Bhaamuzi 11

1Bhela ku Gileadi hoku kukabhili na mundu jumu nkomana ngondu wa wichu joakalowakiki Yefita, mwana waka mubhu jumu nkemi, na tati waki akalowakiki Gileadi. 2Gileadi akabhili na bhana bhangi kwaka nhwanu waki wa halali. Bhana bhaka mbomba hoju pabhakakoliki, bhakuntopwili Yefita panyumba, na kumpwaghila, “Wehapa ngacheubhili na pandu pa upwelelu kuhuma kwaka tati witu, maghambu wehapa nde wa mwana waka mbomba najongi.” 3Panihapa Yefita akabhatiliki bhalongu bhaki na kujenda kutama mu inchi ja Tobu, konihoku bhandu bha liyaha bhakalombini naku na kunjengalela.

4Pachapetiki chikahi chichokopi, bhandu bha likabila la Bhaamoni bhakakomini na Bhaizilaeli. 5Chikahi bhandu bha likabila la Bhaamoni pabhakabhili bhakomana ngondu na Bhaizilaeli, bhazee bhaka Gileadi bhakapiti kuntola Yefita mu inchi ja Tobu. 6Bhakumpwaghili Yefita, “Hikaje utulonguhaje mu ngondu jitu na Bhaamoni.”

7Nambu Yefita akabhayangike, “Bho, ngachemwanhakalili nepani na kundopola mu nyumba jaka tati wangu? Bho, maghambu kiki munhikila sajenu, chikahi pambi mu mang'ahiku?”

8Bhazee bhaka Gileadi bhakumpwaghili Yefita, “Nambu sajenu tung'anambwiki kukujengalela wehapa, nahuli ubya papamu na tepani kukomana na Bhaamoni, na wehapa ukubhaje wa chiongozi witu na bhandu bhokapi bhaka Gileadi.”

9Yefita akabhapwahili bhazee bhaka Gileadi habha, “Ngati anamungelawihi kunyumba kukomana na Bhaamoni, najombi Bambo Chapanga anaanyangatili kubhaweza Bhaamoni, bho, nde chakaka lelu anangubha chiongozi winu?”

10Bhazee bhaka Gileadi bhakamuyangiki Yefita, “Bambo Chapanga nde mlandilu witu. Chakaka anatutendaje ngati moupwaghile.” 11Panihapa Yefita akapiti na bhazee bhaka Gileadi, na bhandu bhakuntendiki kubha chiongozi na nkolongwa wa manjolinjoli ghabhu. Najombi Yefita akakelabhukili malobhi ghaki ghokapi palongi jaka Bambo Chapanga ku Misipa hoku.

12Bhela, Yefita akapeliki utenga kwaka nkolongwa wa Bhaamoni akapwaghaje, “Bho, wehapa ubhi na kike mbaka uhikiki kujilapula inchi jitu?”

13Nkolongwa wa Bhaamoni akabhayangiki bhatenga bhaka Yefita bhala, “Bhaizilaeli pabhakabhokiki ku Misili, bhakatoliki inchi jangu kutumbula nkoka Alinoni mbaka nkoka Yaboki, na mbaka nkoka Yoludani. Bhela ungelabhukyaje inchi yeniheyi kabheti kwa lukwali.”

14Yefita akabhatumiki bhatenga mala ja kabheli kujenda kwaka nkolongwa wa Bhaamoni, 15akumpwaghile, “Yefita akupwaghi anana: Bhaizilaeli ngachebhakatoliki inchi ja Moabu, wala inchi ja Bhaamoni. 16Nambu Bhaizilaeli pabhakabhokiki ku Misili, bhakapetili mu chingwenji mbaka Bahali ja Shamu, na kuhika ku Kadeshi. 17Panihapa Bhaizilaeli bhakatumiki bhatenga kwaka nkolongwa wa Edomu, bhakapwaghaje, ‘Utujetakyaje kupeta mu inchi jako.’ Nambu nkolongwa wa Edomu akakaniki. Bhakapeliki utenga kwaka nkolongwa wa Moabu, najombi akakaniki. Bhela Bhaizilaeli bhakatami ku Kadeshi hoku. 18Panihapa Bhaizilaeli bhakatendiki mwanja kupetela lipololu kuyongolota inchi ja Edomu na Moabu mbaka pabhakahikiki upambala wa kolipita lyobha wa Moabu, na kubheka likambi labhu kwihi ja nkoka Alinoni. Nambu ngachebhakajingili mkati ja malindakilu gha Moabu. Nkoka Alinoni ukabhili nde malindakilu gha Moabu. 19Bhela Bhaizilaeli bhakatumiki bhatenga kwaka Sihoni nkolongwa wa Bhaamoli, joakabhili atawala ku Heshiboni, na kumpwaghila, ‘Utujetakyaje kupeta mu inchi jaku, nahuli tujenda ku inchi jitu.’ 20Nambu Sihoni ngacheakabhajetakili Bhaizilaeli bhapetaje mu inchi jaki. Panihapa Sihoni akabhongini bhandu bhaki bhokapi, akabhekiki likambi ku Yahasa hoku, na kukomana na Bhaizilaeli. 21Nambu Bambo Chapanga, Chapanga wa Izilaeli, akuntendiki Sihoni na bhandu bhaki bhokapi kulepalela palongi ja Bhaizilaeli. Bhela Bhaizilaeli bhakatawili inchi jokapi ja Bhaamoli, bhabhakabhili bhatama mu inchi jeniheji. 22Bhakatoliki pandu pokapi pa Bhaamoli kutumbula ku nkoka Alinoni mbaka ku nkoka Yaboki, na kutumbula ku chingwenji upambala wa kolipita lyobha mbaka ku nkoka Yoludani upambala wa kolijibhi lyobha. 23Bhela Bambo Chapanga, Chapanga wa Izilaeli, akabhatopwili Bhaamoli palongi ja Bhaizilaeli. Bho, wehapa le upala kutunyaghula inchi jitu? 24Bho, ngacheikupalika kutola chela ambachu chapanga waku Kemoshi atehi kukupekeha? Nambu inchi jokapi ambaju Bambo Chapanga, Chapanga witu, atupekihi tepani, inchi heji nde jitu. 25Bho, wehapa ubhi na makili kupeta Balaki mwana waka Sipoli, joakabhili nkolongwa wa Moabu? Bho, jombi le akakomini na Bhaizilaeli au kulochana nabhu chikahi chokapi chela? 26Chikahi chokapi Bhaizilaeli pabhatamikaje mu muchi wa Heshiboni na ijiji yaki, na muchi wa Aloeli na ijiji yaki, papamu na michi jokapi jejibhili munkeghi ja nkoka Alinoni kwa chikahi cha hyaka mia tatu, bho, maghambu kiki mwehapa ngachemwatoliki pandu panihapa mu chikahi cheniheche? 27Nepani ngachenukuhokili lijambu lokapi lela, nambu wehapa nde weunihokihi kwa kukomana ngondu na nepani. Bhela Bambo Chapanga joabhili Mtemula, lalenu na atemulaje ngondu pachilanda ja Bhaizilaeli na Bhaamoni.” 28Nambu nkolongwa wa Bhaamoni, ngacheakajowanili utenga waka Yefita hoghu.

