Bhaamuzi 10

Tola

1Bhela paakapoti Abimeleki, Tola mwana waka Pua, nchokolu waka Dodo, wa likabila laka Isakali, joakabhi atama ku muchi wa Shamili, akapitalili na kubhakengalela Bhaizilaeli. Tola akabhili atama ku inchi ja itombi yaka Efulaimu. 2Akabhi mtemula wa Bhaizilaeli kwa chikahi cha hyaka ishilini na itatu, akapotili na kutaghakika ku Shamili hoku.

Yaili

3Paakapotili Tola, akapitalili Yaili, Mgileadi, akabhili mtemula wa Bhaizilaeli kwa chikahi cha hyaka ishilini na ibheli. 4Yaili akabhili na bhana bha chikambaku selasini bhabhakabhili bhajendesha maponda selasini. Nabhombi bhakabhili na michi selasini mu inchi ja Gileadi, ambaju mbaka lalenu jilowakeka Hawoti Yaili, yani ijiji yaka Yaili. 5Yaili akapotili, na kutaghakika ku Kamoni hoku.

Yefita

6Bhaizilaeli bhakatendiki mahakau kabheti palongi ja mihu ghaka Bambo Chapanga. Bhakajojabhalili ichapanga ya Mabaali na Maashitoleti, ichapanga ya Shamu, yani Silia, ichapanga ya Sidoni, ichapanga ya Moabu, ichapanga ya Bhaamoli, na ichapanga ya Bhafilisti. Ndandi Bhaizilaeli bhakundekiki Bambo Chapanga wala ngachebhajendalili kuntumakila jombi. 7Bhela inyela jaka Bambo Chapanga jakabhili kwa bhandu bha Izilaeli, najombi akabhalekiki bhakomakikaje na Bhafilisti na Bhaamoli. 8Bhakabhang'ahiki na kubhabhonela Bhaizilaeli kwa chikahi cha hyaka komi na nane. Bhakabhabhonili bhandu bhokapi bha Izilaeli bhabhakabhili upambala wa kabheli wa nkoka Yoludani mu inchi ja Bhaamoli, jejibhili ku Gileadi hoku. 9Bhaamoli nabhombi bhakalombwiki nkoka Yoludani nahuli kukomana na makabila gha Yuda, Benyamini, na Efulaimu. Nabhombi Bhaizilaeli bhakapatiki mang'ahiku namaa.

10Panihapa Bhaizilaeli bhakundelili Bambo Chapanga bhakapwaghaje, “Tepani tutendiki mahoku, kwa kubha tukulekiki wehapa wa Chapanga witu na kughajojabhela Mabaali.”

11Bambo Chapanga akabhayangike, “Bho, nepani le ngachenunkengalili mwehapa kuhuma kwa Bhamisili, Bhaamoli, Bhaamoni, na Bhafilisti? 12Bhasidoni, Bhaamaleki, na Bhamaoni pabhakumboni mwehapa na mwehapa mkanelili nepani na kulobha ujangatilu, bho, ngachenunkengalili kuhuma mu mabhoku ghabhu? 13Nambu mwehapa mnekiki nepani na kuijojabhela ichapanga nayengi, kwa ndandi jeniheji nganunkengaleli kabheti. 14Njendaje mkailelilaje ichapanga yela yemwihawili, na ichapanga yeniheyi yunkengalyaje mwehapa pamukubha mu mang'ahiku!”

15Nambu Bhaizilaeli bhakumpwaghi Bambo Chapanga, “Tutendiki mahoku. Ututendilaje lela leulibhona kubha lamboni kwaku, nambu tukulobha, chondi, utukengalyaje lalenu.” 16Nabhombi bhakaibhohiki ichapanga ya chigheni pachilanda jabhu, na bhakunjojabhili Bambo Chapanga. Na Chapanga ngacheakaweziki kujendalela kuhinakila nakanopi kubhona mang'ahiku gha Bhaizilaeli. 17Bhaamoni bhakalibhongini na kubheka likambi labhu ku Gileadi hoku. Bhandu bha Izilaeli nabhombi bhakalibhongini na kubheka likambi labhu ku Misipa hoku. 18Panihapa Bhaizilaeli na ihongozi bha bhandu, bhakalalukanile, “Bho, nde nane joanatumbulaje kukomana na Bhaamoni? Joayitendaje bhenibhela nde joanakubhaje chiongozi wa bhandu bhokapi bhabhatama ku Gileadi.”