Bhaamuzi 7

Gidioni abhaweza Bhamidiani

1Panihapa Yelubaali, yani Gidioni, na manjolinjoli bhaki bhokapi bhabhakabhi papamu najombi bhakabhokiki lukela pachibhombu, na kubheka likambi labhu pambipi na chemichemi ja Halodi. Likambi la Bhamidiani lakabhi upambala wabhu wa kungondi mu libondi, pambipi na chitombi cha Mole.

2Bambo Chapanga akumpwaghi Gidioni, “Bhandu habha bhabhabhi papamu na wehapa nde bhamaheli namaa kwangu nepani kuweza kubhashinda Bhamidiani, nahuli Bhaizilaeli ngabhihika kulilumbalila panani jangu, bhakapwaghaje, ‘Bhalikengalili kwa makili ghabhu bheni. 3Henu ubhatangazyaje bhandu bhokapi kubha: Mundu jokapi joabhi na choghohi au joabhaghaja abhokaje pambane pachitombi cha Gileadi na bhujaje kunyumba jaki,’ ” Panihapa bhakabhokiki bhandu elufu ishilini na ibheli kubhuja kumanyumba, na kuhighalila bhandu elufu komi.

4Nambu Bambo Chapanga akumpwaghili Gidioni, “Bhandu habha bhakona bhamaheli namaa. Ubhapelakaje pahi mu machi nanatu ananabhalengaje konihoku kwa ndandi jaku. Ngati ananukupwaghili, ‘Ajoju anajenda papamu na wehapa,’ jombi anajendaje. Nambu ngati anambwaghiki, ‘Ajoju ngayijenda papamu na wehapa,’ jonihoju ngayijenda.” 5Panihapa Gidioni akabhapeliki bhandu pandu papabhili na machi, najombi Bambo Chapanga akumpwaghili Gidioni, “Bhandu bhabhakunywa machi kwa lulimi, ngati nakawa moinywelela, ubhatengaje na bhala bhokapi bhabhachikama nahuli kunywa machi.” 6Ubhalangiku wa bhala bhabhakakunywiki machi kwa kulamba ngati nakawa bhakabhi mia tatu, Nambu bhangi bhokapi bhabhakahighalili bhakachikimi na kunywa machi. 7Bambo Chapanga akumpwaghi Gidioni, “Kwa manjolinjoli mia tatu habha bhabhakunywiki machi ananunkengalyaje mwehapa, nanatu ananukutenda weapa mubhashinda Bhamidiani. Ubhapwaghilaje bhandu bhangi bhokapi habha kila jumu abhujaje kunyumba jaki.” 8Bhela Gidioni akabhalekiki Bhaizilaeli bhangi bhala kila jumu ajendaje mu lihema laki. Akahighalili na bhandu mia tatu bhala, ambabhu bhakatoliki hilebhi na mbata ya bhandu bhangi bhala bhabhabhujiki kumanyumba ghabhu. Likambi la Bhamidiani likabhili kulibhondi upambala wabhu wa pahi waka Gidioni na bhandu bhake.

9Ikilu jelajela Bambo Chapanga akumpwaghi Gidioni, “Ujendaje ukabhalapulaje mu makambi ghabhu, maghambu ananukutendaje ubhashindaje. 10Nambu ngati anaujoghopa kuhelela, helalaje papamu na Pula mtumika waku kulikambi. 11Konihoku anaujowanaje ghabhapwagha, na wehapa anaupata makili gha kuweza kujenda kubhalapula.” Panihapa Gidioni akahelili papamu na mtumika waki Pula mbaka mu pandu pa bhalenda bhabhu bha likambi la Bhamidiani. 12Manjolinjoli bha Bhamidiani, na Bhaameleki na papamu na manjolinjoli bhokapi bha kolipita lyobha bhakatami kulibhondi, nabhombi bhakabhili ngati nzige kwa umaheli wabhu. Ngamia yabhu ngachejakabhalangiki, umaheli wabhu ukabhili ngati luhanga lwa mumaheku ja bahali.

