Bhaamuzi 6

Gidioni

1Bhaizilaeli bhakatendiki mahoku kabhete palongi jaka Bambo Chapanga, najombi Bambo Chapanga akabhalekiki bhalepalyaje palongi ja Bhamidiani kwa chikahi cha hyaka saba. 2Bhamidiani bhakabhabhoni namaa Bhaizilaeli, mbaka Bhaizilaeli bhakalihembili mabhomba na mambaku muitombi kubha pandu pabhu pa kulihiya. 3Kila chaka Bhaizilaeli pabhapandika imbeju mu mighonda, manjolinjoli bha Bhamidiani, na Bhaameleki na makabila ghangi gha kolipita lyobha hoku bhakahikiki kubhalapula. 4Manjolinjoli bha inchi yeniheyi bhakabhekiki likambi mu inchi jeniheji, bhakabhalapwili na kuyonanga ilebhi yokapi mu inchi mbaka mumalindakilu gha Gaza, ngachebhakabhalekili Bhaizilaeli chokapi, ikubhi mambeleli, ng'ombi wala maponda. 5Bhakahikiki na hinyama yabhu na mahema ghabhu, uhwananganu wa mabhongelu gha nzige. Ikabhili ngacheiwezikana kubhabhalanga bhandu na ngamia yabhu, bhakajingili mu inchi heji nahuli kujiyonanga. 6Bhaizilaeli bhakatendakiki kubha akakahochu namaa na Bhamidiani, mbaka bhandu bha Izilaeli bhakundeli Bambo Chapanga kulobha ujangatilu.

7Bhaizilaeli pabhukundelili Bambo Chapanga kwa ndandi ja mang'ahiku ghabhapekewa na Bhamidiani, 8Bambo Chapanga akuntumiki mlota, ambaju akabhapwaghile: Lendenu nde Bambo Chapanga, Chapanga wa Izilaeli, leapwagha, “Nepani nakumbohiki ku Misili, kuhuma mu inchi jemkabhi ntama ngati bhatumwa. 9Nanatu nakunkengalili kuhuma kwa Bhamisili bhokapi bhabhakabhi bhumbonela. Nepani nakabhatopwili bhabhokaje palongi jinu, nanatu nakumpekihi mwehapa inchi jabhu. 10Nukumpwaghile: Nepani nde Bambo Chapanga, Chapanga winu, ngamwaijojabhela ichapanga ya Bhaamoli, ambamu mwehapa mtama mu inchi jabhu sajenu. Nambu mwehapa ngachemwajowanili sauti jango.”

11Mtumika wa kunani kwaka Bambo Chapanga akahikiki na kutama pahi ja nkongu wa mwaloni ku Ofula hoku, nkongu wa mwaloni hoghu ukabhili waka Yoashi, wa lukolu lwaka Abiezeli, na Gidioni mwana waki akabhili apeta nganu kwa kulihiya mkati ja pandu pakuminyila zabibu, nahuli Bhamidiani ngabhambona. 12Mtumika wa kunani kwaka Bambo Chapanga akumpitalili Gidioni, akumpwaghili, “Bambo Chapanga abhi papamu na wehapa, wenga wanga kujoghopa na weubhi na makili!”

13Gidioni akapwaghike, “Bambo Chapanga wango, ngati Bambo Chapanga abhili papamu na tepani, bho, mbona mambu aghagha ghokapi ghatupitalile? Henu ghabhi kwako matendu ghaki makolongwa ghala ambaghu akahokolu bhitu bhakatulandili kupetela jombi pabhakapwaghiki, ‘Bho, Bambo Chapanga ngacheakatukwehike kubhoka ku Misili?’ Nambu henu Bambo Chapanga atulekiki tubhoniwaje na Bhamidiani.”

14Bambo Chapanga akundingalili na kupwagha, “Jendaje kwa uwezu waku hoghu, ukabhakengalyaje bhandu bha Izilaeli bhabhoka kuhuma mu kubhonewa na Bhamidiani. Bho, nga nepani lelu nenukutuma wehapa?”

