Bhaamuzi 8

Kuweza kwaka Gidioni na kulepa kisasi

1Bhela bhandu bha likabila la Efulahimu bhakundalukili Gidioni, “Bho, maghambu kiki ututendili anana? Bho, maghambu kiki ngachewakatulohiki pawakapiti kukomana ngondo na Bhamidiani?” Bhakabhapwaghiki kwa ukale.

2Nambu Gidioni akabhayangike, “Mambu ghandendiki nepani nga chindu anaghalenganishwi na ghala ghantendiki mwehapa. Chela chichoku chentendiki mwehapa mabhandu bha likabila la Efulahimu nde chikolongwa na chinyahi kupeta chela chebhatendiki bhandu bha lukolu lwaka Abiezeli. 3Chapanga antendiki mubhawezaje ihongozi bha Bhamidiani, yani Olebu na Zeebu. Bho, nepani nhweziki kutenda kiki kulenganesha na chentendiki mwehapa?” Gidioni paakapwaghiki leniheli, inyela yabhu panani jaki yakatumbili.

4Gidioni na bhajaki bhakahikiki punkoka Yoludani, akalombwiki jombi papamu na bhandu mia tatu bhabhakabhi papamu naku bhala, hata ngati bhakatondiki namaa, bhakajendalili kubhajengalela maadui bhabhu. 5Bhela pabhakahikiki ku muchi wa Sukoti, Gidioni akabhapwaghi bhandu bha panihapa, “Chondi mwapekyaje bhajangu abhabha mabumunda maghambu bhatondiki namaa, na nepani nyendale kubhajengalela Zeba na Salimuna, bhakolongwa bha ku Midiani.”

6Nambu hilongozi bhaku Sukoti bhakundalukili, “Kwa ndandi kiki tubhapekiha chilebhi na mwehapa mkona ngachemumbweziki Zebha na Salimuna?”

7Gidioni akapwaghike, “Nde wichu, Bambo Chapanga payinyangatyaje nunkamulaje Zeba na Salimuna mu mabhoku ghangu, anangachulanaje hyegha hinu kwa miha ya mulipololu, na mingwandu!” 8Kuhuma panihapa akapiti mbaka ku muchi wa Penieli kubhalobha chilebhi, nambu bhandu bha ku muchi wa Penieli bhakamuyangiki ngati bhandu bha ku muchi wa Sukoti mobhakayangile. 9Gidioni akabhapwaghili bhandu bha ku muchi wa Penieli, “Panikelabhukaje koni nakabya nhweziki, anamombulaje mnala ghoni!”

10Zeba na Salimuna bhakabhili ku muchi wa Kalikoli papamu na linjolonjoli labhu la bhandu elufu komi na nhwanu ambabhu bhakahighalili kuhuma mu linjolinjoli la ku inchi ya kolipita lyobha, maghambu bhajabhu elufu komi na bhabheli bhakakomakiki. 11Gidioni akajengalili indela ja kolijibhi lyobha jejibhili ku upambala wa kolipita lyobha wa muchi wa Noba na Yogibeha, akabhalapwili linjolinjoli heli ambalu ngachelakabhili tayali. 12Zeba na Salimuna, bhakolongwa bhabheli bha ku Midiani habha, bhakatilike, nambu Gidioni akabhajengalili na kubhakamula, na kubhatenda manjolinjoli ghabhu ghokapi kubha na choghoi.

13Bhela Gidioni mwana waka Yoashi akakelawiki kuhuma kungondo kwa kupetela pandu papajinwiki pa Helesi. 14Akunkamwi nkombu jumu wa ku muchi wa Sukoti na kundalukila mahina gha ihongozi, najombi nkombu jola akundembili Gidioni mahina sabini na saba gha ihongozi na bhazee bhabhamanyikana nakanopi mu muchi wa Sukoti. 15Gidioni akakelawiki kwa bhandu bhaki bha ku muchi wa Sukoti, na kubhapwaghila, “Bho, mkomboka lelu ntundu momwandondulili chikahi pamkapwaghiki: Bho, maghambu kiki tubhapekya chilebhi bhandu bhaku bhabhatondiki namaa, koni mwakali ngachemunhweziki Zeba na Salimuna? Henu ndingalyaje, Zeba na Salimuna nde bhambane!” 16Bhela Gidioni akabhatoliki ihongozi bha muchi wa Sukoti na kubhakachulana hyegha yabhu kwa miha na mingwandu ja mulipololu ngati libholu nahuli kubhabhola. 17Bhelabhela kapiti ku muchi wa Penieli, na kuubombola mnala wa muchi wa Penieli na kubhakoma bhandu bha muchi ghonihoghu.

