Bhaamuzi 9

Abimeleki

1Lichobha limu, Abimeleki, mwana waka Yelubaali, yani Gidioni akapiti kwa bhalongu bhaka mabhu waki ku Shekemu hoku na kubhapwaghila, 2“Mbwaghilaje palongi ja bhandu bhokapi abhabha bha Shekemu, ‘Bho, lijambu bholi lelibhili lamboni kwinu? Bhana bhokapi sabini bha chikambaku bhaka Yelubaali bhantawalaje au mundu jumo?’ Nkombukaje kubha nepani na mwehapa nde mwahi ghumu.” 3Bhalongu bhaka mabhu waki bhakatangizi malobhi ghanihagha ku Shekemu pandu paki, na bhandu bhokapi bha ku Shekemu bhakajetakili kunjengalela ndandi jombi akabhi ndongu wabhu. 4Bhakumpekihi ipandi sabini ya madini gha feza yeyakabhi mu nyumba jaka Baali Beliti, najombi Abimeleki akaitumili kubhahemela bhandu bhanamilomu na bhandu bha liyaha, nahuli bhunjengalyaje. 5Abimeleki na bhandu bhaki bhakapiti mbaka kunyumba jaka tati waki ku Ofula hoku, akabhakomiki bhalongu bhaki, bhana bha chikambaku bhaka Yelubaali, bhandu sabini, akabhakomiki panani ja liganga limu, nambu Yotamu, mwana nchoku waka Yelubaali, akahighalili maghambu akatehi kulihiya. 6Bhela bhandu bhokapi bha ku Shekemu na Beti Milo bhakalibhongini papamu pahi ja nkongu ukolongwa wa mwoloni pa nguzu jejibhi ku Shekemu na kunhimika Abimeleki kubha nkolongwa wabhu.

7Yotamu paakajowini malobhi ghanihagha, akapiti kujema panani ja chitombi cha Gelizimu, na kujamalila kwa sauti ngolongwa, “Nyowanyaje nenga mabhandu bha Shekemu, nahuli Chapanga najombi apata kunjoghunela mwehapa. 8Lichobha limu mikongu jakahimangini kunhaghula nkolongwa. Bhela mikongu jakumpwaghili nkongu wa mzeituni, ‘Wehapa ubya nkolongwa witu.’ 9Nambu nkongu wa mzeituni ukayangike, ‘Bho, ngotukaje kupiha mahuta ghangu ambaghu kwa ghanihagha ichapanga na bhandu bhatopalewa, nyendaje kuling'aha kujitawala mikongu?’ 10Panihapa mikongu jakaupwaghili nkongu wa nkoju, ‘Hikaje ubya nkolongwa witu.’ 11Nambu nkongu wa nkoju ukayangike, ‘Bho, ngotukaje kupiha mapambiku ghangu manyahi na manohu, nyendaje kuling'aha kujitawala mikongu?’ 12Panihapa mikongu jakaupwaghili nkongu wa mzabibu, ‘Hikaje na ukubhaje nkolongwa witu.’ 13Nambu nkongu wa mzabibu ukayangike, ‘Bho, ngotukaje kupiha divai jangu jejihekeha ichapanga na bhandu, nyendaje kuling'aha kujitawala mikongu?’ 14Ujomukelu mikongu jokapi jakaupwaghili nkongu wa miha, ‘Hikaje na ukubhaje nkolongwa witu.’ 15Nkongu wa miha ukayangike, ‘Ngati chakaka mpala kunhaghula nepani kubha nkolongwa winu, muhikaje mtamaje pahi ja nhwili wangu. Nambu ngati ngachempala kuhenga bhenibhela, moto na upitaje mu miha yangu na kuyonangaje hata mikongu ja mielezi ja Lebanoni.’

16“Panihapa Yotamu akajendalili kupwagha bho, muhambuki kubha ntendiki kwa maholalelu manyahi na kwa ulongwana kunhaghula Abimeleki kubha nkolongwa wino? Bho muhambukila muntendili wichu Yelubaali na bhandu bha munyumba jake? Ngati mokupalikila kwa mambu ghaki ghamboni ghaantendile? 17Kwa kubha tati wangu akunkomani mwehapa, kwa kughabheka matamu ghaki mu hatali, na kunkengalela mwehapa kuhuma mu mabhoku gha Bhamidiani, 18nambu lalenu mubhalapula bhandu bha munyumba jaka tati wangu na kubhakoma bhana bhaki bha chikambaku sabini panani ja liganga limu, na mwehapa muntendiki Abimeleki, mwana waka mbomba mtumwa kubha nkolongwa panani ja Shekemu, kwa kubha jombi nde ndongu winu. 19Henu ngati anamtendiki ghanihagha kwa mtima wamboni na kwa kuntopela Yelubaali na bhandu bha munyumba jaki, henu muhekalyaje papamu na Abimeleki, najombi ahekalyaje papamu na mwenga. 20Nambu ngati ngabhela, moto upitaje kwaka Abimeleki na kunjonanga, mwenga mabhandu bhaka Shekemu na Beti Milo, nawombi moto uhuma kwinu, mabhandu bhaka Shekemu na Beti Milo unjonangaje Abimeleki.” 21Panihapa Yotamu akakembili, na kutilila kujenda ku muchi wa Beeli, akatami konihoku, maghambu akunjowipi Abimeleki ndongu waki.