13Gidioni paakahikiki, lingalyaje, pakabhi na mundu jumu joakabhi andandila njaki ndoto, akapwaghaje, “Lingalyaje, nakalotiki ndoto, libumunda la shayili lakahawiki mu likambi la Bhamidiani, lakahikiki mbaka mu lihema limu, lakalilapwili mbaka lakahawiki, nalombi lakalipendwili, mbaka lihema lakahawiki pahi.”

14Nkochi waki akamuyangiki, “Malobhi ghani nga chindu chengi, nambu ilangi kubha nde lipanga laka Gidioni mwana waka Yoashi, Muizilaeli. Chapanga atutendiki tepani Bhamidiani na manjolinjoli ghokapi kulepalela palongi jaki.”

15Gidioni paakajowini ndoto jeniheji na ndandi jaki, akachikimi na kunjojabhela Chapanga. Akakelawiki ku likambi la Izilaeli na kupwagha, “Njemanyaje! Bambo Chapanga abhatendiki manjolinjoli bha Bhamidiani kulepalela palongi jinu.” 16Panihapa akabhaghabhiki bhandu mia tatu bhala mu mapogha ghatatu, akabhapekihi mbata mu mabhoku ghabhu bhokapi na ihulu yangakubha na machi, na myenge jejibhelela mkati ja ihulu heyi. 17Akabhapwaghile, “Mningalyaje, ntendaje bhelabhela ngati monitenda nepani, panihikaje pambipi na likambi. 18Chikahi nepani na bhala bhabhabhili papamu na nepani bhokapi, patwihona mbata hitu, mwehapa nanamu mhonaje mbata upambala wokapi wa likambi na kulapula njobhela, mpwaghaje, ‘Kwa ndandi jaka Bambo Chapanga, na kwa ndandi jaka Gidioni!’ ”

19Gidioni na bhandu mia jimu bhala bhabhakabhili papamu naku bhakahikiki kuujomukelu wa likambi ikilu pamahiku chikahi cha utumbulilu wa zamu ja pachilanda, chikai pena manjolinjoli pabhakabhili bhang'anambulana zamu yamu mu likambi la maadui. Bhakahoniki mbata yabhu na kukajula ihulu yela yeyakabhili mu mabhoku ghabhu. 20Na mapogha ghokapi ghatatu ghala ghakahoniki mbata na kukajula ihulu. Bhakakamwili myengi kwa mabhoku ghabhu gha kumangeja na mumabhoku ghabhu gha kumalelelu bhakakamwi mbata nahuli kuihona, koni bhakapwagha kwa sauti ngolongwa, “Lipanga kwa ndandi jaka Bambo Chapanga, na kwa ndandi jaka Gidioni!” 21Bhakajemiki kila mundu pandu paki kuliyongolota likambi upambala wokapi, Bhamidiani bhokapi bhakatiliki, koni bhakajamalyaje kwa sauti ngolongwa. 22Pabhakajembiki mbata mia tatu yela, Bambo Chapanga akabhatendiki Bhamidiani bhatumbula kujomulana bheni kwa bheni kwa mapanga mu likambi. Bhabhakahighalili bhakatiliki ku Beti Shita, na kujendalela mbaka ku Selela, mbaka ku malindakanilu gha Abeli Mehola pambipi na Tabati.

23Akanalomi bha Izilaeli bhakabhili bhalibhongini kuhuma ku Nafutali, na kuhuma ku Asheli, na kuhuma kwaka Manase jokapi, bhakabhajengalili Bhamidiani. 24Gidioni akabhatumiki bhatenga mu inchi jokapi ja itombi yaka Efulaimu, bhakapwaghaje, “Muhelalaje kukomana na Bhamidiani na kuhibhalakila ilomboku ya nkoka Yoludani mbaka ku Beti Bala.” Henu, akanalomi bhokapi bhaka Efulaimu bhakahikiki na kuuyongolota nkoka wa Yoludani mbaka ku Beti Bala. 25Kabheti bhakabhakamwili ihongozi bhabheli bha Bhamidiani, yani Olebu na Zeebu. Bhakunkomiki Olebu pa litalaghu la Olebu pala, na Zeebu bhakunkomiki palibhomba la kuminyila divai la Zeebu pala. Panihapa bhakabhajengalili Bhamidiani na kuleta mmutu waka Olebu na Zeebu kwaka Gidioni, kwihi ja nkoka Yoludani.