Bhaamuzi 13

Kubhelakeka kwaka Samsoni

1Bhaizilaeli bhakatendiki kabheti uhakau palongi jaka Bambo Chapanga, na Bambo Chapanga akabhalekiki bhatawaliwaje na Bhafilisti kwa chikahi cha hyaka alubaini.

2Bhela kukabhi na mundu jumu wa ku Sola, wa likabila laka Dani, lihina laki akalowakiki Manoa. Nhwanu waki akabhi ngulumba. 3Lichobha limu, mtumika wa kunani kwaka Bambo Chapanga akumpitalili mbomba hoju na kumpwaghila, “Wehapa wa ngulumba na ngacheubheleka, nambu anaupata chitumbu na anaulibhopulaje mwana wa chikambaku. 4Bhela ulilingalyaje namaa ngawikunywa divai wala uwembi, wala ngawikula chindu chokapi chela chechibhi chihakau. 5Kwa ndandi anaupata chitumbu na anaumbelakaje mwana wa chikambaku. Majunju ghaka mwana hoju ngaghimoghakeki ng'o, maghambu anakubha atengakiki kwa ndandi ja lihengu laka Bambo Chapanga kutumbula kubhelakeka kwaki. Najombi anatumbulaje kubhakengalela Bhaizilaeli kuhuma mu utawala wa Bhafilisti.”

6Panihapa mbomba hoju akapiti kumpwaghi ndomi waki, “Mundu waka Chapanga akanhikili. Pamihu jaki pakabhili ngati ubhonikanu waka mtumika wa kunani kwaka Chapanga, akabhili wa kujoghuheka namaa. Ngachenakundalukili koahumiki wala ngacheakambwaghi lihina laki. 7Nambu akambwaghi kubha anambata chitumbu na anamelaka mwana wa chikambaku. Akanganakili nganikunywa divai wala uwembi, wala nganikula chindu chokapi chela chechibhi chihakau. Maghambu mwana hoju anakubha atengakiki kuhenga lihengu laka Chapanga kutumbula kubhelakeka kwaki, mbaka lichobha la kupotela kwaki.”

8Panihapa Manoa akundobhiki Bambo Chapanga, akapwaghaje: “Chondi Bambo Chapanga nukulobha, mundu waka Chapanga jountumiki kwitu hoju ahikaje kabheti nahuli atubholaje ntundu wa kundela mwana hoju joanabhelakikaje.”

9Chapanga akalijowini lilobhu laka Manoa, najombi mtumika wa kunani waka Chapanga jola akunhikili kabheti mbomba jola paakabhili kungonda, nambu Manoa, ndomi waka mbomba hoju ngacheakabhile. 10Bhela mbomba jola akapiti manyata, na akumpwaghili ndomi waki, “Lingalyaje! Mundu jola joakanhikili lichobha lela, ambitalili kabhete.”

11Manoa akajinwiki na kulongana na nhwanu waki mbaka kwaka mundu jola, na kundalukila mundu jola, “Bho, wehapa le nde mundu jola joukalongili na nhwanu wango?”

Mundu jola akayangike, “Ena, nde nepane.”

12Panihapa Manoa akundalukile, “Chikahi malobhi ghaku paghipitalyaje, bho, nde mambu bholi ghatwihengaje kwa ndandi jaka mwana hoju? Bho, lihengu laka mwana hoju analikubha kike?”

13Mtumika wa kunani kwaka Bambo Chapanga akamuyangiki Manoa, “Nhwanu waku impalika kuhenga ghokapi ghala ghanumpwaghilaje. 14Ngaikula chindu chokapi chela chechipitaje mu zabibu ng'o, wala ngaikunywa divai wala ngaikunywa uwembi, wala kula chindu chokapi chela chechibhi chihakau. Ghokapi ghanukulaghalakili, ughajengalyaje.”

15Manoa akumpwaghili mtumika wa kunani kwaka Bambo Chapanga jola, “Chondi nukulobha, utamaje pachokopi nahuli tuwezaje kukuandalila likenda la imbuhi kwa ndandi jaku.” 16Mtumika wa kunani kwaka Bambo Chapanga jola akumpwaghili Manoa, “Hata ngati unyomalakela kutama, nganguli chindu chokapi chela kwaku. Nambu ngati anaupala, utayalishaje nyambiku ja kujochakeka, umbokihaje Bambo Chapanga.” Manoa ngacheakamanyi kubha jonihoju akabhili mtumika wa kunani kwaka Bambo Chapanga.

17Panihapa Manoa akundalukili mtumika wa kunani kwaka Bambo Chapanga jola, “Bho, lihina laku nde nane, nahuli tuwezaje kukupekeha utopelu chikahi paghipitalyaje mambu ghala ghaulongile?”

18Mtumika wa kunani kwaka Bambo Chapanga akumuyangike, “Bho, maghambu kike unalukila lihina langu? Lihina langu nde la kukangacha.”

19Panihapa Manoa akalitoliki likenda la imbuhi, papamu na nyambiku ja uhembi, najombi akumbokili Bambo Chapanga nyambiku panani ja litalaghu. Najombi mtumika wa kunani waka Bambo Chapanga jola akatendiki lijambu la kukangacha chikahi Manoa na nhwanu waki bhakabya bhalingalila. 20Manoa na nhwanu waki pabhakabhi bhalingalila myengi ja motu jakakwelaje kunani kumahundi kuhuma pandu pa kubhokeha nyambiku, bhakumbweni mtumika wa kunani kwaka Bambo Chapanga mu myengi heji akakwelaje kujenda kunani kumahundi. Panihapa Manoa na nhwanu waki bhakachikimi na kunjojabhalela. 21Mtumika wa kunani kwaka Bambo Chapanga ngacheakumpitalili kabheti Manoa na nhwanu waki. Panihapa Manoa akamanyi kubha jonihoju akabhili mtumika wa kunani kwaka Bambo Chapanga.

22Manoa akumpwaghi nhwanu waki, “Chakaka anatupotilaje, maghambu tumbweni Chapanga!”

23Nambu nhwanu waki akamuyangike, “Ngati Bambo Chapanga akapaliki kutukoma, ngaakajetakili nyambiku jitu ja kujochakeka na ja chilebhi, wala ngaakatulangihi mambu ngati aghagha chikahi chenu.”

24Bhela nhwanu waka Manoa akalibhopwili mwana wa chikambaku, najombi Manoa akundohiki lihina Samsoni. Mwana akakoliki, najombi Bambo Chapanga akupengalile. 25Roho waka Bambo Chapanga akatumbwi kuhenga lihengu mkati jaki chikahi paakabhili ku likambi la likabila laka Dani hoku, pachilanda ja muchi wa Sola na muchi wa Eshitaoli.