18Bhela akabhalalukili Zeba na Salimuna, “Bho, bhakabhonakini ngati bhandu bha ntundu bhole bhaubhakomiki ku Taboli hoko?”

Bhakamuyangike, “Bhakalengini na wehapa, maghambu bhakabhonakini ngati bhana bhaka nkolongwa.”

19Gidioni akabhayangiki, “Bhanihabha bhakabhili bhalongu bhango, bha lutumbu lumo. Napa kwaka Bambo Chapanga joabhi mwomi, ngati mkabhi mubhalekiki kubha bhomi, nepani nganakunkomiki mwehapa.” 20Akung'anambukili Yeteli, mwana waki mbelakeka wa kutumbula, na kumpwaghila, “Jemaje, ubhakomaje abhabha!” Nambu Yeteli akajowipi kutola lipanga laki, kwa ndandi akabhi akona nkombu nchoku.

21Bhela Zeba na Salimuna bhakapwaghike, “Utukomaje wehapa wamwete, ndandi aleli nde lihengu laka mundu joakolike.” Henu Gidioni akajemiki, akabhakomiki Zeba na Salimuna, najombi akaghabhohiki mapambu mu hingu ya ngamia yabhu.

22Bhela Bhaizilaeli bhakumpwaghi Gidioni, “Wehapa na ukubhaje chiongozi witu, na anaupetiki wehapa mbelakeka waku, na nchokolu waku atutawalaje, maghambu wehapa utukengalili kuhuma mu makili gha Bhamidiani.”

23Gidioni akabhayangike, “Nepani ngangubhi mtawala winu wala bhabhelekeka bhangu ngabhantawali mwanganya. Bambo Chapanga nde jonakubha mtawala winu.” 24Najombi akapwaghike, “Mili na lilobhu limu, kubha kila jumu winu ambekyaje ndolowa kuhuma mu lifungu laki leakatoliki kwa makili kungondo.” Bhamidiani bhakabhi ngati Bhaishimaeli na bhandu bhangi bhabhakabhi bhatama ku lipololu, bhakabhi bhawata ndolowa ya zahabu.

25Bhandu bhakayangike, “Anatukupekyaje kwa kupala tabhete.” Bhakatandiki ingobhu pahi, na kila jumu akabhekiki monihomu ndolowa yeakatoliki kwa makili kungondo. 26Kutopa kwa ndolowa ya zahabu yeakapekiwi Gidioni yakabhi kilu ishilini, panga kubhalanga mapambu ghangi gha mbija yamaheli, na ingobhu ya zambalau yeyakabhili ihwatakika na bhakolongwa bha ku Midiani, na mikufu jejakabhili mu hingu ya ngamia yabhu. 27Gidioni akalenganakili chimong'umong'u kwa kutumila zahabu jela, ambachu akachibhekiki mu muchi waki wa Ofula. Bhaizilaeli bhokapi bhakapiti kuchijojabhela konihoku, nachombi chakabhili chimbenda kwaka Gidioni na kwa bhandu bha munyumba jaki.

28Bhela Bhamidiani bhakalepalili palongi ja Bhaizilaeli, nabhombi ngachebhang'ahiki kabheti Bhaizilaeli. Na inchi ja Izilaeli jakabhi na lukwali kwa chikahi cha hyaka alobaini mu machobha ghaka Gidioni.

Kupotela kwaka Gidioni

29Gidioni, yani Yelubaali, mwana wa Yoashi akakelawiki kunyumba jaki na kutama konihoku. 30Gidioni akabhi na bhana bha chikambaku sabini, kwa ndandi akatowili akambomba bhamaheli. 31Na mtumika waki wa chimbomba, joakabhi atama ku Shekemu hoku, akumbelakili mwana wa chikambaku na akundohiki lihina laki Abimeleki. 32Gidioni mwana waka Yoashi akapotili akabya mzee, na akataghakiki mu litengeli laka Yoashi tati waki ku Ofula, muchi wa lukolu lwaka Abiazeli.

33Paakapoti pena Gidioni, Bhaizilaeli bhakaikelabhukili ichapanga ya Baali na kuijojabhela. Bhakuntendiki Baali Beliti kubha kichapanga wabhu. 34Bhaizilaeli bhakunjewiki Bambo Chapanga, Chapanga wabhu, joabhakengalili kuhuma mu mabhoku gha maadui bhabhu bhokapi kuhuma kila upambala. 35Kabheti, bhakalepalili kubhatendela ghamboni bhandu bha munyumba jaka Yelubaali yani Gidioni, hata ngati Gidioni akahengiki mambu ghamboni kwa bhandu bha Izilaeli.