Bhaamuzi 16

Samsoni ajenda ku Gaza

1Lichobha limu Samsoni akapiti ku Gaza, akahimangini na mbomba jumu nkemi, na kughone kwaki. 2Bhandu bha ku Gaza pabhakapwaghakiki, kubha Samsoni abhili konihoko. Bhela bhakayongalwiti pandu pala na kujobhalela pundyangu ukolongwa wa muchi. Bhakatumbili chinunu kelukelu ngwe, bhakapwaghaje, “Tunjobhalyaje mbaka pachibhombu, panihapa anatunkomaje.” 3Nambu Samsoni akaghonilii mbaka ikilu pamahiku. Chikahi cha ikilu pamahiku akajumwiki na kukamula ngelaketi ibheli ya milyangu, akaitupwili papamu na makabali ghaki na akaghatotwili na kujenda naghu mbaka pambipi na Hebuloni.

Samsoni na Delila

4Paghapetiki ghanihagha, Samsoni akumpaliki mbomba jumu joalohakikaje Delila ambuju kabhi atama mu libondi la Soleki. 5Ihongozi bha Bhafilisti bhakunjendi Delila na kumpwaghila, “Umpembalakya Samsoni nahuli akupwaghilaje chindu chechuntenda akubha na makili ghamaheli na ntundu motwiwezilaje kunkamula na kunkonga. Anautendiki bhenibhela, kila jumu witu anaakumpekyaje hipandi elufu jimu na mia jimu ya madini gha feza.”

6Delila akumpwaghi Samsoni, “Chondi nukulobha umbwaghilaje nde chindu bholi chechukutenda ukubhaje na makili kwa ndundu aghoghu. Bho, mundu aweza bholi kukuweza na kukukamula na kukung'aha?”

7Samsoni akayangike, “Ngati anabhangongiki kwa mighoji saba ambaju jikona ngachejijomiki, panihapa anangubha njeta makili ngati mundu jongi jokapi jola.”

8Panihapa ihongozi bha Bhafilisti bhakundetili Delila mighoji saba mibhei, najombi akunkongiki Samsoni. 9Delila akabhili abhekiki bhandu nahuli bhunjobhalyaje mu chumba chengi. Bhela akumpwaghili Samsoni kwa sauti ngolongwa, “Samsoni, Bhafilisti bhahika kukulapula!” Nambu jombi akajihekiti mighoji jela ngati uzi wa pamba paukupa moto. Bhela sili ja makili ghaki ngachejamanyakini.

10Panihapa Delilia akumpwaghi Samsoni, “Wehapa undendili chihongolu na kumbwaghila upuhi. Chondi nukulobha umbwaghilaje, bho, uweza kukongakeka na chindu bhole?”

11Samsoni akamyangike, “Anabhangongiki kwa mighoji jahenu jangakutumika, anangubha njeta makili ngati mundu jongi.”

12Delila akatoliki mighoji jahenu na kunkonga naju Samsoni. Panihapa akumpwaghi Samsoni kwa sauti ngolongwa, “Samsoni! Bhafilisti bhahikiki kukulapula!” Bhandu bhala bhabhakabhili bhunjobhalela Samsoni bhakabhili mu chumba chengi. Nambu akajihekiti mighoji jela jeakabhili akongakiki mu mabhoku ghaki ngati aheketa uzi.

13Delila akumpwaghi Samsoni, “Mbaka sajenu ukona undendela chihongolu na kumbwaghila upuhi. Umbwaghilaje, bho, uweza kukongakeka na chindu bhole?”

Samsoni akamuyangike, “Ngati anaulokiki mabutu saba gha majunju gha mmutu wangu na kungonga papamu na chitambala cha mbumbu na kukaza nakanopi pa mpengu wa chitanda, anangubha njeta makili ngati mundu jongi.”

14Chikahi Samsoni paakabhili aghonili Delila akalokiki mabutu saba gha majunju ghaka Samsoni akaghakongiki kwa chitambala cha mbumbu na kughakaza namaa kwa litendeghu. Panihapa akumpwaghi Samsoni, “Samsoni! Bhafilisti bhahika kukulapula!” Nambu akajumwiki mu lughonu na kuholamola mpengu wa chitanda chela na chitambala cha mbumbu chela.

15Panihapa Delila akumpwaghili Samsoni, “Bho, uweza bholi kupwagha, ‘Nukupala,’ koni mtima waku ngacheubhi papamu na nepani? Undendili chihongolu mala katatu na ngacheumbwaghili sili ja makili ghaku ghamaheli.” 16Bhela, Delila akajendalili kung'aha namaa Samsoni kwa malobhi ghanihagha lichobha kwa lichobha na kunhyomela, roho jaki jakang'ahakiki pambipi ja kupotela. 17Panihapa Samsoni akumpwaghi Delila sili ja makili ghaki, akumpwaghile, “Chijembi ngachechipetiki ng'o pamutu jangu, kwa ndandi nepani nde muhaghulika waka Chapanga kutumbula mulutumbu lwaka mabhu wangu. Ngati majunju gha mmutu wangu anaghamoghakiki, makili ghangu anaghamokaje, na anangubhaje njeta makili ngati mundu jongi jokapi.”

