Bhaamuzi 4

Debola na Balaki

1Bhela paakapoti Ehudi, Bhaizilaeli bhakatendiki mahoku kabheti palongi ja mihu ghaka Bambo Chapanga. 2Bambo Chapanga akabhatendiki bhatolakika kwa makili na Yabini, nkolongwa wa ku Kanaani, joakatawili ku muchi wa Hazoli hoku. Nkolongwa waki wa manjolinjoli akalowakiki Sisela, joakabhili atama ku muchi wa Halosheti Hagoyimu. 3Bhandu bha Izilaeli bhakundelili Bambo Chapanga kundobha abhajangatyaje, maghambu nkolongwa Yabini akabhi na magali gha ngondo gha kuhutakika na falasi mia tisa gha choma. Najombi akabhili abhabhonili Bhaizilaeli kwa chikahi cha hyaka ishilini.

4Chikahi hechi, kukabhili na mlota mbomba joakabhi alowakeka Debola, nhwanu waka Lapidoti, Debola nde joakabhili mtemula wa Bhaizilaeli mu chikahi chenichela. 5Debola akabhili ajenda panihapa na kutama pahi ja nkongu wa mtende ghoukabhili pachilanda ja muchi wa Lama na muchi wa ku Beseli, mu inchi ja itombi ja Efulaimu. Bhandu bha Izilaeli bhakunjendili nahuli abhatemulyaje matakilu ghabhu. 6Lichobha limu Debola akundohiki Balaki, mwana waka Abinoamu mwenei wa ku muchi wa Kedeshi mu inchi ja Nafutali. Paakahikiki akumpwaghile, “Bho, Bambo Chapanga, Chapanga wa Izilaeli, le ngacheakupwaghili, ‘Ujendaje ukabhabhonganaje bhandu kuchitombi cha Taboli hoku, na ukabhahaghulaje akanalomi elufu komi kuhuma mu likabila laka Nafutali na Zabuloni? 7Nepani ananunhuta Sisela, nkolongwa wa manjolinjoli ghaka Yabini, nahuli ahikaje na magali ghaki gha ngondo papamu na manjolinjoli ghaki kukomana na wehapa, pa nkoka Kishoni, nanau anaumuwezaje.’ ”

8Balaki akumpwaghi Debola, “Ngati anaupiti papamu na nepani, ananyendaje. Nambu ngati ngaujendi papamu na nepani, nepani nganyende.”

9Debola akamyangike, “Ena, ananyendaje papamu na wehapa, nambu mwanja ghoanaujendaje ngawipati utopelu wehapa, maghambu Bambo Chapanga anaantendaje nkolongwa Sisela alepalyaje kwaka mbomba.” Bhela Debola akapiti papamu na Balaki mbaka ku Kedeshi. 10Balaki akaghalohiki manjolinjoli papamu kuhuma mu makabila ghaka Nafutali na Zabuloni ku Kedeshi hoku, na bhandu elufu komi bhakunjengalile. Najombi Debola akapiti papamu naku.

11Chikahi hechi, Hebeli, wa lukolu lwa Bhakeni, akabhili alitengiki na Bhakeni bhajaki, yani, bhabhelakeka bhaka Hobabu, ndamu waka Musa, najombi akachengiki lihema laki pambipi na nkongu ukolongwa wa mwaloni ghoukabhili ku Saanaimu ghola, pambipi na Kedeshi.

12Bhandu bhakumpwaghi Sisela kubha Balaki, mwana waka Abinoamu akweliki kuchitombi cha Taboli, 13Sisela akabhabhongini manjolinjoli ghaki ghokapi na magali ghaki gha choma gha kuhutakika na falasi mia tisa, akabhokiki ku Halosheti Hagoyimu, na kujenda ku nkoka wa Kishoni.

14Debola akumpwaghi Balaki, “Haya ubhokaje! Lalenu nde lichobha ambalu Bambo Chapanga akutendiki umuwezaje Sisela. Bho, Bambo Chapanga le ngacheabhokiki kukulongulela palongi jako?” Panihapa Balaki akahulwiki kuhuma pachitombi cha Taboli, na manjolinjoli elufu komi bhakunjengalile. 15Bambo Chapanga akunjeghili choghohi Sisela na bhokapi bhabhajendesha magali ghaki, papamu na manjolinjoli ghaki ghokapi kwa mapanga ghaghatema, palongi jaka Balaki. Bhela Sisela akahulwiki mu ligali laki na kutila kwa magholu. 16Balaki akaghajengalili manjolinjoli ghanihagha, na magali ghanihagha, mbaka ku Halosheti Hagoyimu, na kubhakoma manjolinjoli ghokapi ghaka Sisela kwa mapanga ghaghatema. Njeta mundu hata jumu joakahighalili kubha mwome.

17Nambu Sisela akatiliki kwa magholu mbaka mu lihema laka Yaeli, nkowanu waka Hebeli, wa lukolu lwa Bhakeni, maghambu pakabhili na lukwali pachilanda jaka Yabini nkolongwa wa Hazoli, na lukolu lwaka Hebeli, Mkeni. 18Yaeli akapitiki kujenda kunjopale Sisela, na kumpwaghila, “Nkolongwa wango, kalibu kwangu, wala ngawijoghopa.” Najombi Sisela akajingili mu lihema laka Yaeli, na Yaeli akamuyekiki kwa libulangeti. 19Sisela akumpwaghi Yaeli, “Chondi, nobha machi machokopi ngunywi, maghambu mili na inywita.” Panihapa Yaeli akahowili nteku wa mahibha na kumpekeha akunywaje, na kumuyekalela kabheti. 20Najombi Sisela akumpwaghile, “Ujemaje pundyangu wa lihema na mundu jokapi anahikiki na kukulalukila, akapwaghaje, ‘Bho, kubhi le na mundu jokapi jola pambane?’ Umuyangaje, ‘Njeta.’ ”

21Nambu Yaeli, nhwanu waka Hebeli, akatoliki chipanda cha lihema na nyundu, akunjendili mbolimboli na akachikomalangili chipanda cha lihema chela pachibhongi cha pamihu jaki, chakunhotwili na kupitalila mbaka paluhombi, maghambu akabhili aghonili lughonu kwa kutonda. Bhela, Sisela akapotili palapala. 22Balaki paakabhili anheghalela Sisela, Yaeli akapitiki kunja nahuli kunjopalela, na akumpwaghile, “Hikaje nanatu ananukulangihaje mundu jola joumpala.” Balaki akajingili mkati ja lihema laka Yaeli, na lingalyaje, akunhimanili Sisela pahi, akabya apotile, na chipanda cha lihema chela chakabhili pachibhongi chaki.

23Bhela mu lichobha leniheli, Chapanga akabhajangatili Bhaizilaeli kumuweza Yabini, nkolongwa wa Kanaani. 24Nabhombi Bhaizilaeli bhakajendalili kubha na makili nakanopi panani jaka Yabini, nkolongwa wa Kanaani, mbaka pabhakajomwili kunjonanga.