Bhaamuzi 3

Bhandu bha makabila ghangi ghaghakahighalili mu inchi ja Kanaani

1Bhela bhambani nde bhandu bha makabila ambabhu Bambo Chapanga akabhalekiki, nahuli kubhalenga Bhaizilaeli bhokapi ambabhu ngachebhakalabhali kukomana ngondo jokapi jela mu inchi ja Bhakanaani. 2Akatendiki bhenibhela nahuli kubhabhola ibheleku ya Bhaizilaeli ambabhu ngachebhakalabhali kukomana ngondo mangani ja panihapa. 3Abhabha nde bhandu bha mataifa ambabhu Bambo Chapanga akabhalekike: Bhafilisti bhabhakabhili pahi ja bhakolongwa nhwanu, Bhakanaani bhokapi, Bhasidoni, na Bhahivi bhabhatama mu itombi ya Lebanoni, kutumbula chitombi cha Baali Helimoni mbaka ku Lebo Hamati. 4Bambo Chapanga akabhalekiki bhandu bhanihabha nahuli awezaje kubhalenga Bhaizilaeli, na kubhona ngati anabhaweza kutii amuli yaka Bambo Chapanga, yeakabhalaghalakili akahokolu bhabhu, kwa kupetela Musa. 5Bhela, Bhaizilaeli bhakatami papamu na Bhakanaani, Bhahiti, Bhaamoli, Bhapelizi, Bhahivi na Bhayebusi. 6Bhakabhatowili akakamwali bhabhu, nabhombi bhakabhabhohiki akakamwali bhabhu bhatoghulikaje na akakombu bha inchi yeniheyi, na kuijojabhela ichapanga yabhu.

Otinieli

7Bhandu bha Izilaeli bhakatendiki mahoku palongi jaka Bambo Chapanga, bhakunjewiki Bambo Chapanga, Chapanga wabhu, na kujojabhela imong'umong'u ya Mabaali na Maashitoleti. 8Bhela Bambo Chapanga akabhayomili Bhaizilaeli, najombi akabhalekiki bhalapulikaje na kubhabheka pahi ja lujiniku lwaka Kushani Lishataimu nkolongwa wa ku Mesopotamia, ambaju Bhaizilaeli bhakabhi pahi ja lujiniku lwaki koni bhakuntumakyaje kwa chikahi cha hyaka nane. 9Bhela Bhaizilaeli pabhakundelili Bambo Chapanga, Bambo Chapanga akabhahaghulili mundu wa kubhakengalela, Otinieli mwana waka Kenazi, ndongu nchoku waka Kalebu. 10Roho waka Bambo Chapanga akunhikili panani jaki, najombi akabhili mtemula wa bhandu bha Izilaeli. Bhela akabhokiki kujenda kungondo, najombi Bambo Chapanga akunjangatili kumuweza Kushani Lishataimu, nkolongwa wa ku Mesopotamia hoju. 11Panihapa inchi jakabhili na lukwali kwa chikahi cha hyaka alobaini. Bhela Otinieli, mwana waka Kenazi, akapotile.

Ehudi

12Bhela bhandu bha Izilaeli bhakakotwiki kabhete kuntii Bambo Chapanga kwa kuhenga mahoku, najombi Bambo Chapanga akumpekihi makili Egiloni, nkolongwa wa Moabu nahuli abhawezaje bhandu bha Izilaeli. 13Egiloni akabhapaliki Bhaamoli na Bhaamaleki bhalombana naku, akapiti na kubhalapula Bhaizilaeli, nabhombi bhakautoliki kwa makili muchi wa Mitende hoghu, yani Yeliko.

14Bhandu bha Izilaeli bhakuntumakili Egiloni, nkolongwa wa Moabu kwa chikahi cha hyaka komi na nane.

