Bhaamuzi 5

Lunyembu lwaka Debola na Balaki

1Lichobha leniheli, Debola na Balaki mwana waka Abinoamu, bhakajembiki lunyembu alolu:

2Ihongozi bha Izilaeli bhakabhalongwi bhandu bhabhu kujenda kungondo,

na chikahi bhandu pabhalibhoha kwa kupala bheni, mundumbalyaje Bambo Chapanga!

3Njowanyaje lendenu, mwenga bhakolongwa!

Njowanyaje, mwenga bhatawala!

Nepani ananunjembilaje Bambo Chapanga.

Kwa lunyembu ananunchengulaje Bambo Chapanga, Chapanga wa Izilaeli.

4Bambo Chapanga, paukabhokiki ku chitombi cha Seili hoku,

paukahelili pachitombi Edomu,

inchi jakabhaghiji, kunani kumahundi nakwombi kukajitili machi,

ena, mahundi ghakajitili iyula.

5Itombi ikabhaghiji palongi jaka Bambo Chapanga, hata chitombi chela cha Sinai,

palongi jaka Bambo Chapanga, Chapanga wa Izilaeli.

6Mu machobha ghaka Shamgali, mwana waka Anati,

mu machobha ghaka Yaeli,

indela ikolongwa ngacheyakabhili na bhandu,

nabhombi bhabhakabhi bhatenda mwanja bhakapetiki indela ya kunkeghi.

7Bhalemi bhakakotwiki kulema mu Izilaeli,

bhakajitiliki inchi ja Izilaeli mbaka panakahiki nepani Debola na kubha mtemula wabhu,

panakajinwiki ngati mabhu mu Izilaeli.

8Pabhakahawili kuijojabhela ichapanga yahenu,

kukabhili na ngondu mu inchi.

Bho, kukabhonakini lelu mundu joakabhili na ngau au nkoha,

pachilanda ja bhandu alufu alobaini bha Izilaeli?

9Nabhapekeha utopelu ihongozi bha manjolinjoli bha Izilaeli,

papamu na bhala bhabhakalibhohiki kwa kupala bheni pachilanda ja bhandu.

Munchengulaje Bambo Chapanga!

10Mtangazaje malobhi ghani, mwehapa mwemtama panani ja maponda mahuhu,

mwehapa mwemtama panani ja uleli wa mbija yamaheli,

na mwehapa mwempeta mwindela kwa magholu.

11Njowanyaje sauti ja bhajemba pandu pa kunywelela machi.

Bhajemba kubhokana na mambu makolongwa ghaaghahengiki Bambo Chapanga,

bhalandila ntundu manjolinjoli gha Izilaeli mobhakabhawezile maadui bhabhu.

Panihapa bhandu bhaka Bambo Chapanga pabhakahelili pamilyangu mikolongwa ja muchi.

12Jumuka, jumuka, Debola! Jumuka, jumuka, ujembaje lujembu!

Jumuka, Balaki,

Ubhatolaje bhandu bhaku bhaubhatoliki kwa makili kungondo.

Wenga wa mwana waka Abinoamu!

13Panihapa mahighalilu gha bhalongwana na gha bhandu bhabhabhi na makili bhakahelili kwa ihongozi bhabhu,

Bhandu bhaka Bambo Chapanga bhakahulwiki kwa ndandi jangu bhakomanaje na bhabhabhi na makili.

14Kuhuma mu likabila laka Efulaimu bhakahikiki manjolinjoli, ambabhu utumbulilu wabhu nde Ameleki,

Benyamini akabya pachilanda ja bhandu bhabhakujengalili.

Kuhuma mu likabila laka Makili bhakahelili ihongozi,

na kuhuma likabila laka Zabuloni, bhala bhabhakamula ndonga ja bhakolongwa bha manjolinjoli.

15Ihongozi bhaka Isakali bhakabhili papamu na Debola,

ena, ihongozi bhaka Isakali akabhili papamu na Balaki,

bhakakembili mbelu mbaka kulibondi.

Nambu pachilanda ja likabila laka Leubeni,

kukabhili na kulilalukila kukolongwa muntima.

