Bhaamuzi 2

Mtumika wa kunani kwaka Bambo Chapanga ku Bokimu huko

1Mtumika wa kunani kwaka Bambo Chapanga akakweliki kuhuma ku Giligali mbaka ku Bokimu, na kubhapwaghila Bhaizilaeli, “Nukunkwehiki mwehapa kuhuma ku Misili na kunjingiha mu inchi jenakalapiki kubhapekeha akahokolu bhinu. Nakapwaghaje, ‘Nganiheketi lulaghilu lwangu na mwehapa ng'o. 2Na mwehapa ngamwitenda lulaghilu na bhandu bha inchi jenjenu, bhela mbombulaje pandu pabhu pa kubhokeha nyamabiku.’ Nambu mwehapa ngachemwajowanili sauti jango. Bho, maghambu kiki mtenda lijambu lenihele? 3Kwa ndandi ja ghanihagha numpwaghila, nganabhatopoli kabheti bhandu bha muchi ghonihoghu pachilanda jinu, nambu bhandu bhanihaba anabhung'ahaje, na mwehapa anamkamulikaje mu indela ya kujojabhela ichapanga yabhu. ” 4Mtumika wa kunani kwaka Bambo Chapanga paakajomwili kulongela mambu ghanihagha kwa Bhaizilaeli bhokapi, bhandu bhakaleliki kwa kujamalila. 5Bhakapalohiki pandu panipala chelelu. Nabhombi bhakumbokili Bambo Chapanga nyambiku panihapa.

Kupotela kwaka Yoshua

6Yoshua paakabhatawiki Bhaizilaeli, kila jumu akapiti pandu paki pa kutama mu inchi jabhu. 7Chikahi chokapi Yoshua paakabhili mwome, Bhaizilaeli bhakuntumakili Bambo Chapanga. Na hata baada ja nyiwa yaki, bhandu Bhaizilaeli bhakajendalili kuntumakila Chapanga machobha ghokapi ghabhakatamiki bhala akahilongizi bhabhahighalili bhabhayaweni matendu makolongwa ghaka Chapanga ghaabhahengili Bhaizilaeli. 8Yoshua mwana waka Nuni, mtumika waka Bambo Chapanga, akapotili akabya na umule wa hyaka mia moja na komi. 9Bhakuntaghiki mu inchi je bughabhili jikubhaje jakea ku Timunati Helesi, mu inchi ja itombi ya Efulaimu, ku upambala wa kungode wa chitombi cha Gaashi. 10Panihapa bhandu bhokapi bha chibheleku chenihechi bhakapotili, chakajengalili chibheleku chengi ambachu ngachechummanyi Bambo Chapanga, wala matendu ghala ghaghakabhili aghatendiki kwa ndandi ja Bhaizilaeli.

Bhaizilaeli bhakotoka kunjojabhela Chapanga

11Bhela Bhaizilaeli bhakatendiki mahoku palongi jaka Bambo Chapanga na kubhajojabhela Baali. 12Bhakakotwiki kunjojabhela Bambo Chapanga, Chapanga wa akatati bhabhu, joakabhili abhabhohiki mu inchi ja ku Misili. Bhakaijengalili na kuijojabhalela ichapanga patalipatali ya mataifa ghaghakabhili ghabhayongolota. Panihapa bhakuntendiki Bambo Chapanga kuhakalila namaa, 13bhakundekiki Bambo Chapanga, na kunjojabhela kichapanga Baali na ichapanga ya chimbomba ya Maashitoleti. 14Bhela Bambo Chapanga akabhayomili Bhaizilaeli, kabheti akabhalelikiki bhanyaghula bhabhanyaghulaje hindu yabho na abhabhohiki kwa bhahakau bhau bhabhayongalwiti na ngachebhaweziki kabheti kulilenda bheni. 15Pokapi Bhaizilaeli pabhapitaje kukomana, chiwoku chaka Bambo Chapanga chakabhili panani jabhu kubhatendela mahakau, ngati Bambo Chapanga moakapwaghili na kubhalapila. Nabhombi bhakabhili mu mang'ahiku makolongwa.

16Panihapa Bambo Chapanga akabhajemiki bhatemula, ambabhu bhakabhakengalili kuhuma mu mabhoku gha bhandu bhanihabha bhabhakatoliki mateka hindu yabhu. 17Nambu Bhaizilaeli ngachebhajowanili bhatemula bhabhu, maghambu bhakundekiti Bambo Chapanga na kuijojabhela ichapanga nayengi. Bhakang'anambwiki manyata na kujileka indela ambaju akatati bhabhu bhakajijendile, yani indela ja kutii amuli yaka Bambo Chapanga, nambu bhombi ngachebhahengiki bhenibhela. 18Chikahi chokapi Bambo Chapanga paakabhapelakili ntemula, Bambo Chapanga akabhili papamu na ntemula hoju, najombi akabhakengalili kuhuma mu mabhoku ja maadui bhabhu kwa chikahi chokapi cheakatami na ntemula jola. Kwa kubha Bombo Chapanga akabhabhonili chiha kubhokana na chilelu chabhu cha kubhina ntima kwa ndandi ja bhala bhabhakabhili bhang'aha na kubhabhonela. 19Nambu chikahi chokapi ntemula paakabhili apotili, bhandu bhakakelabhukili mu kutenda mahakau nakanopi kupeta akatati bhabhu, bhakaijengalya ichapanga nayengi nahuli kuitumakila na kuijojabhalela. Bhakakaniki kughaleka matendu ghabhu mahakau, na indela yabhu ya ing'omu. 20Panihapa Bambo Chapanga akabhayomili namaa Bhaizilaeli na kupwagha, “Kwa kubha bhandu bha litaifa lendenu bhahekiti lulaghilu lwangu lonakabhalaghalakili akahokolu bhabhu, na kukotoka kojowanela sauti jangu, 21nepani nanatu nganabhatopoli bhandu bha litaifa lokapi lela ambabhu Yoshua akabhalekiki mangani ja kupotela. 22Nahuli kwa indela jeniheji mbataje kubhalenga Bhaizilaeli, na kubhona ngati anabhajikamulaje indela jaka Bambo Chapanga, na kujenda mu indela jeniheji au ngabhela.” 23Bhela Bambo Chapanga akabhalekiki bhandu bha mataifa ghanighala, ngacheakabhohiki kwa manyata, wala ngacheakumpekihi Yoshua uwezu wa kubhaweza bhandu bha mataifa ghanihagha.