyoningi muchi ghonihoghu, na kuung'anambula lihina kubha Holima. 18Papamu na ghanihagha likabila laka Yuda bhakautoliki mateka muchi wa Gaza papamu na malindakanilu ghaki, Ashikeloni papamu na malindakanilu ghaki, na Ekiloni papamu na malindakanilu ghaki. 19Bambo Chapanga akabhajangatili bhandu bha likabila laka Yuda. Nabhombi bhakajitoliki mateka inchi ja itombi. Nambu ngachebhakaweziki kubhatopola bhandu bhanihabha bhabhatamikaje mu libondi leniheli, kwa kubha bhombi bhakabhili na magali gha choma ghaghahutakikaje kwa falasi. 20Muchi wa Hebuloni akapekiwi Kalebu, ngati moakalaghalaki Musa. Kalebu akabhatopwili ngolu itatu ya bhana bhaka Anaki. 21Nambu bhandu bha likabila laka Benyamini ngachebhatopwili Bhayebusi bhabhakabhi bhatama ku muchi wa Yelusalemu, nde ndandi Bhayebusi bhatama papamu na bhandu bha likabila la Benyamini mkati ja muchi wa Yelusalemu mbaka lalenu.

Bhandu bha likabila laka Efulaimu na Manase bhauteka muchi wa Betheli

22Bhandu bha makabila ghaka Yusufu, yani likabila laka Efulaimu na Manase, bhakapiti kuulapula muchi wa Beseli, najombi Bambo Chapanga akabhajangatili. 23Bhakabhatumiki hoti bhandu kujenda kuupeleleza muchi wa Beseli. Muchi ghonihoghu pamwandi hapa ukalowakiki Luzu. 24Bhapelelezi bhanihabha bhakumbweni mundu jumu ahuma mu muchi ghonihoghu, bhakumpwaghile, “Chondi, utulangihaje indela ja kujingalila mu muchi, na tepani anatukuleka womi.” 25Akabhalangihi indela ja kujingalila mu muchi, bhela bhakajingili na kunjonanga kila mundu joakabhi monihomu. Nambu bhakundekiki womi mundu jola, papamu na bhandu bha munyumba jaki. 26Mundu jonihoju akapiti mbaka ku inchi ja Bhahiti, konihoku akauchengiki muchi ambau akaulohiki Luzu, na muchi ghonihoghu ulowakeka bhenibhela mbaka lalenu.

Bhandu ambabhu ngachebhakabengakiki na Bhaizilaeli

27Bhandu bha likabila laka Manase ngachebhatopwili bhenei bha muchi wa Beti Sheani na ijiji yaki, Taanaki na ijiji yaki, Doli na ijiji yaki, Ibeleamu na ijiji yaki, na Megido papamu na ijiji yaki. Nambu Bhakanaani bhakajendalili kutama mu inchi jeniheji. 28Bhela Bhaizilaeli pabhakajonjukiki na kubha na makili, bhakabhajomalakili Bhakanaani bhahengaje lihengu lelinonwipe.

29Bhandu bha likabila laka Efulaimu ngachebhatopwili Bhakanaani bhabhakabhili bhatama ku Gezeli hoku, kwa ndandi Bhakanaani bhakajendalili kutama mkati ja muchi wa Gezeli papamu na bhandu bhaka Efulaimu.

30Bhelabhela likabila laka Zabuloni ngacheabhatopwili Bhakanaani bhabhakabhili bhatama ku Kitiloni, wala bhala bhabhakabhili bhatama ku Nahalali, nambu bhakajendalili kutama papamu nabhu, koni bhakabhajomalakyaje kuhenga lihengu lelinonwipe.

31Bhandu bha likabila la Asheli ngachebhatopwili bhenei bha muchi wa Aka, Sidoni, Alabu, Akizibu, Heluba, Afeka, na Lehobu. 32Nambu bhandu bha likabila laka Asheli bhakatami pachilanda ja Bhakanaani, bhenei bha muchi ghonihoghu, kwa kubha ngachebhatopwile.

33Bhandu bha likabila laka Nafutali ngachebhatopwili bhenei bha muchi wa Beti Shemeshi au bhenei bha Beti Anati, nambu bhakatami papamu nabhu. Hata bhela bhenei bha michi jeniheji, bhakajomalakiwi kubhahengela Bhaizilaeli lihengu lelinonwipe.

34Bhaamoli bhakabhatopulili bhandu bha likabila laka Dani ku itombi. Ngachebhapekihi mbekenyu ja kuhelela kutama mu inchi ja kulibondi. 35Bhaamoli bhakajendalili kutama mu michi jejikabhili mu chitombi cha Helesi, Aiyaloni, na Shaalibimu. Nambu bhandu bha makabila ghaka Efulaimu na Manase pabhabhili bhamaheli na kujonjukiki makili bhakabhaweziki Bhaamoli, na kubhajomalakela kuhenga lihengu ngati bhatumwa.

36Ulindakanilu wa Bhaamoli ukatumbwili pa mpetu wa kulombukela papalowakeka Chipeleli, na kujendalela mbaka ku muchi wa Sela.