22Abimeleki akatawili inchi ja Izilaeli kwa chikahi cha hyaka itatu. 23Chapanga akabhakolukili Abimeleki na bhandu bhaka Shekemu, nabhombi bhandu bhaka Shekemu bhakung'anambwiki Abimeleki. 24Chapanga akabhalapwili bhandu bhaka Shekemu papamu na ndongu wabhu Abimeleki kubhokana na uhakau ghobhakabhatendili bhana sabini bha chikambaku bhaka Yelubaali. Utemulu wa ukomakeku hoghu ukabhapatiki maghambu Abimeleki akabhakomiki bhalongu bhaki kwa kujangatiwa na bhandu bhaka Shekemu. 25Panihapa bhandu bhaka Shekemu bhakabhabhekiki bhandu bha kunjobhalela Abimeleki na manjolinjoli bhaki panani ja tutombi, bhelabhela bhandu bhanihabha bhakabhanyawili hindu ya bhandu bhokapi bhabhakapetiki indela jeniheji pambipi nabhu, najombi Abimeleki akapwaghakiki mambu ghanihagha.

26Bhela Gaali, mwana waka Ebedi, akapiti kutama ku Shekemu papamu na bhalongu bhaki, na bhandu bhaka Shekemu bhakabhili na uhobhalelu naku. 27Bhakapiti kumighonda jabhu kuhuna zabibu na kubhundika zabibu heyi, na bhakalenganaki divai na kutenda uwangalalu. Bhakajingili mu nyumba jaka chapanga wabhu bhakakuliki na kunywa, na kuntondola Abimeleki. 28Gaali mwana waka Ebedi akapwaghike, “Bho, Abimeleki nde nane? Tepani bhandu bha muchi wa Shekemu nde bhandu bha ntundu bhole, mbaka tuntumakya Abimeleki? Bho, jombi nga mwana waka Yelubaali? Najombi Zebuli nga njangatila waki? Bhela mubhatumakyaje bhandu bhaka Hamoli, tati waka Shekemu. Bho, maghambu kiki tuntumakyaje Abimeleki? 29Ngati nakabhi chiongozi wa bhandu habha bhokapi nakabya nuntendi Abimeleki ngaikubha nkolongwa. Nakabya numpwaghi Abimeleki, ‘Ujonjukyaje manjolinjoli ghaku, na uhikaje tukomanaje palongi ja bhandu na nepani ananukuwezaje!’ ”

30Zebuli joakabhi mtawala wa muchi paakajowini malobhi ghaka Gaali, mwana waka Ebedi, akayomiki namaa. 31Panihapa Zebuli akumpelaki utenga Abimeleki ku Tolama hoku na kumpwaghila, “Gaali, mwana waka Ebedi, papamu na bhalongu bhaki bhahikiki kutama pani pa Shekemu, na kuchochakela bhandu nahuli bhakukanaje. 32Bhela ikilu jenu, wehapa papamu na bhandu bhaku, na muhikaje kujobhalela na kubhanyepa mwitengu ya pambipi na muchi wa Shekemu. 33Chilabhu lukela, palipita lyobha, ulapulaje muchi hoghu. Gaali payipitaje papamu na bhandu bhaki kuhika kukomana na mwehapa, ubhalapulaje ngati mowiwezilaje.”

34Abimeleki akabhokiki na bhandu bhabhakabhili papamu naku kuhika ku Shekemu chikahi cha ikilu. Akabhaghabhiki bhandu bhaki mu mapogha nchechi na kubhanyepa konihoku pambipi na muchi. 35Bhela Gaali, mwana waka Ebedi akabhili apitiki kunja akajemiki pundyangu ukolongwa wa kujingalila mu muchi, chikahi hechi Abimeleki na bhandu bhaki bhakabhokiki na kupitalila kuhuma pandu pabhakabhili bhajobhalile. 36Gaali paakabhaweni bhandu habha, akumpwaghi Zebuli, “Lingalyaje! Bhandu bhahuluka kuhuma panani ja itombi!”

Zebuli akayangike, “Wehapa ulola mihwili ja itombi kubha ngati bhandu bhabhajenda.”

37Nambu Gaali akapwaghiki kabhete, “Lingalyaje! Bhandu bhahulukila pachilanda ja inchi na lipogha limu la bhandu lihika kwa upambala ghoubhili nkongu ukolongwa ghoulowakeka mwaloni wa Bhalondola!”