15Gidioni akayangike, “Bambo Chapanga wango, bho, ananabhakengalya Bhaizilaeli kwa ntundu bhole? Lingalyaje, lukolu lwangu nde akakahochu nakanopi na ngachemi na makili mu likabila laka Manase, na nepani nde nunchoku wa bhokapi mu nyumba jaka tati wangu.”

16Bambo Chapanga akamyangike, “Chakaka anangubha papamu na wehapa, na wehapa anaubhalapula Bhamidiani ngati abhi mundu jumu.”

17Gidioni akumpwaghile, “Ngati mbatiki chihomu pamihu jaku, henu unangiya nginyulila, nahuli manyaje kubha chakaka wehapa nde weulongela na nepani. 18Chondi nukulobha ngawibhoka pambane mbaka panikelabhukaje na kukuletela nhupu jangu, na kujibheka palongi jaku.”

Najombi Bambo Chapanga akumpwaghile, “Ananendalyaje mbaka pawikelabhukaje.”

19Gidioni akajingili mkati ja nyumba jaki na kuandaa mwana mbuhi papamu na kujocha mabumunda ghangakujeghaleka amila kuhuma mu lidebi la uhembi, akajeghi inyama mkati ja chikapu na imitu mkati ja chipika, akundetili mtumika waka Bambo Chapanga hoju kunja pahi ja nkongu wa mwaloni na kumpekeha. 20Mtumika wa kunani kwaka Chapanga akumpwaghile, “Tola nyama na mabumunda jangakujeghaleka amila, ubhekaje panani ja litalaghu lenu na ujeghalaje imitu heji panani jaki.” Gidioni akatendiki bhelabhela. 21Mtumika wa kunani kwaka Bambo Chapanga akahatambwili ndonga jejikabhili mu chiwoku chaki, akajigusiki inyama jela na mabumunda jangakujeghaleka amila ghala, moto ukapitiki mu litalaghu ukayoningi inyama jela na mabumunda ghala. Mtumika waka Bambo Chapanga akahobhiki palongi jaki.

22Gidioni paakamanyiki kubha nde mtumika wa kunani waka Bambo Chapanga, Gidioni akalapwi njobhela kwa ukangachu, akapwagha, “Ananichibhonaje nepani, wenga wa Bambo Chapanga, Chapanga wangu! Kwa kubha numbweni Bambo Chapanga pamihu kwa pamihu!”

23Nambu Bambo Chapanga akumpwaghili, “Lukwali lukubhaje papamu na wehapa! Ngawijoghopa. Ngaupoteli.” 24Gidioni akunchengili Bambo Chapanga pandu pa kubhokeha nyambiku konihoku na kupaloha, “Yehova Shalomu,” yani Bambo Chapanga nde Lukwali. Pandu panihapa pa kubhokeha nyambiku pakali pabhili mbaka lalenu ku Ofula hoku ku muchi wa lukolu lwa Bhaabiezeli.

25Ikilu jelajela Bambo Chapanga akumpwaghili Gidioni, “Utolaje ng'ombi jikambaku jaka tati waku, bhelabhela utolaje ng'ombi ja kabheli jejibhi na hyaka saba, na ubhombulaje pandu pa kubhokeha nyambiku paka Baali paakabhi naku tati waku, na ukahekataje imong'umong'u ya Ashela yeibhili pambipi nayu. 26Unchengila Bambo Chapanga waku, chindu chinyahi cha kumokeha nyambiku chechibhi chinyahi panani ja chitombi chenjenu. Utumilaje hanju ja mapali ja Ashela jewitunyulini, ubhohaje nyambiku likambaku la kabheli heli kubha nyambiku ja kujochakeka.” 27Panihapa Gidioni akabhatoliki bhatumika bhaki komi na kutenda ngati Bambo Chapanga moakundaghalakili. Nambu kwa kubha akabhajowipi bhandu bha munyumba jaka tati waki na bhandu bha muchi ghonihoghu, akahengiki mambu ghanihagha chikahi cha ikilu, badala ja muhi.

