Bhaamuzi 14

Samsoni na mbomba kuhuma ku Timuna

1Lichobha limu Samsoni akapiti ku Timuna, na konihoku akumbweni mbomba wa Kifilisti. 2Paakakelawiki kunyumba akabhapwaghili bhabheleka bhaki, “Numbweni kamwali jumu Mfilisti ku Timuna huko. Mbala kuntoghola kamwali hoju. Njendaye mukuntolaje abya nhwanu wangu.”

3Nambu bhabheleka bhaki bhakundalukile, “Bho, ngacheabhili kamwali jokapi pachilanda ja bhalongu bhaku au pachilanda ja bhandu bhitu mbaka ujendaje kutoghola kwa Bhafilisti bhangakuheketa jando?”

Nambu Samsoni akumpwaghili tati waki, “Mundoghukyaje kamwali hoju, maghambu numpala namaa.”

4Bhabheleka bhaki ngachebhakamanyi kubha lijambu heli lakabhili mpangu waka Bambo Chapanga, maghambu akabhili alonda ndandi ja kubhalapula Bhafilisti. Ndandi chikahi hechi, Bhafilisti bhakabhili bhabhatawala Bhaizilaeli.

5Samsoni na bhabheleka bhaki bhakabhokiki kujenda ku Timuna. Pabhakahikiki ku mighonda ja mizabibu hoku, lingalyaje, palapala mwana lihimba akunhikili na kungulumila Samsoni. 6Roho waka Bambo Chapanga akumpekihi makili Samsoni, najombi akalikamwili na kulikajula ndomu wa lihimba lela kwa mabhoku ghaki panga kutumi chindu chokapi ngati bhela mundu moakajulila mwana mbuhi, wala ngacheakumpwaghili tati waki wala mabhu waki lijambu heli.

7Panihapa akahelili kujenda kulongela na kamwali jola, kamwali jola akunyambihi namaa Samsoni. 8Paghakapetiki machobha machokopi Samsoni akapiti ku Timuna kuntola kamwali jola, paakabhili mwindela akabhetwiki kuulola ntuhi wa lihimba ghola, lingalyaje, kukabhili na injuchi na busi. 9Bhela, akatoliki busi kwa mabhoku ghaki akabya akula koni akajendalya na mwanja waki. Paakahikiki kwa bhabheleka bhaki, akabhapekihi busi uchokopi nabhombi bhakakuliki. Nambu ngacheakabhapwaghili kubha ngati busi heji akapakwili mkati ja ntuhi wa lihimba.

10Bhela tati waka Samsoni akapiti kunyumba jaka kamwali jola kubhoha mahali, najombi Samsoni akatendiki uhangalalu konihoku, ngati mobhayobhalili kuhenga mu chikahi chenihechi. 11Bhafilisti pabhukumbweni Samsoni bhakundetili akakombu selasini atama nabhu. 12Samsoni akabhapwaghile, “Ananumpekya chitendawili. Ngati anamuweziki kufyatula chitendawili hechi mu chikahi cha machobha saba gha uwangalalu wa ndowa, nepani ananumpekya ingobhu selasini ya langi jihuhu na ingobhu yengi selasini ya uwangalalu wa ndowa. 13Nambu anandepalili kufyatula chitendawili hechi, mwehapa anambekyaje nepani ingobhu selasini ya langi jihuhu na ingobhu yengi selasini ya kuwata pa uwangalalu wa ndowa.”

Bhakumpwaghile, “Haya, utupwaghilaje chitendawili hechi, nahuli tupata kujowana.”

14Samsoni akabhapwaghile,

“Mkati jaka mundu joakula kukapitiki chilebhi,

mkati jaka mwana makili kukapitiki chindu chinohu.”

Kwa chikahi cha machobha ghatatu ngachebhakaweziki kubhoha liyangu.

15Lichobha la saba, bhakumpwaghili nhwanu waka Samsoni, “Mpembalyaje ndomi waku nahuli atumpwaghilaje ndandi ja chitendawili hechi, nangabhela anatukujocha motu wehapa na nyumba jaka tati waku. Bho, mtukokiki pambani nahuli mpata kutunyaghula mali ghito?” 16Panihapa nhwanu waka Samsoni akaleliki palongi jaki Samsoni na kumpwaghila, “Utenda kunhakalila! Ngacheumbala hata pachokopi. Ubhapendakili bhandu bhangu chitendawili, nambu nepani ngacheumbwaghili liyangu laki.”

Samsoni akumpwaghile, “Nepani ngachenabhapwaghili hata bhabheleka bhangu. Bho, henu ananhweza bholi kukupwaghi wehapa?” 17Nhwanu waka Samsoni akaleliki mu machobha ghokapi saba ghala gha uwangalalu wa ndowa. Lichobha la saba lela Samsoni akumpwaghili nhwanu waki ndandi ja chitendawili chela kwa ndandi akabhili andobha namaa. Najombi nhwanu waka Samsoni akapiti kubhapwaghila bhandu bhaki ndandi ja chitendawili chela. 18Lichobha la saba heli mangani ja kujibhi lyobha, bhandu bha muchi ghola bhakumpwaghi Samsoni,

“Bho, nde chindu bholi chinohu kupeta busi?

Bho, nde nani joabhi na makili kupeta lihimba?”

Samsoni akabhapwaghile,

“Ngati ngamwakunkolwihi nchumba wangu,

ngamwakaweziki kufyatula chitendawili changu.”

19Palapala Roho waka Bambo Chapanga akuntendiki Samsoni kubha na makili namaa. Najombi akapiti mbaka ku Ashikeloni, akabhakomiki bhandu akanalomi selasini, na kubhahula ingobhu yabhu ya kuwata pa uwangalalu wa ndowa, na kubhapekeha bhandu bhala bhabhakafyatwili chitendwili chaki. Panihapa akabhokiki na kujenda kunyumba ja bhabheleka bhaki koni akabya na inyela namaa. 20Nambu nhwanu waka Samsoni bhakuntoghukili nkombu jumu, joakabhili njemalela chikahi cha uwangalalu wa ndowa jaki.