38Panihapa Zebuli akumpwaghile, “Kubhi kwaku kulibhona kwaku heno? Bho wehapa le nga weukapwaghiki, ‘Abimeleki nde nane? Kwa ndandi kiki tuntumakyaje? Bhanihabha le nga bhandu bhala bhawajojwihe? Henu upitaje ukakomana nabhu!’ ” 39Bhela Gaali akapitiki na kubhalongoha bhandu bhaka Shekemu kukomana na Abimeleki. 40Nambu Abimeleki akuntopwili Gaali, najombi akatiliki palongi jaki, bhandu bhamaheli bhakapotakiki na kukomakeka mu indela mbaka pundyangu ukolongwa wa muchi. 41Bhela Abimeleki akatami ku Aluma, najombi Zebuli akabhatopwili Gaali na bhalongu bhaki bhabhokaje mu muchi wa Shekemu.

42Chilabhu jaki, Abimeleki akajowini kubha bhandu bha ku Shekemu bhakabhokiki mu muchi na kujenda mu mighonda. 43Bhela akabhatoliki manjolinjoli bhaki, na kubhaghabha mapogha ghatatu, nabhombi bhakapiti kubhanyepalela mumighonda. Paakabhaweni bhandu bhahuma mu muchi, akabhokiki koakajobhalili, akabhalapwili na kubhakoma. 44Abimeleki na mapogha ghaki bhakapiti imbelu kujenda kuhibhalila ndyangu ukolongwa wa muchi, nahuli bhandu ngabhipeta kujingi mkati. Mapogha ghaki ghabheli ghakabhalapwili bhandu bhala bhabhakabhi mu mighonda na kubhakoma. 45Abimeleki akakomini na bhandu bha muchi hoghu muhi jokapi. Akautoliki kwa makili muchi na kubhakoma bhandu bhokapi bhabhakabhi monihomu. Akauyoningi muchi hoghu kwa moto na kuujeghela mwinyu.

46Bhela bhandu bhokapi bhabhakabhili bhatama mnala wa Shekemu pabhakajowini malobhi ghanihagha, bhakakembalili mu ngomi ja nyumba jaka chapanga joakalowakiki Eli Beliti. 47Abimeleki akapwaghakiki kubha bhandu bhokapi bhabhakabhili ku mnala wa Shekemu bhahimangini papamu. 48Abimeleki na bhandu bhokapi bhakapiti kuchitombi cha Salimoni, akatoliki libhaghu na kuheketa limbandi la nkongu, na kulibheka palibhegha laki. Panihapa akabhapwaghili bhandu bhaakabhi nabhu bhala, “Njombatikaje kutenda ngati mondendili nepani.” 49Kila mundu akahekiti limbandi ngati moakahekatili Abimeleki. Bhakatoliki mambandi ghabhu na kughajegheka mu lumatu lwa ngomi, bhakaghajochiki moto na kujijocha moto ngomi heji, bhandu bhokapi akanalomi na akambomba ngati bhandu elufu jinu bhabhakabhili ku mnala wa Shekemu bhakapotile.

50Panihapa Abimeleki na manjolinjoli ghaki bhakapiti ku Tebesi, bhakuuyongalwiti muchi na kuutola kwa makili. 51Nambu mkati ja muchi hoghu pakabhili na mnala ghouchengakiki nganganga. Henu bhandu bhokapi bha muchi hoghu akanalomi na akambomba, papamu na ihongozi bhabhu bhakatilili mkati jaki na kulijighalila ndyangu. Panihapa bhakakweliki panani ja nhwaghala wa mnala hoghu. 52Abimeleki na bhandu bhaki bhakapiti ku mnala na kuulapula, nambu paakauheghalili ndyangu wa mnala hoghu nahuli kuuyonanga kwa moto, 53mbomba jumu akalekili liganga la kuyaghila panani ja mmutu waka Abimeleki, lakakajwili lifuvu la mmutu waki. 54Panihapa Abimeleki akundohiki manyata nkombu waki joakatotwili silaha yaki na kumpwaghila, “Tolaje lipanga laku na ungomaje, nahuli bhandu ngabhihika kupwagha, ‘Nakakomakiki na mbomba.’ ” Panihapa nkombu jola akunhotwi lipanga na kunkoma. 55Bhaizilaeli pabhakaweni kubha Abimeleki apotili, bhakabhokiki na kubhuja kila mundu kunyumba jaki.

56Bhenibhela nde Chapanga moakalepili kubhokana na uhakau ghola ambau Abimeleki akabhili autendiki kwaka tati waki, kwa kubhakoma bhalongu bhaki sabini. 57Bhelabhela Chapanga akabhatendiki bhandu bhaka Shekemu bhalapulikaje kwa mahoku ghabhu ghabhakatendiki. Bhela, masolu ghaka Yotamu mwana waka Yelubaali ghakabhapatike.