28Bhandu bha muchi pabhakajumwiki lukela, lingalyaje, pandu pa kubhokeha nyambiku paka chimong'umong'u chaka Baali chakabombuliwi na mapali gha chimong'umong'u chaka Ashela chechikabhili pambipi jaki chakahekitwe, na ng'ombi ja kabheli jakabhili jibhohakiki nyambiku panani ja pandu pa kubhokeha nyambiku papachengakiki hapa. 29Bhakalaluhine, “Bho, nde nane joatendiki mambu ghangane?” Pabhakalalukili na kulonda wichu, bhakamanyiki, “Gidioni, mwana waka Yoashi, nde joatendiki anana.” 30Bhandu bha muchi bhakumpwaghi Yoashi, “Undetaje mwana waku pambane. Ipalika apotilaje, kwa ndandi abhombwili pandu pa kubhokeha nyambiku paka kichapanga Baali na kuheketa mapali ghaka kichapanga Ashela jeikabhili pambipi naju.”

31Nambu Yoashi akabhapwaghili bhandu bhokapi bhabhakabhili bhapengana na jombi, “Bho, mwehapa munjemalela Baali? Bho, mlenga kunkengalela? Jokapi jonaankengalyaje anakomakikaje kuhikila chilabhu lukela. Ngati Baali nde kichapanga chakaka, bhela, aweza kulikengalela mweni, maghambu pandu paki pa kubhokeha nyambiku pabombuliwe.” 32Lichobha heli bhandu bhakundohiki Gidioni, “Yelubaali” Ndandi jaki, “Baali na alikengalyaje palongi jaki,” maghambu Gidioni akabombwili pandu pa kubhokeha nyambiku paka kichapanga Baali.

33Chikahi hechi Bhamidiani na Bhaameleki, na makabila ghangi gha kolipita lyobha bhakajetanganili kujenda kungondo papamu, bhakalombwiki kwihi ja nkoka Yoludani na kuchenga makambi ghabhu mu libondi la Yezileeli. 34Panihapa Roho waka Bambo Chapanga akunhiki Gidioni, akahoniki mbata, akabhalohaje bhandu bha lukolu lwaka Abiezeli nahuli bhunjengalyaje. 35Akabhatumiki bhatenga mu inchi jokapi jaka Manase kubhaloha bhahikaje kunjengalela. Bhatenga bhangi akabhatumiki kubhaloha bhandu bha makabila ghaka Asheli, Zabuloni na Nafutali, nabhombi bhakahikiki kulombana naku.

36Bhela Gidioni akumpwaghi Chapanga, “Ngati anawakengalili Bhaizilaeli kwa kundumi nepani, ngati mowakapwaghile, 37lingalyaje, anameka chingokolu cha limbeleli mu chibhanja cha kupetela inganu, na ngati anapabhili na lyangami panani ja chingokolu pena, na inchi jokapi anajibhi jijomu, bhela panihapa nde anamanyaje kubha wehapa anaunyangatya nepani kubhakengalela Bhaizilaeli, ngati mowapwaghile.” 38Bhenibhela nde mokukapitalile. Gidioni akabhokiki lukela pachibhombu, akaminyiki chingokolu chela, lyangami lakapitiki, na libakuli lakatweli machi. 39Panihapa Gidioni akumpwaghi Bambo Chapanga, “Chondi ngawaniyomela. Nukulobha mbwaghi kabhete mala punkamu pela. Nukulobha unekaje ndumilaje chingokolu chenjenu kutenda lihengu lengi. Nukulobha panani ja chingokolu chenjenu pakubhaje pajomu, nambu paluhombi pokapi pakubhaje na lyangami.” 40Ikilu jela Chapanga akatendiki bhenibhela. Chingokolu chela chakabhili chijomu, na paluhombi pokapi pakabhi na lyangami.