Bhaamuzi 12

Yefita na likabila la Bhaefulaimu

1Bhandu bha likabila laka Efulaimu bhakabhongini manjolinjoli ghabhu, na kulomboka kujenda ku Zafoni, bhakumpwaghili Yefita, “Bho, maghambu kiki upiti kukomana na Bhaamoni panga kutuloha nahuli tujendaje papamu na wenga? Henu anatujocha motu nyumba jaku, papamu na wamweti ukabya mkati jaki.”

2Yefita akabhapwaghile, “Nepani na bhandu bhangu tukabhili na malochanu makolongwa na Bhaamoni, nakundobhiki muhikaje munyangatyaje nambu ngachemukahikiki kungengalela palongi jabhu. 3Panakabhoniki kubha ngachemkambekihi ujangatilu, nepani nakabhi mu hatali ja kupotela, na nakalombwiki kukomana na Bhaamoni. Najombi Bambo Chapanga akambekihi uwezu wa kubhaweza bhombi. Henu, bho, maghambu kike mnihikili lalenu nahuli kukomana na nepane?” 4Panihapa Yefita akabhabhongini bhandu bhokapi bhaka Gileadi, na kukomana na bhandu bhaka Efulaimu. Bhagileadi bhakabhaweziki bhandu bhaka Efulaimu, kwa kubha Bhaefulaimu bhakapwaghike, “Mwehapa Bhagileadi nde mwentiliki kuhuma mu likabila laka Efulaimu na Manase.” 5Bhagileadi bhakakamwili ilombukelu ya nkoka Yoludani nahuli kuhibhalila indela ya kupeta Bhaefulaimu habha, panihapa ikabhili kila chikahi anahikiki mundu joatila ngondo na kulobha kulomboka, bhandu bha Gileadi bhakundalukili, “Bho wehapa le nde Mwefulaimu?” Ngati akayangiki, “Ngabhela,” 6bhakumpwaghile, “Haya, upwagha Shiboleti.” Nambu jombi ngacheakapwaghiki, “Siboleti,” Kwa ndandi ngacheakaweziki kuloghola lilobhi heli wichu, bhakunkamwili na kunkoma pa ilombukelu ya Yoludani hapa. Bhaefulaimu elufu alubaini na bhabheli bhakakomakiki chikahi hechi.

7Yefita akabhili mtemula wa Bhaizilaeli kwa hyaka sita. Panihapa Yefita akapotili, akataghakiki mu ghumu wa michi ja Gileadi.

Ibizani, Eloni na Abidoni

8Bhela paakajomwiki Yefita, Ibizani wa ku Beselehemu akabhili mtemula wa Izilaeli. 9Jombi akabhili na bhana selasini bha chikambaku na bhana selasini bha chimbomba. Akabhatendiki akakamwali bhaki bhatoghulikaje kwa bhandu bhangi kunja ja lukolu lwaki, na bhana bhaki bha chikambaku akabhatoghukili akambomba selasini kuhuma kunja ja lukolu lwaki. Ibizani akabhili mtemula wa Izilaeli kwa chikahi cha hyaka saba. 10Ibizani akapotili, na akataghakiki ku Beselehemu hoku.

11Paghakapetiki ghanihagha, Eloni, wa likabila laka Zabuloni, akabhili ntemula wa Izilaeli kwa hyaka komi. 12Bhela Eloni akapotili, akataghakiki mu Aiyaloni, mu inchi ja Zabuloni.

13Paghakapetiki ghanihagha, Abidoni mwana waka Hileli, kuhuma mu muchi wa Pilatoni, akabhili ntemula wa Izilaeli. 14Najombi akabhili na bhana alobaini, na bhachokolu selasini, bhabhakabhili bhajendesha maponda sabini, akabhili ntemula wa Bhaizilaeli kwa chikahi cha hyaka nane. 15Panihapa Abidoni mwana waka Hileli, kuhuma mu muchi wa Pilatoni, akapotili na kutaghakika ku Pilatoni mu Efulaimu, mu inchi ja itombi ya Bhaamaleki.