15Bhela Bhaizilaeli bhakundelili Bambo Chapanga, najombi Bambo Chapanga akabhahaghulili mundu wa kubhakengalela, Ehudi, mwana waka Gela, mundu joakabhi atumi chiwoku cha kumangeja, wa likabila laka Benyamini. Bhaizilaeli bhakuntumiki Ehudi apelakaje nhupu yabhu kwaka Egiloni, nkolongwa wa Moabu. 16Ehudi akalenganakili lipanga lelakabhili litema koni na koni, ulachu waki lakabhili sentimita hamsini. Akalikongiki lipanga leniheli mkati ja ingobhu jaki pa lipaja laki upambala wa chiwoku chaki cha kumalelelu. 17Panihapa akumpelakili nkologwa Egiloni nhupu yela, Egiloni akabhili mundu joanenipi namaa. 18Ehudi paakajomwili kubhoha nhupu, akabhapwaghi bhandu bhabhatotwili nhupu bhala, bhabhuja kunyumba. 19Nambu jombi mweni akalonguhini nabhu mbaka ku imong'umong'u ya maganga yeyachongakiki pambipi na Giligali, panihapa jombi akakelawiki kujenda kwaka Egiloni na kumpwaghila, “Wenga nkolongwa, nepani mili na ubholu wa sili kwaku wehapa.”

Nkolongwa akapwaghike, “Ntumbalaje chinunu!” Najombi akabhapwaghi bhandu bhokapi bhabhakabhili bhajemiki pambipi najombi bhapita kunja na kundeka.

20Bhela Ehudi akunheghalili pandu pala paakabhili atami kanjika jaki mu chumba chaki cha kugholofa chechipetesha imbepu mu chikahi cha lumo. Ehudi akapwaghike, “Nepani mili na ubholu waku wehapa kuhuma kwaka Chapanga.” Nkolongwa akajumwiki kuhuma pa chiteu chaki. 21Ehudi akaholapwili lipanga laki kwa chibhoku chaki cha kumangeja kuhuma pa lipaja laki la kumalelelu, na kunhocha mulutumbu lwaka nkolongwa Egiloni kwa makili. 22Lipanga lakujingili mkati mulutumbu papamu na mpini waki, mahuta ghakaliyekiki lipanga heli, ndandi Ehudi ngacheakaholapwili kabheti lipanga heli mulutumbu, nalombi lakabhili lipitalili kungongu. 23Panihapa Ehudi akapitiki kunja pabalaza, akunjighalili milyangu ja chumba chenihechi na kujijighila kwa ufunguo. 24Ehudi paakabhokiki, bhatumika bhaka nkolongwa bhakahikike. Pabhakaweni milyangu jokapi ja chumba chenihechi jijighaliki kwa ufunguo, bhakaholalili kubha abhi kwiyetu ja chumba chenihechi. 25Bhakalendalili mbaka bhakatumbwili kubha na choghohi. Pabhakaweni ngacheahoghola milyangu, bhakatoliki ufunguo na kuhoghola. Lingalyaje, bhakumbweni nkolongwa wabhu aghonili pasakafu, koni akabya apotile.

26Pabhakabhili bhakali kundendela, Ehudi akatiliki kujenda mbaka ku imong'umong'u ya maganga, na paakahikiki panihapa akakembalili ku Seila. 27Paakahikiki konihoku akahoniki mbata mu inchi ja itombi ja Efulaimu, nabhombi Bhaizilaeli bhakahelili papamu najombi kuhuma ku chitombi hoku, koni jombi akabya abhalongulile. 28Akabhapwaghile, “Nyengalyaje, maghambu Bambo Chapanga antendiki mwehapa mubhawezaje maadui bhinu Bhamoabu.” Bhakunjengalili mbaka ku chilomboku cha Yoludani, na kuchitola kwa makili kuhuma mu mabhoku gha Bhamoabu, wala ngachebhundekiki mundu jokapi jola kulomboka. 29Lichobha leniheli, bhakakomakiki Bhamoabu akanalomi elufu komi, ambabhu bhokapi bhabhakangamile na bhabhakabhili na makili, wala njeta mundu hata jumu joakalamike. 30Bhela lichobha leniheli Bhaizilaeli bhakabhaweziki Bhamoabu. Inchi jakabhili na lukwali kwa chikahi cha hyaka semanini.

Shamgali

31Paakapotili Ehudi, akahikiki Shamgali mwana waka Anati, jombi akabhakomiki Bhafilisti mia sita kwa imbehu jejahonguliki ja kudimila ng'ombi. Najombi bhelabhela akabhakengalili Bhaizilaeli.