16Bho, maghambu kiki ukatami pachilanda ja mabheghi gha mambeleli?

Nahuli kujowanela sauti ja filimbi jejiloha mapogha gha mambeleli?

Mu ngolu ya likabila laka Leubeni,

kukabhi na kulilalukila kukolongwa muntima ngati bhajendaji au ngabhijenda.

17Bhandu bha likabila laka Gileadi bhakahighalili kwihi ja nkoka Yoludani,

bhandu bha likabila laka Dani, bho, maghambu kiki mkahighalili mu sitima?

Bhandu bha likabila laka Asheli bhakatami chinunu mu maheku gha bahali,

bhakatami padowoku jaki.

18Bhandu bha likabila laka Zabuloni nde bhandu bhabhakabhi tayali hata kupotela,

bhelabhela nabhombi bhandu bha likabila laka Nafutali pandu papajinwiki kumighonda.

19Bhakolongwa bhakahikiki na kukomana ngondo,

bhakolongwa bha Kanaani bhakakomini ngondo,

ku Taanaki hoku pambipi na chemichemi ja machi gha Megido,

nambu ngachebhakatoliki madini gha feza.

20Ndondwa kuhuma kunani kumahundi ikakomini ngondo,

ndondwa kuhuma mu indela jaki,

ikakomini na Sisela.

21Nkoka wa Kishoni ukabhajoliki,

nkoka ghola wa mwandi, nkoka Kishoni.

Nepani ananyendalyaje palongi kwa makili!

22Panihapa nganyatilu ya mafalasi ghaka Sisela yakatendiki nking'indu,

mafalasi ghaki ghaghakabhi na makili, paghakabhi ghatila kuhuma kungondo.

23Mtumika wa kunani waka Bambo Chapanga akapwaghike, “Muchi wa Melozi upekiwaje masolu.

Bhapekiwa masolu bhandu bhaki kwa ukali,

kwa kubha ngachebhakahikiki kunjangatila Bambo Chapanga,

kunjangatila Bambo Chapanga kukomana na bhabhabhili na makili habha.”

24Apengalikaje Yaeli nhwanu waka Hebeli, wa lukolu lwa Bhakeni,

kupeta akambomba bhokapi,

apengalikaje kupeta akambomba bhokapi bhabhatama mu mahema.

25Sisela akundobhiki machi, Yaeli akumpekihi mahibha,

akundetili siagi mu bakuli la utopelu.

26Chiwoku chimu akakamwili chipanda cha lihema,

na chiwoku chaki cha kumalelelu nyundu jaka funde.

Akundapwili Sisela kwa nyundu,

akunhotwili mmutu waki,

akuntunywili tunywili na kunhotola pachibhongi ja pamihu jaki.

27Sisela akajinimi pamagholu ghaka Yaeli,

akahawiki na kughonela panihapa.

Paakajinimi pamagholu pala, akahawiki,

paakajinimi pala, panihapa nde paakahawiki, koni akabya apotile.

28Kupetela palidilisha mabhu waka Sisela akalingalili,

palidilisha akaleliki, akapwaghaje,

“Bho, maghambu kiki ligali laki likabhakili kuhika?”

“Bho, maghambu kiki miking'indu ja magali ghaki ghakabhakili kujowaneka?”

29Akambomba bhabhabhili na mbulau bhabhakabhi bhuntumakila bhakamuyangiki,

ena, akalipekihi mweni liyangu kabheti na kabheti.

30“Panga na choghohi bhalonda na kughabhana mateka,

kamwali jumu au bhabheli kwa kila linjolinjoli,

ingobhu jejilenganakiki kwa mangoma gha limbeleli ja langi kwa kwandi jaka Sisela,

ingobhu jejilenganakiki wichu kwa mangoma gha limbeleli, na majuda ghabheli gha kunyamba kwa ndandi ja hingu jangu.”

31Maadui bhaku bhokapi na bhayonangikaje bhenibhela, wenga wa Bambo Chapanga!

Nambu bhokapi bhabhakupala na bhakubha ngati lyobha molipiti kwa makili!

Bhela inchi jakabhiili na lukwali kwa chikahi cha hyaka alobaini.