29Panihapa Roho waka Bambo Chapanga akunhikili Yefita. Najombi akabhokiki na kupeta pachilanda ja Gileadi na Manase, akakelawiki ku Misipa mu inchi ja Gileadi na kujendalela kujenda kukomana na Bhaamoni. 30Yefita akabhekiki nazili kwaka Bambo Chapanga akapwaghaje, “Ngati anaubhatendiki Bhaamoni kulepalela palongi jangu, 31chokapi chela chenachipitaje pandyangu wa nyumba jangu cha kutumbula nahuli kunyopalela pangelabhuka kwa lukwali mu kubhaweza Bhaamoni, anachikubha chaka Bambo Chapanga na ananichibhohaje kubha nyambiku ja kujochakeka.”

32Panihapa Yefita akalombwiki kukomana na Bhaamoni habha, najombi Bambo Chapanga akabhatendiki Bhaamoni kulepalela palongi jaka Yefita. 33Akabhalapwili namaa na kubhaweza kutumbula ku Aloeli mbaka pambipi na Miniti na kujendalela mbaka ku Abeli Kelamimu, michi jokapi jejakalapuliki jakabhi ishilini. Panihapa Bhaizilaeli bhakabhaweziki Bhaamoni.

Kamwali waka Yefita

34Bhela Yefita paakakelawiki kunyumba jaki ku Misipa hoku, kamwali waki akapitiki kuhika kunjopalela koni akahinaje na kuhona kang'oma. Kamwali hoju akabhili nde mwana waki wa kanjika. Yefita ngacheakabhili na mwana jongi wa chikambaku wala mwali. 35Yefita paakumbweni, akahuliki ingobhu jaki na kulela, “Wenga wa mwali wangu! Undendiki ngubhaje mabhinilu gha ntima. Wehapa ubhili jumu wa bhala bhabhaning'aha. Nyomwili kulapa kwaka Bambo Chapanga, nanatu nganhwezi kuheketa chela chenapiki.”

36Kamwali waki akumpwaghile, “Tati wangu, upwaghiki lilobhi laku kwaka Bambo Chapanga, undendilaje nepani ngati bhela moupwaghile, kwa ndandi Bambo Chapanga akupekihi kubhaweza maadui bhaku Bhaamoni.” 37Najombi akumpwaghili tati waki, “Nobha undendilaje lijambu alele. Umbekyaje myehi jibheli nahuli nyendaje na bhakochi bhangu ku itombi, nakaulelilaje umwali wangu maghambu nepani anambotilaje mangani ja kutoghuleka.” 38Tati waki akumpwaghile, “Uweza kujenda.” Najombi akundekiki ajendaje kwa myehi jibheli. Panihapa akabhokiki papamu na akakamwali bhajaki, najombi akaulelili umwali waki ku itombi hoku kwa ndandi ngaakatoghuliki ng'o. 39Pajakajomwiki myehi jibheli heji, akakelawiki kwaka tati waki, najombi tati waki akuntendili ngati moakabhili abhohiki chilanga chaki. Najombi akabhili mwali bikila.

Henu kutumbula chikahi hechi kukabhili na ntetu hoghu mu Izilaeli, 40kila chaka akakamwali bha Izilaeli bhakabhili bhajenda kwa machobha nchechi nahuli kunkomboka kamwali waka Yefita paakapotile ku Gileadi hoju.