18Bhela Delila paakamanyiki kubha Samsoni andandili ghokapi ghaghakabhili muntima waki, Delila akatumiki utenga kwa ihongozi bha Bhafilisti na kupwagha, “Mhikaje kabhete, maghambu chikahi chenjenu Samsoni anandili mambu ghaki ghokapi.” Panihapa ihongozi bha Bhafilisti bhakunjendi Delila, koni bhakabya na madini gha feza mu mabhoku ghabhu. 19Najombi Delila akuntendiki Samsoni aghonilaje lughonu pamajuwa ghaki, akundohiki mundu amoghaje mabutu saba gha majunju gha kumutu jaki ghala. Delila akatumbwili kung'aha Samsoni nahuli ajumukaje, nambu makili ghaka Samsoni ghakabhokiki. 20Delila akunjumwihi Samsoni, “Samsoni! Bhafilisti bhahika kukulapula!” Samsoni akajumwiki mu luwonu koni akaholalyaje kubha anaapitaje kunja na kulikengalela ngati pakutumbala hapa. Nambu ngacheakamanyi kubha Bambo Chapanga andekike. 21Bhafilisti bhakunkamwili, bhakambohiki mihu ghaki, bhakuntoliki bhakahelili naku mbaka ku Gaza, bhakunkongiki pengu ja shaba, na bhakunjomalakili kuhenga lihengu la kuyagha inganu mu ligeleza heli. 22Nambu majunju ghaka Samsoni ghakatumbwili kukola kabeti baada ja kumoghakeka kwaki.

Kupotela kwaka Samsoni

23Bhela ihongozi bha Bhafilisti bhakalibhongini nahuli kubhoha nyambiku kwaka chapanga wabhu Dagoni na kutenda uwangalalu, koni bhakabya bhajemba ana, “Chapanga witu Dagoni atutendiki tumuwezaje adui witu Samsoni.” 24Bhandu pabhakumbweni Samsoni bhakundumbalili chapanga wabhu, bhakapwaghaje, “Henu chapanga witu atutendiki tepani tunkamulaje adui witu, jola joayoningi inchi jitu na kubhakoma bhandu bhamaheli pachilanda jitu.” 25Mitima jabhu jakabhili jihekalela namaa, bhakapwaghaje, “Mundetaje Samsoni ahika akinaje nahuli tuhekalyaje.” Panihapa bhakundetiki Samsoni kuhuma mu ligeleza mola najombi akakiniki palongi jabhu. Bhakumbekiki pachilanda ja nguzu ibheli. 26Samsoni akumpwaghili nkombu joakunkamwili chiwoku chaki, “Mekaje pandu ambapu nhweza kuikamula nguzu yeikamulila nyumba jenu nahuli mbataje kujeghamakela.” 27Nyumba jela jakabhili jitwelili bhandu akanalomi na akambomba. Bhakolongwa bhokapi bha Bhafilisti bhakabhili monihomu, na panani ja ugholu bhakabhili bhandu elufu itatu akanalomi na akambomba, bhakabhili bhundingalili Samsoni chikahi paakabhi akina.

28Bhela Samsoni akundobhiki Bambo Chapanga, akapwaghaje, “Bambo Chapanga nikulobha ungombukaje. Chapanga chondi umbekehi makili mala nankamu jenu pena, nahuli kwa lijambu heli mbata kulepa kisasi kwa Bhafilisti kwa ndandi ja mihu ghangu ghabheli.” 29Samsoni akaikamwili nguzu ibheli ya pachilanda yela ambayu nyumba jela jakabhili jichengakiki panani jaki. Akakamwili jimu chiwoku cha kumalelelu na jimu chiwoku cha kumangeja. 30Samsoni akapwaghike, “Nguhaje papamu na Bhafilisti!” Panihapa akaikangiki nguzu kwa makili ghaki ghokapi. Nyumba jela jakabhahabhukili ihongozi bha Bhafilisti habha na bhandu bhokapi bhabhakabhi mkati mola. Akabhakomiki bhandu bhamaheli chikahi cha kupotela kwaki kupeta chikahi cha womi waki.

31Panihapa bhalongu na tati waki bhakahelili kujenda kujitola hyegha jaki. Bhakakweliki na kujitagha pachilanda ja muchi wa Sola na muchi wa Eshitaoli mu chibhanja cha kutaghila chaka Manoa tati waki. Najombi Samsoni akabhili mtemula wa Izilaeli kwa hyaka ishilini.