Bhaamuzi 15

1Chikahi chichokopi pachapetiki, chikahi cha mahunu gha inganu, Samsoni akatoliki likenda la imbuhi, na kujenda kumbona nhwanu waki. Akumpwaghili nkohanu waki wa chikambaku kubha, “Mbala kumbona nhwanu wangu kuchumba chaki.”

Nambu nkohanu waki wa chikambaku hoju akunkanakili ngayijingila. 2Nkohanu waka Samsoni wa chikambaku akumpwaghili Samsoni, “Nepani nhambukya kubha unhakalili namaa, henu nuntoghukili nkochi waku. Bho, nung'una waki wa chimbomba le nga mnyahi nakanopi kupeta jombe? Chondi untoghula jonihojo pandu paki.”

3Samsoni akabhapwaghile, “Henu, cheananabhahengila Bhafilisti chikahi chenu, nganikubhi na lawama.” 4Panihapa Samsoni akapiti kukamula mabweha mia tatu na akaghakongiki mikela jabhu papamu bhabheli bhabheli. Akakongiki myengi ja moto kila libhongelu la mabweha. 5Akapambakili myengi heji moto na kughalekakela mabweha ghala, na mabweha ghanihagha ghakajingili mu mighonda ja Bhafilisti na kuyonanga makenda gha inganu na inganu yeyakabhili ikona ngacheihunakiki papamu na mighonda ja mizeituni. 6Panihapa Bhafilisti bhakalalukile, “Bho, nde nane joatendiki lijambu lenihele?” Bhakabhapwaghile, “Nde Samsoni, nkohanu waka Mtimna jola, atendiki bhenibhela kwa ndandi nkohanu waki wa chikambaku hoju antoliki nhwanu waka Samsoni na kuntoghukela nkombu jumu joakabhili njemalela wa uwangalalu wa ndowa jaka Samsoni.” Bhela Bhafilisti bhakapiti kubhakoma kwa kubhanjocha moto mbomba jola papamu na tati waki.

7Samsoni akabhapwaghili Bhafilisti, “Kwa ndandi mtendiki bhenibhela, chakaka napa kubha ngamoki mbaka nunkelabhukyaje.” 8Panihapa Samsoni akabhalapwili nakanopi na kubhakoma bhandu bhamaheli namaa. Bhela Samsoni akapiti kutama mu likolu la litalaghu la ku Etama.

Samsoni abhaweza Bhafilisti

9Bhela manjolinjoli bha Bhafilisti bhakahikiki na kubheka likambi ku Yuda hoku na kuulapula muchi wa Lehi. 10Bandu bha Yuda bhakabhalalukile, “Bho, maghambu kiki muhikiki kutulapu tepane?”

Bhakayangike, “Tuhikiki nahuli kunkamula Samsoni na kuntendela ngati moatutendile tepane.”

11Panihapa bhandu elufu itatu bha Yuda bhakunjendili Samsoni mu likolu lelibhili mu litalaghu la ku Etamu, na kupwaghila, “Bho, ngacheumanyi kubha Bhafilisti bhatutawala? Bho, nde kiki cheniheche cheututendile?”

Samsoni akabhayangike, “Ngati mobhakandendili nepani, na nepani nabhatendili bhelabhela.”

12Bhakumpwaghile, “Tuhikiki kukukonga nahuli tukupelakaje kwa Bhafilisti.”

Samsoni akabhapwaghile, “Mnapilaje kubha mwehapa mabheti ngamwingomi.”

13Bhakamuyangike, “Tepani ngatukukomi, nambu anatukukonga pela na kukupeleka kwabhu.” Bhela bhakunkongiki kwa mighoji jibheli jahenu, na kumpiha mu likolu heli.

14Paakahikiki ku Lehi, Bhafilisti bhakunhikili koni bhakalapula njobhela. Palapala Roho waka Bambo Chapanga akunjeghili makili Samsoni. Na mighoji jebhakankongiki mu mabhoku jaki jela ikahekatiki ngati ingobhu jihuhu jejijochakiki kwa moto, na hifungu yaki ikahawili pahi kuhuma mu mabhoku ghaki. 15Panihapa Samsoni akaliweni lihupa libhehi la ndomu wa pahi wa liponda, akahatambwili chiwoku chaki, na akatoliki lihupa lela na kubhakoma bhandu elufu jimu. 16Panihapa Samsoni akapwaghike,

“Kwa lihupa la liponda nabhatendiki kubha ngati lipogha la maponda mongini mapogha gha mituhi.

Kwa lihupa la liponda nabhakomiki bhandu elufu jimu.”

17Paakajomwili kupwagha, akalilekili lihupa lela. Pandu pala pakalohakiki “Lamati Lehi,” yani “Katombi ka Lihupa.”

18Panihapa Samsoni akabhi na inywita namaa, henu akundobhiki Bambo Chapanga akapwaghaje, “Wehapa nde weuletiki ukombola hoghu, kwa kupetela kwaka mtumika waku. Bho, henu anauneka nguhaje kwa inywita na kukamulika na Bhafilisti bhangakucheku jandu habha?” 19Chapanga akahowili pandu papakabhili na libhomba ku Lehi hoku, machi ghakapitiki. Samsoni paakakunywiki machi ghanihagha, makili ghaki ghakunkelubhukili na akahekalile. Henu chemichemi jela jakalohakiki Eni Hakole, yani mundu joaloha kupala ujangatilu, najombi chemichemi heji jikali jibhi mbaka lalenu ku Lehi huko.

20Bhela Samsoni akabhili ntemula wa Bhaizilaeli kwa hyaka ishilini, chikahi cha Bhafilisti.